قوستانايلىق ازامات ۆەيپتەردى، اروماتيزاتورلار مەن سۇيىقتىقتاردى زاڭسىز اكەلىپ، تاراتقانى ءۇشىن جاۋاپقا تارتىلدى، دەپ حابارلايدى «ادىرنا» ۇلتتىق پورتالى.
افم مالىمەتىنە سايكەس، قوستاناي تۇرعىنى رەسەيدەن اتالعان زاتتى جەتكىزىپ، ولاردى قازاقستان اۋماعىندا Telegram ارناسى ارقىلى ساتقان.
شەتەل اسىپ كەلگەن ءونىمدى كۋرەرلەر مەن پوشتا ارقىلى ەلىمىزدىڭ تۇكپىر-تۇكپىرىنە جەتكىزىپ وتىرعان. تاۋاردى ساتىپ الۋ قۇنى 100 مىڭ تەڭگەدەن باستالىپ،تەك شەتەل ازاماتىنىڭ اتىنا تىركەلگەن بانك كارتاسى ارقىلى تولەنىپ وتىرعان. بۇل تىيىم سالىنعان ءونىمنىڭ زاڭسىز ساۋداسىن جاسىرۋ ماقساتىندا ۇيىمداستىرىلعان.
كۇدىكتىنىڭ ۇيىندە جۇرگىزىلگەن ءتىنتۋ بارىسىندا شامامەن 45 ميلليون تەڭگە تۇراتىن 7,5 مىڭعا جۋىق ۆەيپ تاركىلەندى. سوت ۇكىمىمەن ايىپتالۋشىعا 1 جىل مەرزىمگە بوستاندىعىن شەكتەۋ جازاسى تاعايىندالىپ، پروباتسيالىق باقىلاۋ ورناتىلدى. تاركىلەنگەن ۆەيپتەر جويىلاتىن بولدى.
تەرگەۋ ءىسى 17 قىركۇيەكتە قوستاناي وبلىسى پروكۋراتۋراسىنىڭ زاڭسىز ۆەيپ اكەلۋ مەن تاراتۋدى انىقتاۋىنان باستاۋ الدى.
