Eńbek jáne halyqty áleýmettik qorǵaý mınıstrligi tıisti qujattar bolmaǵan jaǵdaıda ońaılatylǵan tártippen qandas jáne Qazaqstan azamattyǵy mártebesin alý úshin qazaq ultyna jatatyndyǵyn aıqyndaý qaǵıdalaryn ázirledi, dep habarlaıdy “Adyrna” ulttyq portaly.
Jańa erejege sáıkes, azamattardyń ulty qazaq ekenin anyqtaý týraly ótinish "Migration.enbek.kz" portaly, "Qutty meken" mobıldi qosymshasy, halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organy nemese QR shetelderdegi mekemesi arqyly beriledi.
Kandıdattyq mártebesin jáne Qazaqstan Respýblıkasynyń azamattyǵyn alý úshin ótinish bildirgen adamdardyń ulty qazaq ekenin anyqtaý úshin jergilikti atqarýshy organmen komıssııa qurylady.
Komıssııa quramyna halyqtyń kóshi-qony, bilim berý, mádenıet, ishki saıasat, ulttyq qaýipsizdik jáne ishki ister organdary, etnıkalyq qazaqtar máselelerimen aınalysatyn úkimettik emes uıymdar jáne qoǵamdyq birlestikter salasyna jetekshilik etetin mamandar, sondaı-aq qazaq tili men Qazaqstan tarıhy salasyndaǵy mamandar kiredi.
Komıssııa qazaq tilin, salt-dástúrin, ádet-ǵurpyn, mádenıetin, týystyq qarym-qatynasyn jáne adamnyń ózin etnıkalyq qazaq retinde tanýǵa múmkindik beretin basqa da faktorlardy bilýine baǵyttalǵan suhbatty jeke nemese onlaın rejıminde júrgizedi. Sodan keıin alynǵan aqparatty taldap, sheshim qabyldaıdy.
Ulty qazaq ekenin anyqtaý úshin ótinish berýshi jergilikti organǵa týý týraly kýálikti, ata-anasynyń týý týraly kýáligin, ata-babasynyń Qazaqstan aýmaǵynda turatyny týraly muraǵattyq anyqtamalardy, bar bolǵan jaǵdaıda neke qııý týraly kýálikti usynady.
Odan keıin Komıssııa 3 jumys kúni ishinde ashyq daýys berý arqyly ótinish berýshilerdiń ultynyń qazaqtyǵyn anyqtaý nemese anyqtaýdan bas tartý týraly usynym qabyldaıdy jáne oǵan qatysqandardyń keminde úshten ekisiniń oń daýsymen qabyldandy dep esepteledi.
