الماتىدا مەملەكەت باسشىسىنىڭ ازاماتتاردى تۇرعىن ۇيمەن قامتاماسىز ەتۋ جونىندەگى تاپسىرمالارى جۇيەلى تۇردە جۇزەگە اسىرىلۋدا

الماتىدا مەملەكەت باسشىسى قاسىم-جومارت توقاەۆتىڭ حالىقتىڭ ءومىر ءسۇرۋ ساپاسىن ارتتىرۋ جانە ازاماتتاردى قولجەتىمدى تۇرعىن ۇيمەن قامتاماسىز ەتۋ جونىندەگى تاپسىرمالارىن ىسكە اسىرۋ جالعاسۋدا.

بۇگىن الماتى اكىمى دارحان ساتىبالدى قالا تۇرعىندارىنا جاڭا پاتەرلەردىڭ كىلتىن تابىستاۋدىڭ ەكىنشى كەزەڭىنە قاتىستى.

وتكەن ايدا العاشقى كەزەڭ اياسىندا 885 وتباسى جاڭا باسپانانىڭ كىلتىنە يە بولدى. ەكىنشى كەزەڭدە جالپى سانى 1832 پاتەر تابىستالادى. ونىڭ ىشىندە بۇگىن «كەنەسارى» تۇرعىن ءۇي كەشەنىندە 946 وتباسىعا جاڭا پاتەردىڭ كىلتى بەرىلدى. العاشقى ەكى كەزەڭنىڭ قورىتىندىسى بويىنشا 2700 الماتىلىق وتباسىنىڭ تۇرعىن ءۇي جاعدايى جاقسارادى. ءۇشىنشى كەزەڭدە تاعى 640 پاتەر تابىستالىپ، ودان كەيىن باعدارلاما ءتورتىنشى جانە بەسىنشى كەزەڭدەر اياسىندا جالعاسادى.

«مەملەكەت باسشىسى قاسىم-جومارت كەمەلۇلى توقاەۆتىڭ ازاماتتاردىڭ ءومىر ءسۇرۋ ساپاسىن ارتتىرۋ، حالىقتىڭ ءال-اۋقاتىن جاقسارتۋ جانە الەۋمەتتىك ادىلەتتىلىكتى قامتاماسىز ەتۋگە باعىتتالعان تاپسىرمالارىن ورىنداۋ اياسىندا قالامىزدا تۇرعىن ءۇي ماسەلەسىن شەشۋگە ەرەكشە كوڭىل بولىنۋدە»، – دەدى الماتى قالاسىنىڭ اكىمى دارحان ساتىبالدى.

تۇرعىن ءۇيدى ءبولۋ بارىسىندا جەتىم بالالارعا، مۇگەدەكتىگى بار ازاماتتارعا، سونداي-اق ەرەكشە قاجەتتىلىگى بار بالالاردى تاربيەلەپ وتىرعان مۇقتاج وتباسىلارعا باسىمدىق بەرىلەدى. ەكىنشى كەزەڭ اياقتالعاننان كەيىن وسى ساناتتاعى ازاماتتاردىڭ تۇرعىن ءۇي كەزەگى ايتارلىقتاي ىلگەرىلەيدى. سونىمەن قاتار ەڭبەك ەتەتىن قالا تۇرعىندارى ءۇشىن جەڭىلدەتىلگەن يپوتەكالىق نەسيە باعدارلامالارى جۇمىسىن جالعاستىرۋدا. بيىل «الماتى جاستارى» باعدارلاماسى بويىنشا 5 مىڭنان استام ءوتىنىم قابىلداندى. جىل سوڭىنا دەيىن 1650 جاس الماتىلىق جەڭىلدەتىلگەن تۇرعىن ءۇي نەسيەسىن الۋ مۇمكىندىگىنە يە بولادى.

ء«بىز ءۇشىن جاڭا تۇرعىن ءۇي كەشەندەرىن سالۋ – باسپانا تۇرعىزۋ عانا ەمەس، تۇرعىندارعا جايلى ءومىر ءسۇرۋ ورتاسىن قالىپتاستىرۋ. سوندىقتان «كەنەسارى» تۇرعىن ءۇي كەشەنىنىڭ جانىنان 1200 ورىندىق زاماناۋي مەكتەپ سالىندى»، – دەدى قالا اكىمى.

الماتى تۇرعىندارىن ساپالى ءارى قولجەتىمدى تۇرعىن ۇيمەن قامتاماسىز ەتۋ قالا دامۋىنىڭ باسىم باعىتتارىنىڭ ءبىرى بولىپ قالا بەرەدى جانە مەملەكەت باسشىسىنىڭ تاپسىرمالارىنا سايكەس كەزەڭ-كەزەڭىمەن جۇزەگە اسىرىلىپ كەلەدى.