سۋ تاسقىنىنان زارداپ شەككەن قۇلسارى اۋىلىنىڭ تۇرعىندارى بۇعان دەيىن ۋادە ەتىلگەندەي ءار شارشى مەتردەن 200-250 مىڭ تەڭگەدەن ەمەس، 400 مىڭ تەڭگەدەن شىعىننىڭ ەسەپتەلۋىن تالاپ ەتۋدە. «ادىرنا» ۇلتتىق-پورتالى اۋىلداعى جىلجىمايتىن مۇلىك نارىعىن زەرتتەدى.
«كرىشا» جىلجىمايتىن مۇلىك ساتۋ سايتىنا مونيتورينگ جۇرگىزۋ بارىسىندا قۇلسارى قالاسىنداعى جەكە تۇرعىن ۇيلەردى ساتۋ تۋرالى 190 حابارلاندىرۋ جاريالانعانى انىقتالدى.
سايتتا ەڭ ەسكى حابارلاندىرۋ 2024 جىلدىڭ 9 مامىرى جاريالانعان.
ءۇيدىڭ جاعدايى مەن جوندەۋ ساپاسىنا قاراي ءبىر شارشى مەتردىڭ باعاسى 150-200 مىڭ تەڭگە ارالىعىن قۇرايدى.
2024 جىلعى 16 مامىرىنداعى سوڭعى جاريالانعان حابارلاندىرۋلار دا شارشى مەتردىڭ باعاسى 150-200 مىڭ تەڭگە ارالىعىندا بولدى.
ەسكە سالايىق، بۇعان دەيىن اتىراۋ وبلىسىنىڭ اكىمى سەرىك شاپكەنوۆ مۇلكى بۇلىنگەن دەپ تانىلعاندارعا وتەماقى قۇلسارى قالاسىندا شامامەن 200-240 مىڭ تەڭگەنى قۇرايتىن نارىقتىق باعامەن تولەنەتىنىن حابارلاعان بولاتىن. دەگەنمەن، تۇرعىندار 400 مىڭ تەڭگەدەن شىعىننىڭ ەسەپتەلۋىن تالاپ ەتۋدە.
