پرەزيدەنت قاسىم-جومارت توقاەۆ تۇركىمەنستان باسشىسىن «التىن قىران» وردەنىمەن ناگرادتادى، دەپ حابارلايدى «ادىرنا» ۇلتتىق پورتالى اقورداعا سىلتەمە جاساپ.
استانادا وتكەن سالتاناتتى ءراسىم بارىسىندا مەملەكەت باسشىسى سەردار بەردىمۇحامەدوۆتىڭ جاڭا فورماتسياداعى بەدەلدى مەملەكەت قايراتكەرى، ەلدىڭ مەملەكەتتىك نەگىزدەرىن، الەۋمەتتىك-ەكونوميكالىق الەۋەتىن جانە حالىقارالىق بەدەلىن نىعايتۋعا ەلەۋلى ۇلەس قوسىپ جۇرگەن پروگرەسسيۆتى دە مىقتى ليدەر ەكەنىن اتاپ ءوتتى.
پرەزيدەنت توقاەۆتىڭ ايتۋىنشا، تۇركىمەنستان باسشىسى ۇلتتىق ليدەر – گۋربانگۋلى بەردىمۇحامەدوۆ جوسپارلاعان بولاشاققا باعىتتالعان ستراتەگيالىق كۋرستى تابىستى جالعاستىرىپ كەلەدى.
ء«سىزدىڭ دانا باسشىلىقپەن تۇركىمەنستان ەكونوميكاسىنىڭ قارقىنى ارتىپ، ونەركاسىپ، كولىك ينفراقۇرىلىمى، ەنەرگەتيكا سالاسى جاڭارىپ جاتىر. الەۋمەتتىك جوبالار جوسپارلى تۇردە جۇزەگە اسىپ، عىلىم مەن ءبىلىم سالاسى دامۋدا. حالىقتىڭ ءال-اۋقاتى ارتىپ كەلەدى. بۇل جەتىستىكتەرىڭىز ەڭ جوعارى باعالاۋعا لايىق»، — دەدى پرەزيدەنت توقاەۆ.
مەملەكەت باسشىسى، اسىرەسە، اشحابادتىڭ حالىقارالىق ديپلوماتيا، بەيبىتشىلىك پەن تۇراقتىلىق ورتالىعى رەتىندەگى ءرولىن كۇشەيتۋگە باعىتتالعان باستامالاردى اتاپ ءوتتى. بۇعان بۇۇ باس اسسامبلەياسى قولداعان 2025 جىلدى حالىقارالىق بەيبىتشىلىك پەن سەنىم جىلى دەپ جاريالاۋ باستاماسى ناقتى دالەل ەكەنىن جەتكىزدى.
قازاقستان پرەزيدەنتى ەكى ەل اراسىنداعى دوستىق پەن ستراتەگيالىق سەرىكتەستىكتى نىعايتۋداعى سەردار بەردىمۇحامەدوۆتىڭ جەكە ەڭبەگىن ەرەكشە اتاپ ءوتتى.
«قازاق–تۇركىمەن قاتىناستارىنىڭ بولاشاعى زور ەكەنىنە سەنىمدىمىن. بۇگىنگى كەلىسسوزدەردىڭ ناتيجەلەرى وسىنىڭ ايقىن دالەلى. قول جەتكىزىلگەن ۋاعدالاستىقتار كوپجاقتى ىنتىماقتاستىعىمىزعا جاڭا سەرپىن بەرەدى»، — دەدى قازاقستان پرەزيدەنتى.
ءوز كەزەگىندە سەردار بەردىمۇحامەدوۆ مەملەكەت باسشىسىنا جوعارى مەملەكەتتىك ماراپات ءۇشىن العىس ءبىلدىردى.
«بۇل ناگرادا – تۇركىمەنستان حالقىنا كورسەتىلگەن زور قۇرمەتتىڭ بەلگىسى. حالىقتارىمىزدى عاسىرلار بويى دوستىق پەن تاتۋ كورشىلىك بايلانىستىرادى. ەكى ەلدىڭ حالىقارالىق ارەناداعى تىعىز جانە ناتيجەلى ىنتىماقتاستىعى – جوعارى دەڭگەيدەگى ءوزارا تۇسىنىستىك پەن قولداۋدىڭ كورىنىسى»، — دەدى ول.
"التىن قىران" وردەنىمەن بۇرىن سەردار بەردىمۇحاممەدوۆتىڭ اكەسى گۋربانگۋلى بەردىمۇحاممەدوۆ تە ماراپاتتالعان بولاتىن. بيىلدىڭ وزىندە وسى وردەنمەن ارمەنيا پرەمەرى نيكول پاشينيان، ماسكەۋ جانە بۇكىل رەسەي پاتريارحى كيريلل جانە قىرعىزستان پرەزيدەنتى سادىر جاپاروۆ ماراپاتتالدى.
