20 ءساۋىر كۇنى باستاۋ العان فۋتبولدان قازاقستان چەمپيوناتىنىڭ 5-تۋرى ءوز مارەسىنە جەتتى. قىزىققا تولى بولعان بۇل تۋردا فاۆوريت كوماندالار ءوز ارا باق سىنادى. Sportpress.kz سايتى قىسقاشا شولۋ جاساپ شىقتى.
«قايسار» - «اتىراۋ» 1:1
5-تۋردىڭ العاشقى ويىنى قىزىلوردادان باستاۋ الدى. ماتچتىڭ ءفاۆوريتى بولعان «اتىراۋ» بۇل جولى باسقا ويىن كورسەتتى. العاشقى گول ەكىنشى تايمنىڭ 53-مينۋتىندا سوعىلدى. گول اۆتورى «اتىراۋ» قورعاۋشىسى پەدرو ەۋجەنيۋ چەمپيوناتتاعى ءۇشىنشى گولىن سوقتى. ال 74-مينۋتتا «قايسار» كومانداسىنىڭ جارتىلاي قورعاۋشىسى ۆالەري گرومىكو چەمپيوناتتاعى العاشقى گولىن سوعىپ، ەسەپتى تەڭەستىردى. ماتچتىڭ 86-مينۋتىندا «اتىراۋلىق» يگور ساتاسەۆيچ قىزىل قاعازبەن جازالانىپ، ويىننان شەتتەتىلدى. وسىلايشا كۋمىكوۆ شاكىرتتەرى چەمپيوناتتاعى العاشقى ۇپايلارىن ەنشىلەدى.
«جەڭىس» - «تۇران» 1:0
«جەڭىستىڭ» كۇماندى جەڭىسى. قاراعاندى دا وتكەن بۇل ويىن دا گولدار سانى از بولسا دا، تارتىسقا تولى ءوتتى. العاشقى تايمنىڭ 29-مينۋتىندا «تۇران» ساپىنداعى فەدي بەن چۋگ گول سوققان ەدى. بىراق تورەشى VAR تەكسەرە كەلە ويىنشىنىڭ وفسايدتا قالعانىن ايتىپ، گولدى ەسەپكە الماي قويدى. «سەن سوقپاساڭ، مەن سوعامىن» دەپ، «جەڭىس» ويىنشىسى دەنيس گرەچيحو ويىننىڭ 38-مينۋتىندا ەسەپ اشىپ، كومانداسىن العا سۇيرەدى. قاراعاندىداعى تارتىستى ويىن وسىلايشا الاڭ يەلەرىنىڭ پايداسىنا شەشىلدى.
«ورداباسى» - «قىزىلجار» 1:1
تۋردىڭ قىزىقتى ويىندارىنىڭ ءبىرى شىمكەنتتە ءوتتى. ويىن باستالا سالىسىمەن فاۆوريتتەرگە قارسى دەس بەرمەي وينايتىن «قىزىلجار» تىزگىندى وزىنە الىپ، بىرنەشە رەت شايزادانىڭ قاقپاسىنا قاۋىپ ءتوندىردى. ويىننىڭ نەگىزگى ۋاقىتىنا ءۇش مينۋت قوسىلعان ساتتە كوماندا كاپيتانى ەۆگەني بەرەزكين گول سوعىپ، كوماندانى العا سۇيرەدى. ەكىنشى تايم باستالا سالىسىمەن 52-مينۋتتا بۇرىشتامادان اسحات تاعىبەرگەننىڭ اسىرعان پاسىن سەرگەي مالىي بويشاڭدىعىن پايدالانىپ گول سوقتى. ال 65-مينۋتتا «قىزىلجاردىڭ» پورتۋگالدىق ويىنشىسى رۋبەن بريجيدۋ بۇرىشتامادان گول سوعىپ ەدى، تورەشى ەسەپكە المادى. ءبىر قىزىعى ويىنداعى بارلىق گول بۇرىشتامادان ورىندالدى. اليەۆ شاكىرتتەرى وسىلايشا تاڭعالدىرۋدى جالعاستىرۋدا.
«قايرات» - «اقتوبە» 1:3
قىزىققا تولى ءارى وسى تۋردىڭ ورتالىق ويىنى الماتىدا بولدى. ويىن الدىندا «قايرات» فۋتبول كلۋبى 70 جىلدىقتارىن اتاپ ءوتتى. سونىمەن قاتار كورەرمەن جيناۋ بويىنشا وسى ماۋسىمداعى رەكوردتى ورناتتى. بۇل ويىندى تاماشالاۋعا 23 804 جانكۇيەر جينالعان.
