بۇرىنعى كۇيەۋىنىڭ قولىنان قازا تاپقان ايەلدىڭ تۋىستارى ءوز ىسىنە نەمقۇرايلى قاراعان پوليتسەيلەردى دە جازالاۋدى سۇرايدى، دەپ حابارلايدى "ادىرنا" ۇلتتىق پورتالى.
قاراعاندىلىق گۇلميرا تايماسوۆانىڭ تۋىستارى ءمان-جايدى اشىپ ايتقان.
مارقۇمنىڭ اپكەسى ايگۇل ومىرزاقوۆا ءولىم بولعان كۇنى ءتارتىپ ساقشىلارى كۇدىكتىنى الىپ كەتكەندە قايعىلى وقيعانىڭ الدىن الۋعا بولاتىنىن ايتادى.
"سول كۇنى كەشكە اكەسىنىڭ اناسىن ۇرىپ جاتقانىن كورىپ، ۇلى پوليتسيا شاقىردى. پوليتسيا قىزمەتكەرلەرى كەلدى، مارقۇم بۇل ادامنان 30 كۇن بويى قورعاۋدى سۇراپ ءوتىنىش جازعان. بىراق ولار ءوتىنىش جازدىرىپ العانىمەن، كۇيەۋىن وزدەرىمەن بىرگە الىپ كەتپەدى. ءسىڭىلىم وزدەرىمەن الىپ كەتۋىن وتىنگەن. پوليتسيا كەتكەننەن كەيىن ەكى ساعاتتىڭ ىشىندە كۇيەۋى ونى ءولتىردى. ول ءسىڭىلىمدى ۇنەمى ۇرىپ-سوعىپ، قورقىتىپ، بالالاردى شوشىتىپ كەتەتىن. قانشا شاعىم جازسا دا ءبىر دە ءبىر رەت جازالانعان جوق. 2022 جىلى مەن ونىڭ ۇرىپ-سوعىپ جاتقانىن كورگەنمىن، سول كەزدە ءسىڭىلىمدى قولداعانىم ءۇشىن مەنى قوسا ۇرىپ تاستاعان. مۇنىڭ ءبارى بالالار مەن مەنىڭ قىزىمنىڭ كوز الدىندا بولدى. سودان كەيىن مەن دە ونىڭ ۇستىنەن ارىز جازدىم. ۇرىپ-سوققان جەرلەرىمدى دالەل رەتىندە كورسەتتىم. باستاپقىدا ءىستى سوزىپ ءجۇردى، كەيىن توقتاتىپ تاستادى. ءبىز ونىمەن تاتۋلاسقان جوقپىز، بىراق ول جاۋاپقا تارتىلعان جوق. قازىر ءبىز پروكۋراتۋراعا دەيىن بارىپ، اپكەمىزدى قورعاپ قالماعانىمىزعا وكىنەمىز", – دەيدى ايگۇل ومىرزاقوۆا.
مارقۇم گۇلميرا تايماسوۆا اسحانادا جۇمىس ىستەسە، ونىڭ ولىمىنە كۇدىكتى دەپتانىلعان ەكس-جۇبايى جۇك كولىگىنىڭ جۇرگىزۋشىسى بولعان. ەرلى-زايىپتىلار 10 جىل بۇرىن اجىراسسا دا بىرگە تۇرىپ كەلگەن. مارقۇمنىڭ اناسى كۇيەۋ بالاسىنىڭ تۇزەلەتىنىنە سەنگەنىن ايتادى.
"مەن ونىڭ قىزىمدى ۇراتىنىن بىلەتىنمىن. ءبىر كەزدەرى ءبىراز ۋاقىت ءبىزدىڭ قولىمىزدا تۇردى، سول كەزدە كۇيەۋ بالام ءتىپتى مەنى دە ۇرىپ تاستاعان. ول وتە اشۋشاڭ بولدى. مەن قىزىمنان “شىداپ جۇرە بەرەسىڭ بە” دەپ سۇراعانىمدا "بالالار ءوسىپ كەلەدى، وزگەرەتىن شىعار. ولاردى اياققا تۇرعىزۋ جالعىز وزىمە قيىن بولادى” دەيتىن. سوڭعى جىلدارى ەكەۋى ۇرسىسپاسىن دەپ ۇيىلەرىنە بارۋدى قويدىم. ونىڭ ۇستىنە قىزىم كەيىنگى كەزدە كۇيەۋىنەن قورقاتىنىن ءجيى ايتاتىن. كۇيەۋى “ولتىرەمىن” دەگەن ءسوزدى ءجيى ايتتى. قىزىمدى عانا ەمەس، بالالاردى دا ولتىرەمىن دەپ قورقىتاتىن. سوڭعى ايدا ول جۇمىسىنان دا شىعىپ قالدى، ۇيدە بوس جاتتى. ۇيدە جاتىپ ءىشىپ، كەشكە دەيىن جانجال شىعارادى. سول كۇنى كەشكە ءبىر نارسە بولاتىنىن جۇرەگىم سەزدى. نەمەرەمە قوڭىراۋ شالىپ ەدىم، ول مەن ۋايىمدايدى دەدى مە، الدە اكەسى ماعان تيىسەدى دەدى مە ەشتەڭە ايتپادى", – دەدى مارقۇمنىڭ اناسى رىسبالا ومىرزاقوۆا.
مارقۇمنىڭ بالالارى قازىر ناعاشىلارىنىڭ قولىندا. ولارعا ارنايى پسيحولوگ كومەك كورسەتىپ جاتقانى حابارلاندى.
