ورال قالاسىنداعى ۆەنەرا، رەچنيك، ترۋد، گازوۆيك، ۆولنا، ۇمىتكەر ساياجايلارىنىڭ 200-دەن استام تۇرعىندارى ءوز ۇيلەرىنە ورالدى.
بۇدان بولەك، بۇگىندە سۋ تاسقىنىنان زارداپ شەككەن ساياجاي يەلەرىنە 100 ايلىق ەسەپتىك كورسەتكىش كولەمىندە ءبىر جولعى الەۋمەتتىك كومەك بەرىلۋدە. سونداي-اق، تۇرعىنداردان تۇسكەن وتىنىشتەر نەگىزىندە تولەمدەر جالعاسۋدا.
قازىرگى ۋاقىتتا ورال قالاسىندا سۋ تاسقىنىنان زارداپ شەككەندەردىڭ شىعىنىن ەسەپتەۋ جانە ماتەريالدىق كومەك تولەۋ جونىندەگى ارنايى كوميسسيا جۇمىس ىستەۋدە. كوميسسيا تەكسەرۋ اكتىلەرى اياسىندا سۋى كەتكەن ساياجايلاردى قاراۋدا. كەزەڭ-كەزەڭىمەن بارلىق ساياجايلار تەحنيكالىق زەرتتەۋدەن وتەدى.
ەستەرىڭىزگە سالا كەتەيىك، بقو اكىمى ناريمان تورەعاليەۆ وتكەن اپتادا ساياجاي تۇرعىندارى ورنالاسقان ورال قالاسىنداعى ەۆاكۋاتسيالىق پۋنكتتەرگە بارىپ، سونداي-اق، وبلىس ورتالىعىندا ساياجاي تۇرعىندارمەن كەزدەسكەن بولاتىن.
كەزدەسۋ بارىسىندا تابيعي اپات سالدارىنان كەلگەن شىعىنداردى وتەۋ مەحانيزمدەرىنە قاتىستى ساۋالدار كوتەرىلدى.
اتاپ وتەرلىگى، وسىعان دەيىن تۇراقتى نەگىزدە ساياجاي تۇرعىندارىمەن كەزدەسۋلەر وتكىزىلدى، الداعى ۋاقىتتا دا ءتۇسىندىرۋ جۇمىستارى جالعاساتىن بولادى.
