سۋ تاسقىنىنان زارداپ شەككەن وبلىس ورتالىعىنداعى 12 ساياجاي ۋچاسكەلەرىنەن سۋدى سورۋ جۇمىستارى جۇرگىزىلۋدە.
اتالعان جۇمىستارعا توتەنشە جاعدايلار دەپارتامەنتى تاراپىنان 37 تەحنيكا، 40-قا جۋىق مامان جۇمىلدىرىلدى.
قازىرگى ۋاقىتتا وبلىس اكىمى ناريمان تورەعاليەۆتىڭ تاپسىرماسى اياسىندا ورال قالاسىندا سۋ تاسقىنىنان زارداپ شەككەن ساياجاي تۇرعىندارىنىڭ شىعىنىن ەسەپتەۋ جانە ماتەريالدىق كومەك تولەۋ جونىندەگى ارنايى كوميسسيا شتاتتىق رەجيمدە جۇمىس ىستەۋدە.
سۋ تاسقىنىنان زارداپ شەككەن تۇرعىندارعا 100 ايلىق ەسەپتىك كورسەتكىش كولەمىندە بۇگىنگى كۇنگە دەيىن وبلىس بويىنشا 7759 وتباسىعا 2,8 ملرد تەڭگە بىرجولعى الەۋمەتتىك كومەك تولەندى. تۇرعىنداردان تۇسكەن وتىنىشتەر نەگىزىندە تولەمدەردى تولەۋ جالعاسۋدا.
بۇدان بولەك، كوميسسيا تەكسەرۋ اكتىلەرى اياسىندا سۋى كەتكەن ساياجايلاردى قاراۋدا. كەزەڭ-كەزەڭىمەن بارلىق ساياجايلار تەحنيكالىق زەرتتەۋدەن وتەدى.
اتاپ وتەرلىگى، وسىعان دەيىن تۇراقتى نەگىزدە ساياجاي تۇرعىندارىمەن كەزدەسۋلەر وتكىزىلدى، الداعى ۋاقىتتا دا ءتۇسىندىرۋ جۇمىستارى جالعاساتىن بولادى.