قىتايدا جۇمباق جاعدايدا قازا تاپقان ستۋدەنت قىزدىڭ تۋىستارى ادىلەتتىلىككە قول جەتكىزە الماي ءجۇر. ولاردىڭ ايتۋىنشا، سانديرا سەرىكحاندى بىرەۋلەر ادەيى 17-ءشى قاباتتان قۇلاتىپ جىبەرگەن كورىنەدى, - دەپ حابارلايدى كتك تەلەارناسى.
چانچجوۋداعى ەڭ مىقتى ۋنيۆەرسيتەتتىڭ بىرىنە گرانتقا تۇسكەن قانداسىمىزدىڭ ءومىرىنىڭ سوڭعى ساتتەرى تاسپاعا دا ءتۇسىپ قالىپتى. بىراق ءىس سۋيتسيد دەپ جابىلىپ تىنعان.
"سانديرا سەرىكحان نۇر-سۇلتانداعى ەڭ ماقتاۋلى گيمنازيانىڭ تۇلەگى. نەبارى 16 جاسىندا قىتاي ءتىلىن مەڭگەرگەن قىز بىردەن گرانتقا وقۋعا تۇسكەن. الايدا، قىتايعا ارمان ارقالاپ كەتكەن قارا كوزىمىزدىڭ ەلگە تابىتى كەلدى. سونداعى پوليتسيانىڭ رەسمي مالىمەتى بويىنشا، ساباعىن 5-كە وقىپ جۇرگەن قىز ءوز ەركىمەن 17-ءشى قاباتتان سەكىرىپ كەتكەن", - دەيدى تەلەارنا ءتىلشىسى.
سانديرانىڭ ناعاشى اپكەسى ءالنۇر اعاەۆا قىزدىڭ سۋيتسيد جاسادى دەگەنىنە سەنبەيدى. ويتكەنى ول الدىندا عانا ۆيدەو ارقىلى ۇيىمەن حابارلاسىپ، دەمالىسقا ەلىنە كەلگەلى جاتقانىن، باۋىرلارىنا ساتىپ العان بازارلىقتاردى كورسەتىپتى.
- ول جازعى دەمالىسقا ۇيگە جينالىپ جاتقان. سول كۇننىڭ الدىندا عانا ۆيدەومەن سويلەستىك. باۋىرلارىنا ساتىپ العان سىيلىقتارىن كورسەتىپ، اناسىمەن ءماز-مەيرام بولعان. قىزىمىزدى ادەيى ءولتىرىپ وتىر، - دەيدى ول.
قىزدىڭ ينستاگرامىنان بەلگىلى بولعانىنداي، سول كۇنى سانديرانى بايان دەگەن باسقا ءبىر ستۋدەنت كلۋبقا بارايىق دەپ قويماي، اقىرى كوندىرىپتى. وندا ماديار جانە دانيار دەگەن دوستارىمەن تانىستىرعان. كەش سوڭىندا دانيار "پاتەردەن ءبىر زات الۋ كەرەك" دەگەن سىلتاۋمەن بىرگە بارۋىن ءوتىنىپ قويماعان ەكەن.
قىز كەلىسكەنىمەن، تابالدىرىقتان ءارى اتتاعىسى كەلمەي تۇرعانى پودەزدەگى تاسپاعا ءتۇسىپ قالعان. ۆيدەودا جىگىت قىزدى جەتەكتەپ كىرگىزگەن دەيدى ءالنۇر اعاەۆا. ءبىرازدان سوڭ سانديرا پاتەردەن جىلاپ شىعادى. ءارى قارايعى جاعداي تاسپادان تىس جەردە جالعاسقان.
جىگىتتىڭ ايتۋىنشا، قىزدىڭ 17-ءشى قاباتتان قالاي قۇلاپ كەتكەنى ەسىندە جوق. نە ءۇشىن جىلاپ جۇرگەنىن دە ءتۇسىندىرىپ بەرە الماپتى.
- دانيار يمانقۇلوۆ ول شىمكەنتتەن. قىز نەگە جىلادى دەگەن سۇراققا جاۋاپ بەرە المادى. ايتۋىنشا، ءوزى دە شوكتا بولعان، - دەيدى سانديرانىڭ ناعاشى اپكەسى.
بىلمەيمىن دەپ باسىن الا قاشقان جىگىت سول كۇيى قاراسىن باتىرىپتى. ۇشەۋى دە وقۋ ورنىنا ىزدەپ بارعان قىزدىڭ اكەسىمەن جولىعۋدان باس تارتىپ، تەلەفوندارىن ءسوندىرىپ تاستاپتى. تۋىستارى زورلىق-زومبىلىق جاسالدى ما دەپ كۇدىكتەنەدى. ودان قالدى، قىزدىڭ ءبىر اياق كيىمى تەرەزەنىڭ تۇسىندا قالىپ قويعان. ودان قالدى، جاقتاۋدان ساۋساق ىزدەرى تابىلماپتى. سول سەبەپتى دە ونى بىرەۋدىڭ لاقتىرىپ جىبەرگەنىنە سەنىمدى. بىراق مۇنى دالەلدەۋ مۇمكىن بولماي تۇر. سەبەبى، زاڭى قاتال قىتاي ءمايىتتى 30 كۇن تەكسەرەدى ەكەن. مۇنشاما ۋاقىت كۇتە الماعان وتباسى قىزدىڭ دەنەسىن ساراپتاماسىز ەلگە اكەلۋگە ءماجبۇر بولعان.
ال ءىس "سۋيتسيد" دەپ جابىلىپ تىنعان. ەلىمىزدىڭ ديپلوماتتارى ءىستى قايتا قاراۋدى سۇراپتى. بىراق قورىتىندىسى وزگەرمەگەن.
- قىتاي تاراپى بۇل ءىستى قايتا قاراپ شىقتى. ءىستى قايتا قاراۋ ناتيجەسى بويىنشا جازاتايىم وقيعا سانالاتىن بوپ شىقتى، - دەيدى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
نەبارى 19 جاستاعى سانديرا سەرىكحان ءۇيىنىڭ ۇلكەنى ەكەن. وتباسىندا 4 بالا. كىشكەنتاي باۋىرلارى اپكەسى كەلەدى دەپ كۇندە كۇتىپ ءجۇر. جالپى، قازاق ستۋدەنتتەرىنىڭ شەتەلدە قازا تابۋى ءبىرىنشى جاعداي ەمەس. ماسكەۋدە وقۋ قابىرعاسىندا قۇلاپ ولگەن توميريس بايسافانىڭ دا ءىسى سوزبالاڭعا سالىنىپ، ءبىر جارىم جىلدان بەرى تۋىستارى ادىلەتتىلىك تاپپاي كەلەدى.
"ادىرنا" ۇلتتىق پورتالى
