مينيسترلىك مالىمەتىنشە، ەڭ كوپ اقشالاي سىيلىقتى وليمپيادا، پاراليمپيادا جانە سۋردليمپيادا ويىندارىنىڭ چەمپيوندارى مەن جۇلدەگەرلەرى الادى. التىن جۇلدەگەر اتانعان سپورتشىلار مەن ولاردىڭ جاتتىقتىرۋشىلارىنا ارقايسىسىنا 250 000 دوللاردان بەرىلەدى، كۇمىس جۇلدە ءۇشىن 150 000 دوللاردان، قولا ءۇشىن 75 000 دوللاردان بەرىلەدى.
الەمدىك رەكورد ورناتقان كەز كەلگەن قازاقستاندىق سپورتشىعا مەملەكەتتەن اقشالاي سىياقى بەرىلەدى. رەكورد ورناتقان سپورتشى مەن ونىڭ جاتتىقتىرۋشىسى 5000 دوللار كولەمىندە سىياقى الادى.
ايتا كەتەيىك، حالىقارالىق وليمپيادا كوميتەتى سپورتشىلارعا اقشالاي سىيلىق تولەمەيدى. قاتىسۋشى ەلدەر عانا ءوز سپورتشىلارىن ماراپاتتايدى. ال قازاقستان سپورتشىلارىنا ەڭ كوپ سىياقى (التىنعا 250 000 دوللار) بەرەتىن ەلدەر تىزىمىندە.
سىياقى بويىنشا رەيتينگتىڭ كوشباسشىسى - سينگاپۋر، بۇل ەلدە چەمپيونعا ميلليون دوللارلىق چەك بەرىلەدى. الايدا، بۇل اقشاعا سالىق سالىنادى، قارجىنىڭ ءبىر بولىگى سپورتتى دامىتۋعا جانە كەيىنگى جاتتىعۋ شىعىندارىن جابۋعا جۇمسالادى.
ۇلىبريتانيادا، شۆەتسيادا، حورۆاتيادا، نورۆەگيادا جانە الەمنىڭ باسقا دا بىرقاتار ەلدەرىندە وليمپيادا جەڭىمپازدارىنا ەشتەڭە تولەنبەيدى. اقش-تا وليمپيادا چەمپيونى 37,5 مىڭ دوللار السا، رەسەيدە 54,5 مىڭ دوللار الادى. ال نيگەريا مەن سەنەگال ۇكىمەتتەرى جۇلدەلى سپورتشىلارىنا سيىر سىيعا تارتادى.
اينات قابيدۋللاەۆ