بۇگىن – تۇركى جازۋى كۇنى. بۇل اتاۋلى داتا پارلامەنت شەشىمىمەن جانە ۇكىمەت قاۋلىسىمەن 2014 جىلى بەكىتىلدى، دەپ حابارلايدى «ادىرنا» ءتىلشىسى.
2001 جىلى 18 مامىردا ەجەلگى تۇركى سوزدەرى جازىلعان كۇلتەگىن كوك تاسىنىڭ كوشىرمەسى موڭعوليا دالاسىنان استاناعا اكەلىنگەن بولاتىن.
تورتكۇل دۇنيەگە وزدەرىن تانىتىپ، «ماڭگىلىك ەل» بولۋدى كوكسەگەن بابالاردىڭ تەرەڭ دە تاعىلىمدى تاريحىن تاسقا قاشاپ جازۋى - تۇركى حالىقتارىنىڭ ولمەس وركەنيەت قالىپتاستىرعانىنىڭ كورىنىسى. كونە تۇرىك جازۋىنىڭ ەسكەرتكىشتەرى ورتالىق ازيا اۋماعىندا كوپ تابىلعان. ولاردىڭ ىشىندەگى ەڭ بەلگىلىسى — سولتۇستىك موڭعوليا جەرىندەگى ورحون، سەلەنگا، تولى وزەندەرىنىڭ بويىنان تابىلعان تاستاعى جازۋلار. رۋنا جازۋلارى تۇرىكتەردىڭ اتاقتى بيلەۋشىلەرى بىلگە قاعان، كۇلتەگىن، تونىكوكتىڭ قۇرمەتىنە ارنالعان.
ەرتەدەگى تۇرىك جازۋىن تۇڭعىش رەت ءحVىىى عاسىردىڭ 20-جىلدارىندا ءى پەترگە قىزمەت ەتكەن نەمىس عالىمى د.مەسسەرشميدت پەن وعان ەرىپ جۇرگەن شۆەدتىڭ تۇتقىن وفيتسەرى ي.سترالەنبەرگ ەنيسەي اڭعارىندا اشتى. ولار سكاندينۆيانىڭ رۋنالىق جازۋىمەن ۇقساستىعىنا قاراپ، ونى «رۋنالىق» جازۋ دەپ اتادى. اتاۋ ونشا ءدال بولماعانىمەن، قولايلى بولىپ شىقتى جانە عىلىمدا وسى اتاۋ ورنىعىپ قالدى.
1889 جىلى ن.م.يادرينتسەۆ سولتۇستىك موڭعوليادا، ورحون وزەنىنىڭ اڭعارىنان رۋنا جازۋلارى بار وراسان زور قۇلىپتاستاردى تاپتى. ال ماتىندى وقۋدىڭ كىلتىن العاش تاپقان دات عالىمى ۆ.تومسەن، ال جازبالاردى العاش رەت وقىعان ورىس تۇركولوگى ۆ.رادلوۆ بولدى.
