“ەسكى قازاقستاننىڭ” بىرنەشە وكىلىنىڭ مۇلىكتەرى دۋبايدان تابىلدى، دەپ حابارلايدى “ادىرنا” ۇلتتىق پورتالى ۆلاست-قا سىلتەمە جاساپ.
ەكس-پرەزيدەنت نۇرسۇلتان نازارباەۆتىڭ تۋىستارىنىڭ، ءماجىلىستىڭ بۇرىنعى سپيكەرى نۇرلان نىعماتۋليننىڭ جانە «ەسكى قازاقستاننىڭ» بىرنەشە وكىلدەرىنىڭ دۋبايدا قىمبات جىلجىمايتىن مۇلىك تۇرىندەگى كوپتەگەن اكتيۆتەرى بار ەكەنى انىقتالدى.
بۇرىنعى پرەزيدەنت نۇرسۇلتان نازارباەۆتىڭ جۇبايى، «استانا بالەت» تەاترىنىڭ ارت-جەتەكشىسى اسەل قۇرمانباەۆانىڭ مۇلىكتەرى تابىلدى. دۋبايداعى جىلجىمايتىن مۇلكىنىڭ قۇنى 270 مىڭ دوللاردان اساتىن پاتەر. قۇرمانباەۆا 2000-جىلدارى "وففشورلىق كومپانيالار ارقىلى نازارباەۆتىڭ جاقىن ادامدارىنان 30 ميلليون دوللار العانى" انىقاتلدى.
ال ءماجىلىستىڭ ەكس-سپيكەرى نىعماتۋليننىڭ ايەلى ۆەنەرا بايمىرزاەۆادان ونداعان جىلجىمايتىن مۇلىك تابىلدى.
دەرەككوزدە ماماندىعى كاسىپكەر دەلىنگەن ۆەنەرا بايمۋرزاەۆانىڭ دۋبايداعى جىلجىمايتىن مۇلكى بىرنەشە. ناقتىراق، جالپى قۇنى 4,3 ميلليون دوللاردان اساتىن 50-دەن استام جىلجىمايتىن مۇلىك كورسەتىلگەن.
ودان بولەك، ورتالىق سايلاۋ كوميسسياسىنىڭ بۇرىنعى باسشىسى بەرىك يماشەۆتىڭ ۇلى ءالجان يماشەۆتىڭ دۋباي قالاسىنداعى نازارباەۆتىڭ ەكىنشى ايەلى قونىستانعان جاساندى ارال اۋماعىندا قۇنى 1 ميلليون دوللاردان اساتىن پاتەرى بولعان. ايتا كەتەرلىگى، قۇنى شامامەن 210 مىڭ دوللار تۇراتىن پاتەردى ورتالىق سايلاۋ كوميسسياسىنىڭ بۇرىنعى باسشىسى قىزمەتىن اتقارعان يماشەۆتىڭ ايەلى لەيلا ايداربەكوۆادان دا تاۋىپ العان.
دۋبايدا تاعى مۇلكى بار بىرنەشە وكىلدەر انىقتالدى.
الماتى وبلىسىنىڭ بۇرىنعى اكىمى اماندىق باتالوۆتىڭ ايەلى باعدات باتالوۆا دۋبايداعى ەليتالىق تۇرعىن ءۇي كەشەنىنەن قۇنى شامامەن 210 مىڭ دوللار تۇراتىن ەكى بولمەلى پاتەردىڭ يەسى. ءىستى بولعان بۇرىنعى قورعانىس ۆيتسە-ءمينيسترى باعدات مايكەەۆتىڭ دۋبايدا قۇنى 500 مىڭ دوللاردان اساتىن پاتەرى بار.
بۇل تىزىمدە بۇرىنعى ىشكى ىستەر ءمينيسترى قالمۇحانبەت قاسىموۆانىڭ ايەلى دينا قاسىموۆانىڭ دا ەسىمى تابىلدى. ونىڭ قۇنى 400 مىڭ دوللاردان اساتىن ءبىر بولمەلى پاتەر بولسا، «قازمۇنايگاز» ۇك» اق بۇرىنعى باسشىسى اليك ايدارباەۆتىڭ اعاسى ەرجان ايدارباەۆ جالپى قۇنى 570 مىڭ دوللاردان اساتىن ەكى بولمەلى پاتەردىڭ ۇشەۋىن يەمدەنگەن.
ال سوتتالىپ، تۇرمەدە جازاسىن وتەگەن نازارباەۆتىڭ نەمەرە ءىنىسى قايرات ساتىبالدىنىڭ دۋبايدا قۇنى 2,2 ميلليون دوللاردان اساتىن بەس پاتەرى بار ەكەنى بەلگىلى بولدى.
ەكس-پرەزيدەنتتىڭ قىزى داريعا نازارباەۆانىڭ كۇيەۋىنىڭ تۋىستارى دا بىرنەشە مۇلىك يەلەنگەن. قايرات شارىپباەۆتىڭ قىزى قورلان شارىپباەۆانىڭ اتىندا دۋبايداعى شامامەن 250 مىڭ دوللار تۇراتىن پاتەر بار.
قاڭتار وقيعاسى بويىنشا تەرگەلىپ جاتقان ىشكى ىستەر مينيسترلىگىنىڭ بۇرىنعى باسشىسى ەرلان تۇرعىمباەۆتىڭ ۇلى مارلەن تۇرعىمباەۆقا قۇنى 347 مىڭ دوللار تۇراتىن پاتەر تيەسىلى بولسا، شىعىس قازاقستان وبلىسىنىڭ ەكس-اكىمى دانيال احمەتوۆتىڭ ۇلى تالعات احمەتوۆتىڭ اتىندا شامامەن 1,6 ميلليون دوللار تۇراتىن ۆيللا بار.
ال تۇركىستان وبلىسىنىڭ ەكس-اكىمى ومىرزاق شوكەەۆتىڭ اعاسى سەرىك ەستاي مەن جۇبايى ايجان اسانوۆانىڭ اتىندا جالپى قۇنى 1,7 ميلليون دوللارعا جۋىق 8 پاتەر بار ەكەنى بەلگىلى بولدى.
ودان بولەك، قۇقىق قورعاۋ ورگاندارىنىڭ بۇرىنعى جوعارى لاۋازىمدى قىزمەتكەرى سەرگەي كۋزمەنكونىڭ اتىندا دا مۇلىك بار ەكەنى انىقتالدى. كۋزمەنكونىڭ دۋبايدا قۇنى 348 مىڭ دوللار بولاتىن ەكى بولمەلى پاتەرى بار بولىپ شىقتى.
