ەڭبەك جانە حالىقتى الەۋمەتتىك قورعاۋ مينيسترلىگى ءتيىستى قۇجاتتار بولماعان جاعدايدا وڭايلاتىلعان تارتىپپەن قانداس جانە قازاقستان ازاماتتىعى مارتەبەسىن الۋ ءۇشىن قازاق ۇلتىنا جاتاتىندىعىن ايقىنداۋ قاعيدالارىن ازىرلەدى، دەپ حابارلايدى “ادىرنا” ۇلتتىق پورتالى.
جاڭا ەرەجەگە سايكەس، ازاماتتاردىڭ ۇلتى قازاق ەكەنىن انىقتاۋ تۋرالى ءوتىنىش "Migration.enbek.kz" پورتالى، "قۇتتى مەكەن" ءموبيلدى قوسىمشاسى، حالىقتى الەۋمەتتىك قورعاۋ جانە جۇمىسپەن قامتۋ ماسەلەلەرى جونىندەگى جەرگىلىكتى اتقارۋشى ورگانى نەمەسە قر شەتەلدەردەگى مەكەمەسى ارقىلى بەرىلەدى.
كانديداتتىق مارتەبەسىن جانە قازاقستان رەسپۋبليكاسىنىڭ ازاماتتىعىن الۋ ءۇشىن ءوتىنىش بىلدىرگەن ادامداردىڭ ۇلتى قازاق ەكەنىن انىقتاۋ ءۇشىن جەرگىلىكتى اتقارۋشى ورگانمەن كوميسسيا قۇرىلادى.
كوميسسيا قۇرامىنا حالىقتىڭ كوشى-قونى، ءبىلىم بەرۋ، مادەنيەت، ىشكى ساياسات، ۇلتتىق قاۋىپسىزدىك جانە ىشكى ىستەر ورگاندارى، ەتنيكالىق قازاقتار ماسەلەلەرىمەن اينالىساتىن ۇكىمەتتىك ەمەس ۇيىمدار جانە قوعامدىق بىرلەستىكتەر سالاسىنا جەتەكشىلىك ەتەتىن ماماندار، سونداي-اق قازاق ءتىلى مەن قازاقستان تاريحى سالاسىنداعى ماماندار كىرەدى.
كوميسسيا قازاق ءتىلىن، سالت-ءداستۇرىن، ادەت-عۇرپىن، مادەنيەتىن، تۋىستىق قارىم-قاتىناسىن جانە ادامنىڭ ءوزىن ەتنيكالىق قازاق رەتىندە تانۋعا مۇمكىندىك بەرەتىن باسقا دا فاكتورلاردى بىلۋىنە باعىتتالعان سۇحباتتى جەكە نەمەسە ونلاين رەجيمىندە جۇرگىزەدى. سودان كەيىن الىنعان اقپاراتتى تالداپ، شەشىم قابىلدايدى.
ۇلتى قازاق ەكەنىن انىقتاۋ ءۇشىن ءوتىنىش بەرۋشى جەرگىلىكتى ورگانعا تۋ تۋرالى كۋالىكتى، اتا-اناسىنىڭ تۋ تۋرالى كۋالىگىن، اتا-باباسىنىڭ قازاقستان اۋماعىندا تۇراتىنى تۋرالى مۇراعاتتىق انىقتامالاردى، بار بولعان جاعدايدا نەكە قيۋ تۋرالى كۋالىكتى ۇسىنادى.
ودان كەيىن كوميسسيا 3 جۇمىس كۇنى ىشىندە اشىق داۋىس بەرۋ ارقىلى ءوتىنىش بەرۋشىلەردىڭ ۇلتىنىڭ قازاقتىعىن انىقتاۋ نەمەسە انىقتاۋدان باس تارتۋ تۋرالى ۇسىنىم قابىلدايدى جانە وعان قاتىسقانداردىڭ كەمىندە ۇشتەن ەكىسىنىڭ وڭ داۋسىمەن قابىلداندى دەپ ەسەپتەلەدى.
