تاسقىنباي. سۋ تاسقىنى كەزىندە ومىرگە كەلگەن ءسابيدىڭ جاعدايى بەلگىلى بولدى

قۇلسارى تۇرعىنى تاسقىن كەزىندە ومىرگە كەلگەن ۇلىن "تاسقىنباي" دەپ اتاپ كەتكەن، دەپ حابارلايدى "ادىرنا" ۇلتتىق پورتالى. اتىراۋ وبلىستىق جەدەل شتابى تاسقىننىڭ ەڭ قاۋىپتى تۇسىندا ومىرگە كەلگەن بالانىڭ جاعدايى جاقسى ەكەنىن ايتادى. جۇلدىز جاندوسقىزى توتەنشە جاعداي كەزىندە العاش رەت انا اتاندى. جاس انا بوسانعاننان كەيىن بىردەن قۇلسارىدان ەۆاكۋاتسيالانعان. "تولعاعىم قىسىپ جىلىوي اۋداندىق اۋرۋحاناسىنا ساعات 00.00-دە ءتۇستىم، ۇلىمدى 5 ساۋىردەن 6 ساۋىرگە قاراعان ءتۇنى دۇنيەگە اكەلدىم. بالام ءۇشىن ازداپ قورقىنىشتى بولدى، بىراق دارىگەرلەر ءبارى جاقسى بولادى دەپ سەندىردى. مەن جانە تاعى ءبىر بوسانعان ايەل بىرنەشە ساعاتتان كەيىن بەينەۋگە كوشىرىلدىك" ، - دەدى جاس انا. بۇل جۇلدىز جاندوسقىزىنىڭ العاشقى ءسابيى. بالانىڭ اتاسى مەن اجەسى ونى بەكزات دەپ اتاۋعا شەشىم قابىلداعان. دەگەنمەن ءسابي تاسقىن كەزىندە ومىرگە كەلگەننەن كەيىن، ونى تۋىستارى "تاسقىنباي" دەپ اتاپ كەتكەن. "جىلىوي اۋداندىق اۋرۋحاناسىنىڭ دارىگەرلەرىنە سىن ساعاتتا جانىمىزدا بولىپ، ۇلىم ەكەۋمىزگە كۇتىم كورسەتكەنى ءۇشىن العىس ايتامىن. ءتىپتى، بەينەۋ قالاسىنا ەۆاكۋاتسيالاۋ كەزىندە دە جانىمىزدا بىرگە بولدى. بەينەۋلىك دارىگەرلەرگە، شىعارىلعانعا دەيىن كومەك پەن قولداۋ كورسەتكەنى ءۇشىن كوپ راحمەت", - دەدى جاس انا. سۋ تاسقىنى كەزىندە جاس وتباسىنىڭ ءۇيى زارداپ شەككەن جوق