اتىراۋ وبلىسىنىڭ قۇلسارى قالاسىندا تاسقىننان زارداپ شەككەن ءۇي وتەماقىسى بويىنشا نارازىلىق ەكىجاقتى كەلىسىمگە قول جەتكىزۋدىڭ ارقاسىندا اياقتالدى. بۇل تۋرالى بۇگىن، 22 مامىردا ىشكى ىستەر ۆيتسە-ءمينيسترى مارات قوجاەۆ مالىمدەدى، دەپ حابارلايدى “ادىرنا” ۇلتتىق پورتالى.
نارازىلىققا شىعۋشىلار شاتىرلاردى جيناپ الىپ، ورتالىق جولدى اشتى. قازىر تۇرعىندار بۇلىنگەن باسپانانى باعالاۋ تۋرالى كەلىسىمگە قول قويىپ جاتىر.
«قۇلسارى توڭىرەگىندە بۇگىن جۇرت الاڭنان كەتتى. مەنىڭ تۇسىنۋىمشە، كونسترۋكتيۆتى كونسەنسۋسقا قول جەتكىزىلدى. قۇلسارىدا دا، ورالدا دا ەشكىم قاماۋعا الىنعان جوق. وتەماقى تولەۋدى تالاپ ەتكەن ادامدار قاماۋعا الىنبادى»، - دەدى قوجاەۆ سارسەنبى كۇنى ءماجىلىس سىرتىندا.
«اق جايىق» باسىلىمىنىڭ حابارلاۋىنشا، شەرۋگە شىعۋشىلار ءوز ەركىمەن شاتىرلارىن الىپ، الاڭنان تارقاستى. باسشىلىق باسپانانى باعالاۋ ءادىل وتەدى دەپ سەندىردى.
اتىراۋ وبلىسىنىڭ اكىمدىگى قۇلسارى قالاسىنداعى سۋ تاسقىنى سالدارىنان زارداپ شەككەن تۇرعىن ۇيلەردى باعالاۋ وسى اپتادا اياقتالادى دەپ ۋادە بەرىپ وتىر.
ەستەرىڭىزگە سالا كەتەيىك، اتىراۋداعى قۇلسارى قالاسىنىڭ تۇرعىندارى 15 مامىر كۇنى اكىمدىك عيماراتىنىڭ الدىنا ەكىنشى رەت نارازىلىققا شىقتى. جينالعاندار توزىعى جەتكەن ءۇيدىڭ ءار شارشى مەترى ءۇشىن 400 مىڭ تەڭگەدەن تولەم تالاپ ەتكەن.
