جالىندى جۋرناليست بولا تۇرا، عۇمىرىنىڭ كوپ بولىگىن رەداكتورلىققا ارناعان ەرجۇمان سمايىلدىڭ باسقا جۋرناليستەر ءتارىزدى جۇزدەگەن، مىڭداعان ماقالالارى جوق. گازەت ءۇشىن عالىمدىعىن قۇربان ەتكەن تالانتتى رەداكتور جزاعانى قۇتتى كۇندى قۇرعاتپاي ءباسپاسوز بەتىنەن كورىنىپ جاتقان سوڭ، كىتاپ شىعارايىن دەپ قۇلشىنا قويعان جوق. ءوزى شىققان تاۋ بيىك بولسىن دەپ، بويداعى بارىن، ويداعى ءنارىن ءوزى پۇشپاعىن يلەپ جۇرگەن باسىلىمعا بەرىپ، جۇيكەنىڭ ءسولىن، جۇرەكتىڭ جالىنىن سوعان توكتى. اردان اتتاماي، قوعامعا، زامانعا ساي قالتقىسىز قىزمەت ەتىپ، ازاماتتىڭ بورىشىن ادال اتقاردى. قىزمەت بابىندا زامان اعىمىنا ساي تالابى قاتال بولسا دا، ءتىرى پەندەگە قىلداي قيانات جاسامادى. دوسقا ادال، جاستارعا قامقور بولدى.
الايدا وقتى ءسوزدى ءبىر اتقاندا ءدال تيگىزەتىن قابىلەتى ونىڭ ءبىر ماقالاسىن توم-توم بولىپ جازىلعان كىتاپتاردان دا باعالى ەتەدى. اسقان جۋرناليستىك شەبەرلىكتىڭ ناتيجەسىندە جارىق كورگەن بىرەن-ساران ماقالالارى، كىتاپتارى جۋرناليست بولۋ ءۇشىن مىندەتتى تۇردە جازۋ كەرەكتىگىن العا تارتاتىن قاعيدانى جوققا شىعارادى.
زەينەتكە شىققانعا دەيىن جازعان جالعىز عانا «ءومىر دەگەن – جول ءۇستى» پروزالىق كىتابىنىڭ ءوزى ءپۋبليتسيستىڭ قالامى شىڭدالعانىنىڭ كۋاسى. بۇل كىتاپتى شەبەرلىك ساعاتتارىنىڭ جيىنى دەپ اتاۋعا دا بولادى. بۇگىندە ەسكىرگەن باسپا بەتتەرىندە ەل تاريحى مەن ءومىرىنىڭ جاڭا پاراقتارىندا قوعامىمىزعا قاجەتتى جۇيرىك وي مەن جاستارعا كەرەك ونەگەلى ءسوز قالدىرعان، شىندىقتىڭ ارتىنداعى كۇرەسكەرلەردىڭ ءبىرى بولعان ەرجۇمان وتەشۇلى ەڭبەگىنىڭ ءىزى قالدى.
بەكزات تۋلەپبەرگەنوۆ
