اقتوبەدە جەرگىلىكتى كاسىپكەر كەزىندە "100 جىلقى ۇرلادى" دەگەن ايىپپەن سوتتالعان راحات سارسەنوۆكە باسپانا تارتۋ ەتتى.
ەسكە سالايىق، بۇعان دەيىن 60 جاستاعى راحات سارسەنوۆكە "100 باس جىلقى ۇرلادى" دەگەن ايىپ تاعىلىپ، مۇعالجار اۋداندىق سوتى ونى 7 جىلعا باس بوستاندىعىنان ايىرعان بولاتىن. سونىمەن قاتار جابىرلەنۋشى تاراپتىڭ 30 ميلليون تەڭگە كولەمىندەگى ازاماتتىق تالابى دا قاناعاتتاندىرىلعان.
الايدا قورعاۋشىلار بۇل ۇكىممەن كەلىسپەي، اپەللياتسيالىق شاعىم ءتۇسىردى. ءىستى قايتا قاراۋ بارىسىندا ايىپتاۋ بابى وزگەرتىلىپ، سارسەنوۆتىڭ 100 ەمەس، نەبارى ءبىر جىلقىنىڭ قۇنى مولشەرىندە عانا ماتەريالدىق شىعىن كەلتىرگەنى انىقتالدى. وسىعان بايلانىستى ول راقىمشىلىققا ىلىگىپ، سوت زالىنان بىردەن بوستاندىققا شىقتى. 30 جىلدان استام ۋاقىت جىلقىشى بولىپ ەڭبەك ەتكەن قاريانىڭ بوستاندىققا شىققان ساتتەگى تولقىنىسى كوپشىلىكتىڭ جۇرەگىن ەلجىرەتىپ، وقيعا الەۋمەتتىك جەلىدە كەڭىنەن تالقىلاندى.
كەيىن جۋرناليست رۋسلان وتەپباي راحات سارسەنوۆتىڭ باسىنداعى قيىندىق مۇنىمەن اياقتالماعانىن مالىمدەدى. ونىڭ ايتۋىنشا، 2019 جىلى بۇرىنعى جۇمىس بەرۋشىسى قاريانى نوتاريۋسقا اپارىپ، جالعىز باسپاناسىن كەپىلگە قويعىزعان. ەرلى-زايىپتىنىڭ سوزىنشە، قۇجاتتاردىڭ ورىس تىلىندە راسىمدەلۋىنە بايلانىستى ولار ناقتى قانداي قۇجاتقا قول قويىپ جاتقانىن تولىق تۇسىنبەگەن. قازىر سوت شەشىمى شىققاندىقتان، سارسەنوۆ وتباسى جالعىز ۇيىنەن ايىرىلىپ قالۋ قاۋپىنە تاپ بولعان.
وسى جاعداي قوعامدا ۇلكەن رەزونانس تۋدىرعاننان كەيىن اقتوبەلىك كاسىپكەر راحات سارسەنوۆتىڭ وتباسىنا قالادان باسپانا سىيلادى. قۋانىشتى جاڭالىقتى جۋرناليست رۋسلان وتەپباي الەۋمەتتىك جەلىدەگى پاراقشاسىندا ءبولىسىپ، بەينەجازبا جاريالادى.
«راحات سارسەنوۆتىڭ وتباسىنا جەرگىلىكتى كاسىپكەر اقتوبە قالاسىنان باسپانا سىيلادى. "جۇمىسىمنان كورمەگەن جاقسىلىقتى حالىقتان كوردىم" دەپ، راحات اتا كوز جاسىنا ەرىك بەردى»، – دەدى جۋرناليست.
