سوتتالعان بۇرىنعى بانكير جومارت ەرتاەۆ امنيستيا بويىنشا بوساتۋدى جويعان اپەللياتسيالىق ينستانتسيا قاۋلىسىنا شاعىمدانا المايدى. بۇل تۋرالى جوعارعى سوت مالىمدەدى، دەپ حابارلايدى "ادىرنا".
جوعارعى سوتتىڭ تۇسىندىرۋىنشە، اپەللياتسيالىق قاۋلى قىلمىستىق-پروتسەستىك كودەكستىڭ 484-بابىنىڭ 2-بولىگى 2-تارماعىنا سايكەس قايتا قاراۋعا جاتپايدى. سونداي-اق ەرتاەۆتان مەرزىمىنەن بۇرىن بوساتۋ تۋرالى ءوتىنىش سوتقا تۇسپەگەن.
قىلمىستىق-اتقارۋ جۇيەسى كوميتەتى ونىڭ سوت ۇكىمى بويىنشا جازاسىن وتەپ جاتقانىن عانا راستادى. جازانى وتەۋ ورنى تۋرالى اقپارات جاقىن تۋىستارىنا حابارلاناتىنى ايتىلدى.
ەسكە سالساق، 2020 جىلدىڭ قاراشاسىندا ەرتاەۆ Bank RBK-تەن 144 ملرد تەڭگە جىمقىرعانى ءۇشىن 11 جىلعا سوتتالعان. كەيىن تاعى ءبىر ءىس بويىنشا Qazaq Banki جانە ەۋرازيالىق بانك قارجىسىن جىمقىرعانى ءۇشىن قوسىمشا ۇكىم شىققان. 2021 جىلى العاشقى ءىس بويىنشا جازا مەرزىمى 9 جىلعا قىسقارتىلعان.
2025 جىلدىڭ قىركۇيەگىندە ەرتاەۆ كونستيتۋتسيانىڭ 30 جىلدىعىنا بايلانىستى امنيستيامەن بوساتىلعان ەدى. الايدا كەيىن اپەللياتسيالىق سوت ءبىرىنشى ينستانتسيا جىبەرگەن قاتەلىكتەردى انىقتاپ، امنيستيانى جويۋ تۋرالى شەشىم قابىلدادى. بۇل جونىندە الماتى وبلىستىق سوتى حابارلاعان.
ناتيجەسىندە امنيستيا قولدانۋ تۋرالى ءوتىنىش قاناعاتتاندىرىلماي، ەرتاەۆ قايتادان قاماۋدا قالدى.
