الماتىدا قوعامدىق كەڭىستىكتەردى دامىتۋعا باعىتتالعان كەشەندى باعدارلاما اياسىنداعى جۇمىستار جالعاسۋدا. بيىلعى العاشقى جارتىجىلدىقتىڭ قورىتىندىسى بويىنشا توعىز نىسانداعى نەگىزگى كوركەيتۋ جۇمىستارى اياقتالدى. سونىمەن قاتار، قالانىڭ ءىرى اۋماقتارىن كورىكتەندىرۋ جالعاسىپ، جاڭا جوبالار ىسكە اسىرىلا باستادى. بۇل تۋرالى الماتى قالاسىنىڭ قوعامدىق كەڭىستىكتەردى دامىتۋ باسقارماسىنىڭ وكىلدەرى حابارلادى.
قازىرگى تاڭدا دوستىق داڭعىلى، پۋشكين كوشەسى، سايران كولىنىڭ جاعالاۋى، گەولوگتار اللەياسى، «وڭتۇستىك» ساياباعى، باۋم توعايى، FLOW PARK, رەسپۋبليكا الاڭى جانە «اتاكەنت» ىسكەرلىك ىنتىماقتاستىق ورتالىعى الدىنداعى الاڭ پايدالانۋعا دايىندالدى. قازىر بۇل نىسانداردا سوڭعى ارلەۋ جانە تۇزەتۋ جۇمىستارى جۇرگىزىلۋدە.
كوركەيتۋ بارىسىندا جۇرگىنشىلەر ايماقتارى جاڭارتىلىپ، سىرتقى جارىقتاندىرۋ جۇيەلەرى مەن اۆتوماتتى سۋارۋ جۇيەلەرى ورناتىلدى. سونداي-اق كوگالداندىرۋ جۇمىستارى جۇرگىزىلىپ، شاعىن ساۋلەتتىك نىساندار، بالالار جانە سپورت الاڭدارى، زاماناۋي دەمالىس ايماقتارى سالىندى. نىسانداردىڭ تەحنيكالىق دايىندىعى تۇرعىنداردىڭ ولاردى قازىردىڭ وزىندە سەرۋەندەۋ جانە دەمالۋ ءۇشىن پايدالانۋىنا مۇمكىندىك بەرەدى.
سونىمەن قاتار، كوركەيتۋ باعدارلاماسىنىڭ كەلەسى كەزەڭدەرى دە جالعاسۋدا. 2026 جىلدىڭ سوڭىنا دەيىن تۇڭعىش پرەزيدەنت ساياباعىن قايتا جاڭعىرتۋ، سونداي-اق تيميريازەۆ، ءماسانچي، سەيفۋللين، جاروكوۆ، جاندوسوۆ، روزىباكيەۆ، ساتباەۆ كوشەلەرى مەن اباي داڭعىلىن كوركەيتۋ جوسپارلانعان. ال ن. ساتس اتىنداعى بپلالار مەن جاسوسپىرىمدەر تەاترى ماڭىنداعى سكۆەردى كورىكتەندىرۋ جۇمىستارى تامىز ايىنىڭ سوڭىنا دەيىن اياقتالماق.
بۇدان بولەك، بالالارعا ارنالعان عىلىم مۋزەيىنىڭ قۇرىلىسى ءجۇرىپ جاتىر. نىساندى بيىلعى جىلدىڭ سوڭىنا دەيىن پايدالانۋعا بەرۋ جوسپارلانعان.
قالادا قوعامدىق كەڭىستىكتەردى دامىتۋعا ارنالعان جاڭا جوبالار دا باستاۋ الدى. سونىڭ ءبىرى اۋەجاي كولى اۋماعىن قايتا جاڭعىرتۋ. بۇل جەردە تۇرعىندارعا ارنالعان زاماناۋي دەمالىس ايماعىن قۇرۋ كوزدەلگەن. جاڭا جوبالار قالالىق ورتانىڭ ساپاسىن ارتتىرۋعا، دەمالىس ينفراقۇرىلىمىن دامىتۋعا جانە جايلى قوعامدىق كەڭىستىكتەر قالىپتاستىرۋعا باعىتتالعان.
قوعامدىق كەڭىستىكتەردى دامىتۋ باسقارماسىنىڭ مالىمەتىنشە، بارلىق نىساندا قۇرىلىس-مونتاج جۇمىستارىنىڭ بارىسىنا، تارتىلعان تەحنيكا مەن جۇمىسشىلار سانىنا كۇن سايىن باقىلاۋ جۇرگىزىلەدى. بۇل جوبالاردىڭ بەلگىلەنگەن مەرزىمدە اياقتالۋىن قامتاماسىز ەتۋگە مۇمكىندىك بەرەدى.
