ۇيىڭىزدەگى ساندىقتا ءسىز بىلمەيتىن سىر بار...

3208
Adyrna.kz Telegram

ساندىعى جوق ۇيدە نە بولمايتىنىن بىلەسىز بە؟ سەنەسىز بە؟ ءبىزدىڭ ۇيدە قايىڭ اعاشىنان جاسالعان، سىرتىنان تەمىر قاپتالىپ، مىس جاپسىرمامەن ويۋ-ورنەكتەر سالىنعان 6 بىردەي ساندىق بار. ءبىر ساندىقتىڭ تومەنگى جاعىنا ۇلكەن اعامنىڭ ەسىمى جازىلعان. بۇل كونەرگەن زاتتار ءبىر بولمەنى مەنشىكتەپ تۇر. اپتاسىنا ءبىر رەت كىرىپ كىلەمىن تازالاپ، ەدەنىن ءسۇرتىپ قويماساق، باسقا كۇندەرى جان بالاسى كىرمەيدى. وتكەندە ۇيدە كىشىگىرىم جوندەۋ جۇمىستارى جۇرگىزىلگەندە جەڭگەم ەكەۋمىز بولمەلەردىڭ ورنىن اۋىستىرىپ وزگەرىس جاساعىمىز كەلدى. اتا-انام دەمالىسقا كەتكەن-تۇعىن. ولاردىڭ كەلۋىنە توسىن سىي جاساماقشى بولدىق. ءسويتىپ انامنان باسقانى قىزىقتىرمايتىن الگى ساندىقتاردى سۇيرەپ ءجۇرىپ جەرتولەگە تۇسىردىك. التاۋىنىڭ دا ءىشى تولا، اۋىر، ەسىگىندە قارا قۇلىپ تۇر. ول بولمەگە جەڭگەمنىڭ جاتىن بولمەسىندەگى زاماناۋي ۇلگىدە جاسالعان ساندىقتارىن شىعارىپ، جۇكتى جينادىق. ءبىر جۇمادان سوڭ كەلگەن انام توسىنسىيىمىزدىڭ تاس تالقانىن شىعاردى. تەز ارادا ساندىقتى ءوز ورنىنا الىپ كەلۋىمىزدى تاپسىردى. مەن دە، جەڭگەم دە سەبەبىن سۇراماي ايتقانىن ىستەدىك. كەشكىسىن اشۋى باسىلعان سوڭ ءمان-جايدى سۇراعانىمىزدا مىناداي قىزىق مالىمەتتەرگە قانىق بولدىق. «اينالايىندارىم-اۋ» دەپ باستادى اڭگىمەسىن...

– قانداي انا بولسا دا ۇزاتىپ جاتقان قىزىنا مىندەتتى تۇردە ساندىق الادى. بۇرىندارى 2 ۇلكەن، 1 كىشكەنتاي ساندىق بەرەتىن. ۇلكەن ساندىقتىڭ بىرەۋىنە جۇك سالاتىن، ەكىنشىسىنە كيىم-كەشەك سالاتىن دا، كىشىسىنە شاي، تاتتىلەر، كامپيت سەكىلدى زاتتاردى سالاتىن. جاڭا كەلىننىڭ جۇگىن كورۋگە اۋىلداعى بۇكىل ايەلدەر جينالاتىن. «ساندىق اشار» سالتىن جاساپ، كەلىن تۇسىرگەن ءۇي داستارحان جازاتىن. ساندىق اشاتىن كىسىگە دە قىزدىڭ اناسى ارنايى ماتا سالاتىن. بۇل سىيدى الۋدىڭ وزىنە اۋىل ايەلدەرى تالاسادى. كەلىننىڭ ارتىنان كەلگەن جۇكتى ماقتاسا جاڭا قۇداعيدىڭ مەرەيى وسەدى، سىناسا كەلىن قامىعىپ قالاتىن. قىزىنىڭ قامىقپاۋىن، رەنجىمەۋىن قالاعان انا ساندىق بەرۋگە ۇمتىلادى. قىز ءۇشىن ەڭ قادىرلىسى دە، كيەلىسى دە ساندىق بولادى. بايقاساڭدار ساندىق پەن بەسىكتى قانشا توزسا دا سىرتقا شىعارعام جوق. بۇل قاسيەتتى زاتتار انامنىڭ كوزى، ىشىندەگى زاتتار جاستىق شاعىمنىڭ ەستەلىگى. سوندىقتان دا كوزىمنىڭ قاراشىعىنداي ساقتايمىن. كوزىم كەتكەن سوڭ نە ىستەسەڭدەر ءوز ەرىكتەرىڭدە. ال قازىرشە ەشقايسىسىڭ ءتيىسۋشى بولماڭدار، - دەدى انام كوزىنە جاس الىپ.