ال ويىنعا كەلەر بولساق، «اقتوبە» كومانداسى ماتچ باستاۋ الىسىمەن «قايرات» قورعاۋشىلارىن ءبىراز ابىگەرگە سالدى. 40-مينۋتتا «قايرات» قورعاۋشىلارىنىڭ ءبىرى قولمەن ويناپ قاقپاعا پەنالتي بەلگىلەندى. ون ءبىر مەترلىك ايىپ دوپتى «اقتوبە» ساپىنان الىبەك قاسىم تەۋىپ، ەسەپ اشتى. ايتا كەتەيىك، الىبەك قاسىم وتكەن «جەتىسۋمەن» (1:0) بولعان ويىننان كەيىن، «بارلىق گولداردى «قايراتقا» قالدىردىق» دەپ سۇحبات بەرگەن بولاتىن. ال 68-مينۋتتا اقتوبەلىك ماكسيم سامورودوۆ گول سوعىپ ەسەپتى ەسەلەدى. وسى ساتتەن كەيىن الماتىلىق ۇجىم قۇرامعا وزگەرىس ەنگىزىپ، ويىنشىلاردى الماستىردى. 92-مينۋتتا دميتري بەسسمەرتنىي اسىرعان پاستى ماكسيم سامورودوۆ تاعى دا ءساتتى پايدالانىپ، دۋبل اۆتورى اتاندى. ويىننىڭ سوڭعى مينۋتىندا «قايرات»شابۋىلشىسى ۆياچەسلاۆ شۆىرەۆ گول سوعىپ، ەسەپ ايىرماسىن قىسقارتتى. وسىلايشا «اقتوبە» سىرت الاڭدا «قايراتتى» 9-جىلدان كەيىن ءبىر-اق جەڭدى.
«استانا» - «توبىل» 2:2
تۋردىڭ كەزەكتى ورتالىق ماتچى تاعى دا الماتى دا ءوتتى. قوس كوماندا تاراپىنان بىرنەشە قاۋىپتى شابۋىلدار ورىن الىپ، سۇراپىل ويىن كورسەتتى. ماتچ باستالا سالىسىمەن 13-مينۋتتا «توبىل» قورعاۋشىسى پاپ-اليۋن نديايە گول سوعىپ، ەسەپ اشتى. ماتچتىڭ 27-مينۋتىندا مارين توماسوۆ «استانا» ساپىنداعى ءجۇزىنشى گولىن سوعىپ، ەسەپتى تەڭەستىردى. ەكىنشى تايمنىڭ سوڭىنا قاراي كوماندالاردىڭ شابۋىلى ودان ءارى كۇشەيە ءتۇستى. 78-مينۋتتا قوستانايلىق كوماندانىڭ شابۋىلشىسى داۆيد ەنەن گول سوعىپ ەسەپتى 1:2-گە جەتكىزدى. ال 93-مينۋتتا «استانا» كلۋبىنىڭ شابۋىلشىسى ستانيسلاۆ باسمانوۆ ەسەپتى تەڭەستىردى. سونىمەن قاتار، سوڭعى مينۋتتا «توبىل» ويىنشىسى رۋسلان ءۆاليۋلليننىڭ گولىن تورەشى ەسەپكە المادى. قوس كوماندا ءبىر-ءبىر ۇپايدان ەنشىلەپ، جەڭىمپازدى انىقتاي المادى.
«جەتىسۋ» - «شاحتەر» 1:0
تالدىقورعاندا وتكەن ويىندا الاڭ يەلەرى ءبىر باس جوعارى بولدى. ويىننىڭ ءبىرىنشى تايمىنىڭ 48-مينۋتىندا سەرىكجان مۇجىقوۆ پەنالتيدەن گول سوقتى. قوس كوماندا تاراپىنان وزگە گولداردى كورە المادىق. جالپى «شاحتەر» كومانداسىن اندرەي فينونچەنكو ءوز تىزگىنىنە العالى بەرى، ويىن جاعىنان ۇلكەن وزگەرىستەر بار. قاراعاندىلىقتار بۇل ويىندا جەڭىلسە دە، تاماشا ويىن ورنەگىن كورسەتتى.
5-تۋر ويىندارىنان كەيىن تۋرنيرلىك كەستە مىناداي:
1) اقتوبە 10ۇ
2) قىزىلجار 8ۇ
3) ورداباسى 8ۇ
4) توبىل 8ۇ
5) قايرات 8ۇ
6) استانا 7ۇ
7) ەلىماي 7ۇ
8) جەتىسۋ 7ۇ
9) جەڭىس 6ۇ
10) اتىراۋ 4ۇ
11) تۇران 4ۇ
12) شاحتەر 3ۇ
13) قايسار 1ۇ
(ۇ-ۇپاي)
اينات قابيدۋللاەۆ
