قاراعاندى وبلىسىندا جۇك كولىگى مەن جەڭىل كولىك سوقتىعىسىپ، بەس ادام قازا تاپتى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
وقيعا 3 مامىردا تاڭەرتەڭ شەت اۋدانى، اقسۋ اۋىلى ماڭىنداعى تاسجولدا بولعان. Renault Magnum جۇك كولىگى Toyota Camry كولىگىمەن سوقتىعىسقان. سوقتىعىس سالدارىنان Toyota Camry جۇرگىزۋشىسى مەن ونىڭ ءتورت جولاۋشىسى قازا تاپتى. اۋىر جۇك كولىگىنىڭ جۇرگىزۋشىسى مەديتسينالىق مەكەمەگە جاتقىزىلدى.
پوليتسيا وقيعا ورنىنان تۇسىرىلگەن ۆيدەونى كورسەتتى. كادردا جۇك كولىگى اۋدارىلىپ، قاۋىپسىزدىك جاستىقتارى جارىلعان جەڭىل كولىكتى كورۋگە بولادى.
"اتالعان فاكت بويىنشا قىلمىستىق ءىس قوزعالدى، بارلىق قاجەتتى تەرگەۋ ارەكەتتەرى جۇرگىزىلىپ جاتىر. قىلمىستىق ءىستى قاراۋ بارىسىندا وقيعانىڭ ءمان-جايى مەن كىنالى انىقتالادى. قاراعاندى وبلىسىنىڭ پوليتسيا دەپارتامەنتى جۇرگىزۋشىلەردەن جولداردا مۇقيات بولۋدى، جىلدامدىق رەجيمىنەن اسپاۋدى، جول قوزعالىسى ەرەجەلەرىن مۇلتىكسىز ساقتاۋدى سۇرايدى", - دەدى قاراعاندى وبلىسى پد باستىعىنىڭ ءبىرىنشى ورىنباسارى قۇرمانعالي يسماعۇلوۆ جۇرگىزۋشىلەردى.