ءيا، ساندىقتىڭ قازاق ءۇشىن ماڭىزى زور. ونى ءاربىر ءۇيدىڭ تورىنەن ورىن العان ساندىقتار-اق سايراپ ايتىپ تۇرعانداي. ءسىز ۇيىڭىزدەگى نەمەسە جەرتولەڭىزدەگى ساندىقتىڭ ءىشىن اشىپ كورىڭىزشى. جوق دەگەندە شاپان مەن ماتا تاباسىز. بۇرىنعى اجەلەرىمىز، اپالارىمىز «قۋىس ۇيدەن قۇر شىقپا» دەگەندى قاتتى ۇستانعان. سول ءۇشىن دە ساندىقتى ماتاعا، سۇلگىگە، كۇمىس جۇزىك پەن بىلەزىككە تولتىرعان. ونىڭ ىشىنەن باتا بەرگەن اقساقالعا شاپان، اس جەۋگە كەلگەن قۇدايى قوناققا كويلەك، ءسۇيىنشى سۇراپ كەلگەن بالاعا بالا كويلەك، قۇداعا كيىت تابىلادى. ...ساندىقتىڭ ءيىسىنىڭ ءوزى بالا كۇنىڭدى كوز الدىڭا كەلتىرەدى. قوناققا باراتىن كەزدە انامىز ساندىقتى اشىپ جىبەرىپ، ءبىر ماتانى سۋىرىپ الاتىن دا ءبىر ءتۇننىڭ ىشىندە ادەمى كويلەكتى تىگىپ بەرە قوياتىن. جاڭا كيىم كيگەنگە ءماز بولىپ، قىدىراتىنبىز. ساندىقتىڭ ءوزى جاي ۋاقىتتا اشىلمايدى. ساندىق اشىلعان كۇنى ۇيگە قوناق كەلەدى نەمەسە ءوزىمىز قوناققا بارامىز. ەڭ قۇندى زاتتارىمىز ساندىقتا ساقتالاتىن. قاتار تىزىلگەن ساندىق تۇرسا، ونىڭ ۇستىندە ءيىن تىرەسكەن توسەك جينالسا كەرەمەت ەمەس پە؟! قازىرگى جاستار كەلەتىن قوناققا كورپەشە توسەگەنىمەن، جاتاتىن كەزدە توسەك جەتكىزە الماي ابدىراپ قالادى. مۇنى قالا تۇرماق، اۋىلدان دا كورىپ ءجۇرمىز. ۇيىنە 4-5 كىسى كەلسە كورشى-قولاڭنىڭ كورپەشەسىنە جۇگىرەتىن كورشىلەرىمىز دە جوق ەمەس. ساندىق ۇيىڭە سىن بولمايدى، كەرىسىنشە ءسان بولادى. ساندىعى بار ۇيگە قۇت كىرەدى، بەرەكە بولادى. ال بۇگىندە ساندىقتىڭ ورنىن شيفونەرمەن الماستىرعانداردى دا كورىپ ءجۇرمىز. ەح، مۇنى تۇسىنەتىن جاستار قايدا؟!، - دەپ كۇرسىندى انام. مىنا ارەكەتىممەن انامنىڭ بالالىعىن ۇرلاعانىما، جۇرەگىن اۋىرتىپ، رەنجىتكەنىمە قاتتى وكىندىم.

 اسىل ارمان

"ادىرنا" ۇلتتىق پورتالى

پىكىرلەر