20 Sáýir kúni bastaý alǵan fýtboldan Qazaqstan Chempıonatynyń 5-týry óz máresine jetti. Qyzyqqa toly bolǵan bul týrda favorıt komandalar óz ara baq synady. Sportpress.kz saıty qysqasha sholý jasap shyqty.
«Qaısar» - «Atyraý» 1:1
5-týrdyń alǵashqy oıyny Qyzylordadan bastaý aldy. Matchtyń favorıti bolǵan «Atyraý» bul joly basqa oıyn kórsetti. Alǵashqy gol ekinshi taımnyń 53-mınýtynda soǵyldy. Gol avtory «Atyraý» qorǵaýshysy Pedro Eýjenıý chempıonattaǵy úshinshi golyn soqty. Al 74-mınýtta «Qaısar» komandasynyń jartylaı qorǵaýshysy Valerıı Gromyko chempıonattaǵy alǵashqy golyn soǵyp, esepti teńestirdi. Matchtyń 86-mınýtynda «Atyraýlyq» Igor Satasevıch qyzyl qaǵazben jazalanyp, oıynnan shettetildi. Osylaısha Kýmykov shákirtteri chempıonattaǵy alǵashqy upaılaryn enshiledi.
«Jeńis» - «Turan» 1:0
«Jeńistiń» kúmándi jeńisi. Qaraǵandy da ótken bul oıyn da goldar sany az bolsa da, tartysqa toly ótti. Alǵashqy taımnyń 29-mınýtynda «Turan» sapyndaǵy Fedı Ben Chýg gol soqqan edi. Biraq tóreshi VAR teksere kele oıynshynyń ofsaıdta qalǵanyn aıtyp, goldy esepke almaı qoıdy. «Sen soqpasań, men soǵamyn» dep, «Jeńis» oıynshysy Denıs Grechıho oıynnyń 38-mınýtynda esep ashyp, komandasyn alǵa súıredi. Qaraǵandydaǵy tartysty oıyn osylaısha alań ıeleriniń paıdasyna sheshildi.
«Ordabasy» - «Qyzyljar» 1:1
Týrdyń qyzyqty oıyndarynyń biri Shymkentte ótti. Oıyn bastala salysymen favorıtterge qarsy des bermeı oınaıtyn «Qyzyljar» tizgindi ózine alyp, birneshe ret Shaızadanyń qaqpasyna qaýip tóndirdi. Oıynnyń negizgi ýaqytyna úsh mınýt qosylǵan sátte komanda kapıtany Evgenıı Berezkın gol soǵyp, komandany alǵa súıredi. Ekinshi taım bastala salysymen 52-mınýtta buryshtamadan Ashat Taǵybergenniń asyrǵan pasyn Sergeı Malyı boıshańdyǵyn paıdalanyp gol soqty. Al 65-mınýtta «Qyzyljardyń» portýgaldyq oıynshysy Rýben Brıjıdý buryshtamadan gol soǵyp edi, tóreshi esepke almady. Bir qyzyǵy oıyndaǵy barlyq gol buryshtamadan oryndaldy. Alıev shákirtteri osylaısha tańǵaldyrýdy jalǵastyrýda.
«Qaırat» - «Aqtóbe» 1:3
Qyzyqqa toly ári osy týrdyń ortalyq oıyny Almatyda boldy. Oıyn aldynda «Qaırat» fýtbol klýby 70 jyldyqtaryn atap ótti. Sonymen qatar kórermen jınaý boıynsha osy maýsymdaǵy rekordty ornatty. Bul oıyndy tamashalaýǵa 23 804 jankúıer jınalǵan.
Al oıynǵa keler bolsaq, «Aqtóbe» komandasy match bastaý alysymen «Qaırat» qorǵaýshylaryn biraz ábigerge saldy. 40-mınýtta «Qaırat» qorǵaýshylarynyń biri qolmen oınap qaqpaǵa penaltı belgilendi. On bir metrlik aıyp dopty «Aqtóbe» sapynan Álibek Qasym teýip, esep ashty. Aıta keteıik, Álibek Qasym ótken «Jetisýmen» (1:0) bolǵan oıynnan keıin, «barlyq goldardy «Qaıratqa» qaldyrdyq» dep suhbat bergen bolatyn. Al 68-mınýtta aqtóbelik Maksım Samorodov gol soǵyp esepti eseledi. Osy sátten keıin almatylyq ujym quramǵa ózgeris engizip, oıynshylardy almastyrdy. 92-mınýtta Dmıtrıı Bessmertnyı asyrǵan pasty Maksım Samorodov taǵy da sátti paıdalanyp, dýbl avtory atandy. Oıynnyń sońǵy mınýtynda «Qaırat»shabýylshysy Vıacheslav Shvyrev gol soǵyp, esep aıyrmasyn qysqartty. Osylaısha «Aqtóbe» syrt alańda «Qaıratty» 9-jyldan keıin bir-aq jeńdi.
«Astana» - «Tobyl» 2:2
Týrdyń kezekti ortalyq matchy taǵy da Almaty da ótti. Qos komanda tarapynan birneshe qaýipti shabýyldar oryn alyp, surapyl oıyn kórsetti. Match bastala salysymen 13-mınýtta «Tobyl» qorǵaýshysy Pap-Alıýn Ndıaıe gol soǵyp, esep ashty. Matchtyń 27-mınýtynda Marın Tomasov «Astana» sapyndaǵy júzinshi golyn soǵyp, esepti teńestirdi. Ekinshi taımnyń sońyna qaraı komandalardyń shabýyly odan ári kúsheıe tústi. 78-mınýtta Qostanaılyq komandanyń shabýylshysy Davıd Enen gol soǵyp esepti 1:2-ge jetkizdi. Al 93-mınýtta «Astana» klýbynyń shabýylshysy Stanıslav Basmanov esepti teńestirdi. Sonymen qatar, sońǵy mınýtta «Tobyl» oıynshysy Rýslan Valıýllınniń golyn tóreshi esepke almady. Qos komanda bir-bir upaıdan enshilep, jeńimpazdy anyqtaı almady.
«Jetisý» - «Shahter» 1:0
Taldyqorǵanda ótken oıynda alań ıeleri bir bas joǵary boldy. Oıynnyń birinshi taımynyń 48-mınýtynda Serikjan Mujyqov penaltıden gol soqty. Qos komanda tarapynan ózge goldardy kóre almadyq. Jalpy «Shahter» komandasyn Andreı Fınonchenko óz tizginine alǵaly beri, oıyn jaǵynan úlken ózgerister bar. Qaraǵandylyqtar bul oıynda jeńilse de, tamasha oıyn órnegin kórsetti.
5-týr oıyndarynan keıin týrnırlik keste mynadaı:
1) Aqtóbe 10u
2) Qyzyljar 8u
3) Ordabasy 8u
4) Tobyl 8u
5) Qaırat 8u
6) Astana 7u
7) Elimaı 7u
8) Jetisý 7u
9) Jeńis 6u
10) Atyraý 4u
11) Turan 4u
12) Shahter 3u
13) Qaısar 1u
(U-upaı)
Aınat QABIDÝLLAEV
