ەلدە109 زاڭ جوباسىنا وزگەرىستەر مەن تولىقتىرۋلار ەنگىزىلمەك. بۇل تۋرالى قاراعاندىعا بارعان پارلامەنت ءماجىلىسىنىڭ دەپۋتاتتارى مالىمدەدى، - دەپ حابارلايدى "استانا" تەلەارناسى. ولار ءتۇرلى سالالاردى رەتتەيتىن قۇجاتتاردى قايتا قاراۋ ءۇشىن وڭىرلەردى ارالاپ، تاجىريبەلى ماماندارمەن پىكىرلەسۋگە كىرىسكەن. كەزدەسۋ ىشكى ىستەر مينيسترلىگىنىڭ بارىمبەك بەيسەنوۆ اتىنداعى قاراعاندى اكادەمياسىندا ءوتتى. ءماجىلىس دەپۋتاتتارىنىڭ ايتۋىنشا، بۇل اكادەميادا بولاشاق پوليتسەيلەرگە تاجىريبەلى زاڭگەرلەر ءدارىس بەرەتىندىكتەن، ولاردىڭ پىكىرى ماڭىزدى. پارلامەنتتە اكىمشىلىك، قىلمىستىق جانە قىلمىستىق ءىس جۇرگىزۋ كودەكستەرىنە بىرقاتار وزگەرىستەر مەن تولىقتىرۋلار ەنگىزىلمەك. ونىڭ ىشىندە اتقارۋشىلىق ءىس تۋرالى زاڭعا سوت ورىنداۋشىلارىنىڭ جۇمىسىن جەڭىلدەتەتىن بىرقاتار باپ ەنگىزۋ جوسپارلانىپ وتىر. ماسەلەن، سوت ورىنداۋشىلاردىڭ وندىرگەن اقشاسىنا تىيىم سالۋ الىنىپ تاستالماق. "جەتىلدىرەتىن زاڭدار كوپ. سونىڭ ىشىندە قك، قىلمىستىق ءىس جۇرگىزۋ كودەكسىن جەتىلدىرۋىمىز كەرەك. قازىرگى اكىمشىلىك كودەكستى جەتىلدىرۋىمىز كەرەك. سونداي-سونداي زاڭداردى جەتىلدىرۋ ءۇشىن ولار پارلامەنت قابىرعاسىندا قارالىپ جاتىر. سوعان پىكىر الماسۋ ءۇشىن كەلىپ وتىرمىز. سولارعا تولىقتىرۋلار مەن وزگەرىستەر ەنگىزەمىز", - دەيدى قر پارلامەنتى ءماجىلىسىنىڭ دەپۋتاتى.
"ادىرنا" ۇلتتىق پورتالى
