مەملەكەت باسشىسى الماتىعا جۇمىس ساپارى اياسىندا Changan, Chery, Haval ماركالى اۆتوموبيلدەر شىعاراتىن زاۋىتتىڭ ىرگەتاسىن قالاۋ راسىمىنە قاتىستى.
پرەزيدەنتكە جوبانىڭ تولقۇجاتى تانىستىرىلىپ، 2024 جىلدىڭ ءتورتىنشى توقسانىندا اشىلادى دەپ جوسپارلانعان زاۋىتتىڭ ۇلگىسى كورسەتىلدى. زاۋىتتىڭ ءوندىرىس اۋماعى 100 مىڭ شارشى مەتردەن اسادى. ءۇش اۆتوكولىك ماركاسىنىڭ ارقايسىسى ءۇشىن دانەكەرلەۋ جانە قۇراستىرۋ جۇمىستارىنا ارنالعان جەكە تسەح سالىنادى.
زاۋىت ىسكە قوسىلعاننان كەيىن ونىڭ وندىرىستىك قۋاتى جىلىنا 90 مىڭنان استام كولىك شىعارۋعا جەتەدى. ينۆەستيتسيانىڭ جالپى قۇنى 100 ميلليارد تەڭگەدەن اسادى. «Astana motors» كومپانياسى 2200-گە جۋىق جۇمىس ورنىن اشادى.
قاسىم-جومارت توقاەۆ جوبامەن تانىسقان سوڭ زاۋىت جۇمىسشىلارىمەن اڭگىمەلەستى.
– بۇل جوبا ەلىمىزگە وتە قاجەت. سوندىقتان تاۋەكەل دەيمىز. زاۋىتتىڭ جۇمىسىنا ساتتىلىك تىلەيمىن. قىتاي توراعاسى سي تسزينپين مىرزا بيىل قازاقستانعا كەلگەن كەزىندە كەلىسسوز جۇرگىزدىك. سونىڭ ىشىندە وسى جوبا تۋرالى دا اڭگىمەلەستىك. ناتيجەسىندە، مىنە، بۇل جوبا ىسكە اسىرىلا باستادى. قۇتتى بولسىن! – دەدى پرەزيدەنت.
