قازاقستانعا كوشىپ كەلمەك بولعان 32 جاستاعى سامي اتا گۇل ەسىمدى اۋعانستاندىق ازامات استانا اۋەجايىندا ەلدە قالۋى ءۇشىن قۇجاتىن جىرتتى. ايتۋىنشا، ونىڭ قازاقستاندا قالۋ تۋرالى ءوتىنىشى قابىلدانباي، دەپورتاتسيالاۋ تۋرالى شەشىم قابىلدانعان، دەپ حابارلايدى “ادىرنا” پورتالى Stan.kz اقپارات اگەنتتىگىنە سىلتەپ.
قانداس سامي اتا گۇل اۋعانستاندا تۋىپ-وسكەن. ول قازاقستانعا وتكەن جىلى كۇزدە كەلىپ، كەيىن اتامەكەنىندە قالۋعا شەشىم قابىلداعان. وسىلايشا ازاماتتىق الۋعا قۇجات تاپسىرعان. الايدا بيلىكتەگىلەر وعان ازاماتتىق بەرۋدەن باس تارتىپ، ەل اۋماعىندا بولۋ ەرەجەلەرىن بۇزدى دەپ ايىپتاپ، دەپورتاتسيالاۋ تۋرالى شەشىم قابىلداعان.
سامي اتا گۇل بۇل شەشىممەن كەلىسپەي، ونىڭ قورعاۋشىسى دەپورتاتسيالاۋ تۋرالى سوت شەشىمىنە شاعىمدانعان. دەگەنمەن بۇعان قاراماستان، پوليتسەيلەر ازاماتتى ۇستاپ، اۋەجايعا دەيىن الىپ كەلگەن. ەشقايدا كەتپەس ءۇشىن اتا گۇل اۋەجايدا تولقۇجاتىن جىرتقان. سەبەبى ۇشاققا تولقۇجاتسىز كىرگىزبەيدى.
"اۋعانستاندا تۋعانىما كىنالىمىن بە؟ ەشكىمدى ولتىرمەدىم، وتىرىك ايتپادىم", - دەپ اشۋلاندى جاس جىگىت.
دۇنيەجۇزىلىك قازاقتار قاۋىمداستىعىنىڭ استاناداعى وكىلى باقىت سارايدىڭ ايتۋىنشا، اقمولا وبلىسى تسەلينوگراد اۋدانىنىڭ كوشى-قون پوليتسياسىنىڭ ءۇش قىزمەتكەرى اتا گۇلدى تىكەلەي جاتىن ورنىنان الىپ كەتكەن. كەيىن ونى بىر تاۋلىككە جۋىق ۋاقىت ىزدەگەنىن ايتادى.
“ولار تاڭعى ساعات 7:30-دا بيلەتكە الىپ، ونى ەلدەن كۇشتەپ دەپورتاتسيالاۋعا تىرىستى. ونى مەتالل جاقتاۋدان وتۋگە ماجبۇرلەگەن. بىراق سامي ءوز وتانىنان كەتپەيتىنىن ايتىپ، پاسپورتىن جىرتىپ تاستاپتى”، - دەدى باقىت ساراي.
سامي تولقۇجاتىن جىرتقاننان كەيىن دە پوليتسيا وعان اۋەجاي عيماراتىنان كەتۋگە رۇقسات بەرمەگەن ەكەن.
"ولار بىزگە پروكۋراتۋرادان قۇجاتتاردى اكەلۋىمىزدى تالاپ ەتتى. سوندا عانا ونىڭ قورعاۋشىسى رەتىندە ماعان ونى اۋەجايدان الىپ كەتۋىمە رۇقسات ەتەدى ەكەن. قاجەتتى قاعازداردى الۋعا كەتكەنىمىزدە تسەلينوگراد اۋدانىنىڭ كوشى-قون پوليتسياسى سامي اتا گۇلدى بەلگىسىز باعىتقا الىپ كەتكەن. ءبىز ونىڭ قايدا ەكەنىن ءالى بىلمەيمىز", – دەپ قوستى باقىت ساراي.
باقىت سارايدىڭ ايتۋىنشا، اۋعانستاندا قازاقستانعا كوشۋ ءۇشىن ۆيزا الا الماي جۇرگەن قازاقتار كوپ. ال سامي اتا گۇلدىڭ قايدا كەتكەنى تۋرالى جاۋاپتى تسەلينوگراد اۋدانىنىڭ پوليتسيا ءبولىمى ءالى كۇنگە دەيىن بەرمەگەن.
