پرەزيدەنت قاسىم-جومارت توقاەۆ قازاقستاندىقتاردى وتان قورعاۋشى كۇنىمەن قۇتتىقتادى، دەپ حابارلايدى "ادىرنا" ۇلتتىق پورتالى.
مەملەكەت باسشىسى ەل بەيبىتشىلىگىن ساقتاپ، قاۋىپسىزدىكتى قورعاعان وتان قورعاۋشىلاردى مەرەكەمەن قۇتتىقتاپ، ساپ تۇزەگەن ازاماتتارعا زور دەنساۋلىق تىلەدى.
"قادىرلى وتانداستار!
سىزدەردى وتان قورعاۋشى كۇنىمەن قۇتتىقتايمىن! ەلىمىزدەگى بەيبىتشىلىك پەن تىنىشتىقتى ساقتاپ، قاستەرلى قۇندىلىقتاردى ورنىقتىرا ءتۇسۋ ءۇشىن بۇل مەرەكەنىڭ ماڭىزى زور.
اسكەري بورىشتى وتەۋ وتانعا دەگەن شىنايى سۇيىسپەنشىلىكتىڭ جارقىن كورىنىسى ەكەنى انىق. حالىققا قالتقىسىز قىزمەت ەتۋ – ءاربىر ادال ازاماتتىڭ پەرزەنتتىك پارىزى.
قازاقستان ۇلتتىق مۇددەنى قورعاۋعا، اۋماقتىق تۇتاستىقتى ساقتاۋعا جانە تۇراقتىلىقتى قامتاماسىز ەتۋگە باسا ءمان بەرەدى. ايبىندى ارميامىز ەگەمەندىگىمىزدىڭ كەپىلى، مەملەكەتتىلىگىمىزدىڭ مىزعىماس تىرەگى سانالادى.
ءبىز اسكەرىمىزدىڭ الەۋەتىن وقۋ-جاتتىعۋ جيىندارىندا عانا ەمەس، ناقتى مىندەتتەردى جۇزەگە اسىرۋ بارىسىندا دا كورىپ ءجۇرمىز.
الاپات تاسقىن ەل-جۇرتقا قاۋىپ توندىرگەندە، ساربازدارىمىز الدىڭعى شەپتەن تابىلدى. ولار وزدەرىنە جۇكتەلگەن مىندەتتى ءمىنسىز اتقارىپ، وتانشىلدىقتىڭ وزىق ۇلگىسىن كورسەتتى.
ەلىمىزدىڭ قورعانىس قابىلەتىن كۇشەيتۋ جانە اسكەري قىزمەتكەرلەردى قولداۋ قاشاندا مەملەكەتتىك ساياساتتىڭ باسىم باعىتى بولىپ قالا بەرەدى.
قارۋلى كۇشتەرىمىزدىڭ مەرەيى ۇستەم بولسىن!
بارشاڭىزعا زور دەنساۋلىق، باق-بەرەكە تىلەيمىن!" - دەدى پرەزيدەنت ءوز قۇتتىقتاۋىندا.
1992 جىلى پرەزيدەنت جارلىعىمەن مەملەكەتتىك قورعانىس كوميتەتى قازاقستان رەسپۋبليكاسىنىڭ قورعانىس مينيسترلىگى بولىپ قايتا قۇرىلدى. قازاقستاننىڭ تۇڭعىش قورعانىس ءمينيسترى بولىپ گەنەرال-پولكوۆنيك ساعادات نۇرماعامبەتوۆ تاعايىندالدى.
1992 جىلى قر تۇڭعىش پرەزيدەنتى ن.ءا.نازارباەۆتىڭ جارلىعىمەن قازاقستان رەسپۋبليكاسىنىڭ قارۋلى كۇشتەرى قۇرىلدى.
