قازاقستان پرەزيدەنتى قاسىم-جومارت توقاەۆتىڭ جارلىعىمەن جوعارعى سوت سۋدياسى تالعات يبراشەۆ قىزمەتىنەن كەتتى، دەپ حابارلادى “ادىرنا” ۇلتتىق پورتالى.
سەناتتىڭ جالپى وتىرىسىندا جوعارعى سوت كەڭەسىنىڭ توراعاسى الەكساندر شيپ سۋديانى قىزمەتىنەن بوساتۋدى ۇسىندى.
“تالعات اۋليەحانۇلى يبراشەۆ قازاقستان پرەزيدەنتىنىڭ 2024 جىلعى 19 ساۋىردەگى جارلىعىمەن الماتى وبلىستىق سوتىنىڭ توراعاسى بولىپ تاعايىندالدى. قۇرمەتتى دەپۋتاتتار، جوعارعى سوت سۋدياسى تالعات اۋليەحانۇلى يبراشەۆتىڭ باسقا لاۋازىمعا تاعايىندالۋىنا بايلانىستى قىزمەتتەن بوساتۋ تۋرالى ۇسىنىستى قولداۋىڭىزدى سۇرايمىن”، - دەدى الەكساندر شيپ.
سەناتور نۇرلان بەكزاناروۆ بۇل ماسەلە تالقىعا سالىنعانىن جەتكىزدى.
«كونستيتۋتسيالىق زاڭناما، سوت جۇيەسى، قۇقىق قورعاۋ ورگاندارى كوميتەتى كەڭەيتىلگەن وتىرىستا قازاقستان پرەزيدەنتىنىڭ جوعارعى سوت سۋدياسىن قىزمەتىنەن بوساتۋعا ۇسىنىلعان كانديداتۋرانى تالقىلاپ، قاراۋ ناتيجەسى بويىنشا قورىتىندى شىعاردى. قازاقستان پرەزيدەنتىنىڭ ۇسىنىمى نەگىزىندە جانە كونستيتۋتسيانىڭ 55-بابىنىڭ 1-تارماقشاسىنا، قازاقستان پارلامەنتى مەن ونىڭ دەپۋتاتتارىنىڭ مارتەبەسى تۋرالى كونستيتۋتسيالىق زاڭىنىڭ 2-بابىنا، قازاقستان سوت جۇيەسى جانە سۋديالاردىڭ مارتەبەسى تۋرالى كونستيتۋتسيالىق زاڭنىڭ 33-بابىنىڭ 1-تارماعىنىڭ 8-تارماقشاسىنا، 3-تارماعىنىڭ 1-تارماقشاسىنا سايكەس كوميتەت سەناتقا تالعات اۋليەحانۇلى يبراشەۆتى باسقا قىزمەتكە تاعايىنداۋىنا بايلانىستى قازاقستان جوعارعى سوتىنىڭ سۋدياسى قىزمەتىنەن بوساتۋدى ۇسىنادى»، - دەدى كونستيتۋتسيالىق زاڭناما، سوت جۇيەسى، قۇقىق قورعاۋ ورگاندارى كوميتەتىنىڭ توراعاسى.
داۋىس بەرۋ ناتيجەسىندە سەناتورلار ۇسىنىستى قولدادى.
