مادەنيەت جانە اقپارات مينيسترلىگى ارتىستەردىڭ كونتسەرت كەزىندەگى ادەپسىز ارەكەتى ءۇشىن جاۋاپكەرشىلىك ەنگىزۋدى ۇسىندى. مينيسترلىكتىڭ بۇيرىق جوباسى اشىق نقا سايتىندا جاريالاندى، دەپ حابارلايدى “ادىرنا” ۇلتتىق پورتالى.
مادەني ءىس-شارا بارىسىندا كورەرمەندەرمەن قارىم-قاتىناس جاساۋ كەزىندە ونەر قايراتكەرلەرىنىڭ ءجونسىز مىنەز-قۇلىق تانىتۋىنا، كورەرمەندەرگە بالاعات ءسوز سويلەپ، ادەپسىز قىلىق كورسەتۋىنە، الكوگولدىك ىشىمدىك ءىشىپ، الكوگولدىك نەمەسە ەسىرتكىلىك ماساڭ كۇيدە بولۋىنا، سونداي-اق پسيحوتروپتىق زاتتاردى، ولاردىڭ انالوگتارى مەن پرەكۋرسورلارىن قابىلداۋىنا جاۋاپكەرشىلىك ەنگىزىلمەك.
مادەنيەت مينيسترلىگى ماس كۇيىندە ساحناعا شىققان ارتىستەرگە ايىپپۇل كولەمىن دە بەلگىلەدى.
مۇنداي قىلىقتارى ءۇشىن:
جەكە تۇلعالارعا 150 اەك (553 800 تەڭگە)
زاڭدى تۇلعالارعا 300 اەك (1 ملن 107 600 تەڭگە) وسىنداي ارەكەتتەر قايتالانعان جاعدايدا:
جەكە تۇلعالارعا 200 اەك (738 400 تەڭگە)
زاڭدى تۇلعالارعا 600 اەك (2 ملن 215 200 تەڭگە)
