«تاراز» فۋتبول كلۋبىنىڭ باس باپكەرى ۆاحيد ماسۋدوۆ قازاق فۋتبولى سپورت ەمەس تسيرككە ۇقسايدى دەپ مالىمدەدى. قازاقستان پرەمەر-ليگاسىنىڭ 18-تۋرى اياسىندا وتكەن «وقجەتپەس» - «تاراز» ويىنىنان كەيىن باس باپكەر ۆاحيد ماسۋدوۆ تورەشىلىككە قاراتىپ سىن پىكىر ايتتى.
- بۇل فۋتبول ەمەس، ناعىز تسيرك. ءبىزدىڭ ويىنشىلار دا وسى كورىنىستىڭ ىشىنە كىرىپ كەتكەنىنە وكىنەمىن. تورەشىلىك تاراپىنا تالاي مارتە سىن ايتتىق. ەشەتەڭە دە وتپەي جاتىر. بۇل قاشانعا دەيىن جالعاسۋى مۇمكىن؟ - دەدى باس باپكەر.
«وقجەتپەس» پەن «تاراز» اراسىنداعى ويىننىڭ ءبىرىنشى تايمىندا سەرج نيۋادزي گول سوعىپ، «تاراز» ەسەپتە العا شىقتى. بىراق، تايم اياقتالار تۇستا تورەشى ارمان ەسمۇراتوۆ «تاراز» قورعاۋشىسى ميحايلو ءيوۆانوۆيچتى الاڭنان قۋدى. 10 اداممەن ويناعان جامبىلدىق فۋتبولشىلار قورعانىسقا مىقتاپ بەكىنىپ، قاقپالارىن ۇزاق ۋاقىت امان ساقتادى. الايدا، كەزدەسۋ تورەشىسى داۋلى پەنالتي بەلگىلەپ، فۋتبولشىلاردى داۋلاستىرىپ تاستادى. پەنالتيدەن گول سالعان «وقجەتپەس» ويىنشىلارى باسىمدىلىق الىپ، ءبىر فۋتبولشىسى كەم «تارازدى» 3:1 ەسەبىمەن جەڭدى.
ءباسپاسوز ءماسليحاتىنا قاتتى قاپالى كەلگەن ۆاحيد يۋنۋسۇلى ەل فۋتبولىنداعى بارماق باستى كوز قىستى ارەكەتتەردىڭ بار ەكەنىن مەڭزەپ ايتتى.
- «تاراز» كومانداسى ەشتەڭەگە تالاسپايدى. ءبىز ۇلتتىق قۇراماعا كوپتەگەن جاستار دايارلاپ بەرىپ وتىرمىز. قازىر دە سول ىسپەن شۇعىلدانىپ ءجۇرمىز. ءبىز مۇنداي جاعدايلارعا تاپ بولماۋىمىز كەرەك. ىشتەگى جاعداي وسىنداي بولعان سوڭ، حالىقارالىق ارەنادا ۇنەمى وپىق جەپ وتىرامىز. مىسالى، وسى ويىننىڭ ءبىرىنشى تايمىن ءبىز قالاي كەرەمەت وينادىق، - دەدى «تاراز» فۋتبول كومانداسىنىڭ باس باپكەرى ۆاحيد ماسۋدوۆ.
ايتا كەتۋىمىز كەرەك وسىدان ءبىر اي بۇرىن "جەتىسۋ" كومانداسىنىڭ باس باپكەرى دميتري وگاي تورەشىلىكتى قاتتى سىناپ، 500 مىڭ تەڭگە كولەمىندە ايىپپۇل تولەدى.
ەرمۇحامەد ماۋلەن
inbusiness.kz
