قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگى جۇمىسسىز ازاماتتاردى سۋ تاسقىنىنان زارداپ شەككەن ايماقتاردا تۇرعىن ءۇي سالۋعا جانە ينفراقۇرىلىمدى قالپىنا كەلتىرۋگە قاتىسۋعا شاقىرادى. بۇل تۋرالى مينيسترلىكتىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، وسى ماقساتتا ەڭبەك مينيسترلىگى "بىرگە سالايىق!" اتتى جۇمىسپەن قامتۋدىڭ جاڭا جوباسىن قولعا الدى.
"ادام رەسۋرستارىن دامىتۋ ورتالىعى "بىرگە سالايىق!" جوباسى اياسىندا ازاماتتاردى جۇمىسپەن قامتۋعا قولداۋ كورسەتۋ ءۇشىن ارنايى پلاتفورما ازىرلەدى", - دەلىنگەن حابارلامادا.
بۇل ەلەكتروندى ەڭبەك بيرجاسىنداعى جاڭا مودۋل. مۇندا وڭىرلەرگە تۇرعىن ءۇي قورىن جانە ينفراقۇرىلىمىن قالپىنا كەلتىرۋگە كومەكتەسكىسى كەلەتىن كەز كەلگەن ادام بوس جۇمىس ورىندارىن قاراپ، كەز كەلگەنىن تاڭداپ، ول بويىنشا سۇحباتتان وتە الادى. وسى ۋاقىتقا دەيىن پلاتفورماعا 42 بوس جۇمىس ورنى جاريالانعان.
"بۇل جوبانىڭ ماڭىزدىلىعى – ءبىز جۇمىس تاپقىسى كەلەتىن جانە سۋ تاسقىنىنان زارداپ شەككەن ايماقتاردى قالپىنا كەلتىرۋگە اتسالىسقىسى كەلەتىندەردىڭ بارلىعىن جەدەل جۇمىسپەن قامتۋ ءۇشىن تسيفرلىق ورتانى قامتاماسىز ەتۋىمىزدە", - دەدى مينيستر سۆەتلانا جاقىپوۆا.
ءمينيستردىڭ ايتۋىنشا، قازىر ۆەدومستۆو جۇمىس بەرۋشىلەر مەن بوس جۇمىس ورىندارى تۋرالى مالىمەتتەر بازاسىن كەڭەيتىپ جاتىر.
"وڭىرلەر ءۇشىن بىلىكتى ماماندارمەن قاتار، ارنايى ءبىلىمى جوق ەڭبەك كۇشىنىڭ قاتىسۋى دا ماڭىزدى", - دەدى مينيستر.
ەڭبەك مينيسترلىگى قازاقستاندىقتاردى جوباعا قاتىسۋعا جانە زارداپ شەككەن ايماقتاردى قالپىنا كەلتىرۋگە ۇلەس قوسۋعا شاقىرادى، دەلىنگەن حابارلامادا.
ايتا كەتەيىك، قازاقستانداعى سۋ تاسقىنىنان اقمولا، اقتوبە، اتىراۋ، باتىس قازاقستان، قوستاناي، پاۆلودار جانە سولتۇستىك قازاقستان وبلىستارىنىڭ تۇرعىندارى مەن ينفراقۇرىلىمى زاقىمدانعان ەدى.