جاقىندا جيەنالى جانە دوستىق اۋىلدىق وكرۋگتەرى اكىمدەرىنىڭ قاتىسۋىمەن ءباسپاسوز كونفەرەنتسياسى ءوتتى. ەلباسى نۇرسۇلتان ءابىشۇلى نازارباەۆ اۋىلدىڭ تۇرمىسىن ارتتىرۋ ماقساتىندا مەملەكەتتىك جانە سالالىق باعدارلامالاردا كوزدەلگەن، ەلىمىزدە جۇرگىزىلىپ وتىرعان ىشكى جانە سىرتقى ساياساتتىڭ نەگىزگى باعىتتارىن جۇزەگە اسىرۋدى تاپسىرعان ەدى. وسى ورايدا، ەكى اۋىلدىق وكرۋگتىڭ اكىمدەرى بىلتىرعى جىلدى قورىتىندىلاي وتىرىپ، قازىرگى الەۋمەتتىك-ەكونوميكالىق كورسەتكىشتەردىڭ دەڭگەيى تۋرالى اقپارات بەردى.
- جيەنالى اۋىلدىق وكرۋگى سەمەي قالاسىنان 50 شاقىرىم جەردە ورنالاسقان. وكرۋگتىڭ نەگىزگى باعىتى – مال شارۋاشىلىعى. 2018 جىلى «جارقىن» جانە «نۇر» قوجالىقتارى مەملەكەت تاراپىنان 21 ملن. 700 مىڭ سۋبسيدياسىن الىپ، بۇگىندە مال شارۋاشىلىعىن دامىتىپ وتىر. ال، 2019 جىلدىڭ اۋىلشارۋاشىلىق ونەركاسىبى كەشەنىن دامىتۋدىڭ 2017-2022 جىلدارعا ارناعان ناتيجەلى جۇمىسپەن قامتۋ جانە جاپپاي كاسىپكەرلىكتىڭ 2017-2021 جىلدارعا ارنالعان «ەڭبەك» باعدارلاماسى اياسىندا بوكەنشى اۋىلىنىڭ تۇرعىنى بەيسەمبينوۆ ماديار «بيزنەس باستاۋ» باعدارلاماسىمەن جەكە كاسىپكەر رەتىندە تىركەلىپ، شاعىن نەسيە الىپ مال شارۋاشىلىعىن وركەندەتۋگە ءوز ۇلەسىن قوسۋدا. بۇگىنگى كۇنى بارلىق الەۋمەتتىك نىساندار ونىڭ ىشىندە، بوكەنشى اۋىلىنىڭ دارىگەرلىك امبۋلاتورياسى، مارالدى اۋىلىنىڭ مەديتسينالىق پۋنكتى، اۋىلدىق كلۋب، ۆەتەرينارلىق پۋنكت جۇمىس جاساپ، حالىق ءۇشىن قىزمەت كورسەتۋدە. سونداي-اق، اۋىلدى اباتتاندىرۋ، جارىقتاندىرۋ، اۋىز سۋمەن قامتاماسىز ەتۋ جۇمىستارى دا قارقىندى جۇرگىزىلۋدە،-دەدى جيەنالى اۋىلدىق وكرۋگىنىڭ اكىمى گۇلجان امانجولقىزى.
دوستىق اۋىلدىق وكرۋگى حالقىنىڭ دا باستى كاسىبى – مال شارۋاشىلىعى. قازىرگى ۋاقىتتا 13 شارۋا قوجالىعىندا 640 باس ءىرى قارا وسىرىلۋدە.
- دوستىق اۋىلدىق وكرۋگى قالادان 25 شاقىرىم جەردە ورنالاسقان. وكرۋگ اۋىلشارۋاشىلىعىنا باعىتتالعان مەملەكەتتىك باعدارلامالار شەڭبەرىندە كوزدەلگەن جۇمىستاردى اتقارىپ كەلەدى. قازىرگى ۋاقىتتا اۋىلدى سۋمەن جابدىقتاۋ جەلىسىن سالۋ جانە سۋ مۇناراسىن قايتا ىسكە قوسۋعا ارنالعان جۇمىستار جۇرگىزىلىپ جاتىر. سونىمەن قاتار، كوشەلەردى جارىقتاندىرۋ ماسەلەسى دە الدىڭعى قاتاردا تۇر،-دەدى دوستىق اۋىلدىق وكرۋگىنىڭ اكىمى نۇركەن جارليكەنوۆ.
"ادىرنا" ۇلتتىق پورتالى
