قازاقستاندا سايلاۋشىلارعا ارنالعان ونلاين-سەرۆيستەر ىسكە قوسىلادى. بۇل تۋرالى بۇگىن ورتالىق سايلاۋ كوميسسياسىنىڭ وتىرىسىندا وسك توراعاسىنىڭ ورىنباسارى مۇحتار ەرمان ايتتى.
وسى سەرۆيستەردىڭ كومەگىمەن ۋچاسكەلىك سايلاۋ كوميسسيالارىنىڭ مۇشەلەرى ازاماتتىڭ تىركەلگەن مەكەنجايىن تەكسەرە الادى. بۇل ونى سايلاۋشىلار تىزىمىنە ەنگىزۋ ءۇشىن قاجەت. ول ءۇشىن ازامات ءتيىستى وتىنىشپەن جۇگىنۋى ءتيىس. ەكىنشى سەرۆيس تىركەۋى جوق ازاماتتارعا سايلاۋ ۋچاسكەسىنىڭ مەكەنجايى بويىنشا ۋاقىتشا تىركەۋگە تۇرۋعا مۇمكىندىك بەرەدى. اتالعان ەكى سەرۆيس تە قازاقستاندىقتاردىڭ سايلاۋ قۇقىعىن ىسكە اسىرۋىنا جاردەمدەسۋگە باعىتتالعان.
«eGov پورتالى ارقىلى سەرۆيسكە قول جەتكىزۋ قۇقىعى بەرىلگەن ۋچاسكەلىك سايلاۋ كوميسسيالارىنىڭ مۇشەلەرى ازاماتتىڭ جازباشا ءوتىنىشى نەگىزىندە ونىڭ تۇراقتى تىركەلگەن مەكەنجايى تۋرالى مالىمەت الا الادى. ەگەر ءوتىنىش بەرۋشىنىڭ تۇراقتى تىركەلگەن تۇرعىلىقتى جەرى ءتيىستى سايلاۋ ۋچاسكەسىنىڭ شەكاراسى اۋماعىندا ەكەنى راستالسا، كوميسسيا ونى سايلاۋشىلار تىزىمىنە ەنگىزۋ تۋرالى شەشىم قابىلدايدى. بۇل سەرۆيس 5106 سايلاۋ ۋچاسكەسىندە قولجەتىمدى بولادى. سونداي-اق تۇرعىلىقتى جەرى بويىنشا تىركەۋدەن شىعارىلعان جانە بۇرىن سايلاۋشىلار تىزىمىنە ەنگىزىلمەگەن ازاماتتاردىڭ سايلاۋ قۇقىعىن ىسكە اسىرۋ ماقساتىندا داۋىس بەرۋ كۇنى ولاردى سايلاۋ ۋچاسكەسى ورنالاسقان مەكەنجاي بويىنشا ۋاقىتشا تىركەۋگە جول بەرىلەدى»، - دەپ حابارلادى مۇحتار ەرمان.
وتىرىستا ازاماتتاردى بىرنەشە رەت تىركەۋگە جول بەرمەۋ جانە باقىلاۋ تەتىكتەرىنە دە ەرەكشە نازار اۋدارىلدى. ايتا كەتەيىك، بۇل جوبالاردى ورتالىق سايلاۋ كوميسسياسى، جاساندى ينتەللەكت جانە تسيفرلىق دامۋ مينيسترلىگى، ىشكى ىستەر مينيسترلىگى بىرلەسىپ جۇزەگە اسىرۋدا.
