قازاقستاندىق كاسىپكەر، "BI-Group" قۇرىلىس كومپانياسىنىڭ نەگىزىن سالۋشى ايدىن راحىمباەۆ تاعى ءبىر ماقساتى ورىندالعانىن جازدى، دەپ حابارلايدى "ادىرنا" ۇلتتىق پورتالى.
كاسىپكەر ايدىن راحىمباەۆ Facebook جەلىسىندە قۋانىشتى جاڭالىعىمەن ءبولىستى. ول 51 جاسىندا گارۆارد ۋنيۆەرسيتەتىن ءتامامداپ، ديپلوم الدى.
"مەكتەپتەن كەيىن ەكىنشى تالپىنىسىمدا عانا ينجەنەرلىك-قۇرىلىس ينستيتۋتىنا ءتۇسىپ، ونى ءبىتىردىم، بىراق 17 جاسىمدا ءبىر جىل كولحوز بريگاداسىندا جۇمىسشى بولىپ جۇمىس ىستەۋگە تۋرا كەلدى. سودان كەيىن شاعىن بيزنەستى باستاپ، مامىلە جاساۋ ءۇشىن زاڭگەر ماماندىعىن قوسىمشا وقىدىم. ال بيزنەس قارقىندى دامي باستاعان 35 جاسىمدا MBA دارەجەسىن الدىم.
گارۆاردتى ءبىتىرۋ مەن ءۇشىن كەلەسى ۇلكەن ساياحاتتىڭ باسى عانا. ال 51 جاستا ءومىر جاڭا، بىراق بەلگىسىز تۇستەرمەن جارقىراي باستادى. ماعان سەنىڭىز، ءوزىڭىزدىڭ ەڭ جاقسى نۇسقاڭىزعا اينالۋ ەشقاشان كەش ەمەس. 20 دا ەمەس، 50 دە ەمەس، 70 دە ەمەس. ءسىز باتىل بولۋىڭىز كەرەك. ءبارى مىندەتتى تۇردە ورىندالادى!تاعى ءبىر كوپتەن كۇتكەن ماقساتىم - گارۆاردتىڭ ديپلومى قولىمدا!51 جاسىمدا وسى وقۋدىڭ ارقاسىندا جاڭا بەلەستەر مەن ەسىكتەر اشىلۋدا. ءومىر بويى ءبىلىمنىڭ ماڭىزدىلىعىن جاقسى ءتۇسىندىم، كەيدە ەش وقىماي، جەتىستىككە جەتۋگە بولادى دەپ ايتىپ جاتادى. يا، مۇمكىن ميلليوننىڭ ىشىندە بىرەۋ جەتەر، بىراق بارلىعى ەمەس. سوندىقتان ءبىلىم الۋدىڭ ەشقاشان ەرتە-كەشى جوق", - دەپ ويىن تۇيىندەدى كاسىپكەر.
