بۇرىنعى ىشكى ىستەر ءمينيسترى ۇستالعانىن باس پروكۋراتۋرا راستادى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەپ.
باس پروكۋراتۋرا قازاقستاننىڭ بۇرىنعى ىشكى ىستەر ءمينيسترى ەرلان تۇرعىمباەۆتىڭ ۇستالعانىن راستادى.
«قازاقستان رەسپۋبليكاسىنىڭ باس پروكۋراتۋراسى 2022 جىلعى قاڭتار وقيعاسىنا قاتىستى قىلمىستىق ىستەردى تەرگەۋدى جالعاستىرۋدا. 29 ساۋىردە لاۋازىمدىق وكىلەتتىكتەرىن اسىرا پايدالانعان بۇرىنعى ىشكى ىستەر ءمينيسترى ە.ز.تۇرعىمباەۆ قر قك 128-بابىنا سايكەس قاماۋعا الىندى. قىلمىستىق ىستە مەملەكەتتىك قۇپيانى قۇرايتىن مالىمەتتەر بار ەكەنىن ەسكەرە وتىرىپ، سوتقا دەيىنگى تەرگەپ-تەكسەرۋدىڭ باسقا دەرەكتەرى جاريا ەتىلمەيدى»، - دەپ حابارلادى سەيسەنبىدە باس پروكۋراتۋرانىڭ ءباسپاسوز قىزمەتى.
ەكس-ءمينيستردىڭ قاڭتارداعى قايعىلى وقيعاعا بايلانىستى قىلمىستىق ءىس بويىنشا ۇستالعانىن Nege.kz باسىلىمى مالىمدەگەن.
«بىزدەگى دەرەككوزدىڭ حابارلاۋىنشا، دۇيسەنبى كۇنى بۇرىنعى ىشكى ىستەر ءمينيسترى ەرلان تۇرعىمباەۆ ۇستالدى. مۇنداي شەشىمدى ارنايى پروكۋرورلار تۇرعىمباەۆقا قاتىستى 2022 جىلعى قاڭتارداعى قايعىلى وقيعاعا بايلانىستى قىزمەتتىك وكىلەتتىگىن اسىرا پايدالانۋ بابى بويىنشا قوزعالعان قىلمىستىق ءىس اياسىندا شىعاردى»، - دەلىنگەن اقپاراتتا.
2022 جىلى قاندى قانتارداعى جاعدايدان كەيىن ەرلان تۇرعىمباەۆ ىشكى ىستەر ءمينيسترى قىزمەتىنەن بوساتىلىپ، پرەزيدەنتتىڭ كەڭەسشىسى بولىپ تاعايىندالعان. كەيىن ول شىۇ ايماقتىق تەرروريزمگە قارسى قۇرىلىم باسشىسىنىڭ كەڭەسشىسى بولىپ تاعايىندالدى.
