ل ي ف ت (دراما)

206

كەيىپكەرلەر: 
قىز
حاتشى
ايداۋىل
ايەل
ەركەك

دابىرلاسا سويلەسكەن حاتشى مەن ايداۋىل، ليفتكە ەنەدى. ارتىنشا ايەل، ەركەك مىنەدى. ايداۋىل ەندى تەتىگىن باسا بەرگەندە اسىعا جۇگىرگەن قىز، ەنتىگەن ەنەدى.

قىز. ستوپ، ستوپ؟! مەنى دە الا كەتىڭىزدەر؟!
ايداۋىل. دەر كەزىندە ۇلگەردىڭىز. سىزگە قاي ەتاج كەرەك ەدى؟!
قىز. سول جاعىن بىلمەيدى ەكەنمىن...سوت وتىراتىن ەتاجى كەرەك.
حاتشى. (تەتىكتەن سان تەرىپ) مەنىڭ ەتاجىما باراتىن بولدىڭىز... 7 ەتاج...
قىز. ا؟..راحمەت...
(قىزعا ورىن بەرمەك بولىپ ىسىرىلعان ەركەك، تەڭسەلىپ كەتىپ ايەلدىڭ اياعىن باسىپ كەتەدى.)
ايەل. اي؟! كوزىڭىزگە قاراساڭىزشى؟!
ەركەك. كەشىرىڭىز؟..مىنا كىسى قىسىلىپ قالماسىن دەپ...
ايەل. ەركەكپىسىڭ دەگەن؟! جاس قىزعا كەرەك ورىن – ماعان كەرەك ەمەس دەپ كىم ايتتى؟!
قىز. ماعان بولا داۋلاسپاڭىزدارشى...(ەركەككە) راحمەت...
ەركەك. وقاسى جوق...ارزىمايدى...
ايەل. ەي، رومانتيك...شامالى جيناقى تۇرىڭىزشى؟!
ەركەك. كەشىرىڭىز...بارىم وسى...
ء(سال جۇرگەننەن كەيىن ليفت كىدىرىپ بارىپ، توقتاپ قالادى.)
ايەل. نە؟! مىنا ليفت توقتاپ قالدى ما نە؟!
ەركەك. كورمەي تۇرسىز با؟!
ايداۋىل. تۋھ، وسى ءليفتى ەش جولعا قويمادى-اۋ؟! جۇيكەمدى جۇقارتقانىنا،
باقانداي ءبىر اي بولدى.
حاتشى. ە...وزدەرى مىنبەيتىن بولعان سوڭ، باستىقتارعا ءبارى-ءبىر...
ايەل. نەمەنە، باستىقتارىڭىز جوعارعى ەتاجعا ۇشىپ بارادى ما؟!
ايباۋىل. جوق، باستىقتاردىڭ ءليفتى بولەك. بۇل – كەلۋشىلەر مەن قاتارداعى قىزمەتكەرلەرگە ارنالعان.
ايەل. وڭباعاندار...ەڭ اقىرسى ليفتكە دەيىن ءبولىپ العان. ونسىز دا وسى جەرگە جەتىسكەننەن كەلمەيمىز، ەندى مىنە...(ساعاتىنا قاراپ) اھ!..سوتىمنىڭ باستالۋىنا نەبارى بەس-اق مينۋت قالىپتى؟! (ايداۋىلعا) انا تەتىكتەرىن جوندەپ باسساڭىزشى؟! تۇتىكپەن حابارلاسىڭىز؟!
ايداۋىل. ءسىزسىز دە بەلگى بەردىم...شىداي تۇرىڭىز...جۇرگىزىپ قالار.
قىز. ۋف؟! مەن ينتەرنەت ارقىلى قابىلداۋعا جازىلعان ۋاقىتىم بوپ قالدى. مىنا ءليفتتىڭ جۇرەتىن ءتۇرى بار ما؟!
ايەل. سونى ايتام-اۋ؟! ونسىز دا وتكەن جولى انا وڭباعاننىڭ كەسىرىنەن سوتتى بۇگىنگە اۋىستىرىپ ەدى...قاپ؟!
ەركەك. حانىمدار، سابىر ساقتاڭىزدار...سابىر...ءليفتىڭ توقتاپ قالعانىن تومەندە وتىرعان جاۋاپتى ادام ەندىگى بىلگەن بولار. سابىرمەن كۇتەيىك.
حاتشى. ءيا، سابىر ساقتاۋلارىڭىزدى وتىنەمىن...مەنىڭ دە سوت زالىنان كىرەتىن ۋاقىتىم بولدى. سىزدەردەن گورى – مەن اسىعىسپىن. سوندىقتان...
ايەل. ءجونسىز قاقىلداي بەرمەڭىزدەرشى؟! مەن عۇساپ كۇيىپ تۇرساڭىز، سابىر ساقتاماق تۇگىلى، «سابىر» ءسوزىنىڭ بار ەكەنىن ۇمىتار ەدىڭىز.
قىز. (تەلەفونىنىڭ ءوشىپ قالعانىنا تاڭ قالىپ) سىزدەردىڭ دە تەلەفوندارىڭىز ءوشىپ قالدى ما؟!
ەركەك پەن ايەل، دەرەۋ تەلەفوندارىنا ءۇڭىلىپ، ءوشىپ تۇرعانىن كورەدى.
ايەل. (تەلەفونىن شۇقىلاپ) جەتپەگەنى وسى ەدى...مىنا جەردە تەلەفون قابىلدامايدى ما نە؟!
حاتشى. ءيا...اۋرە بولماڭىزدار...ءبىز قازىر ەكى ورتادا كەپتەلىپ تۇرعاندىقتان، تەلەفون قابىلدامايدى.
قىز. فۋ؟! تىم قۇرىسا تەلەفونمەن ەسكەرتەيىن دەپ ەدىم؟..
ايەل. ء(ليفتىڭ تەتىكتەرىن سابالاپ) مىنا قۇرعىردىڭ قاي جەرى ىستەمەي تۇر ءوزى؟!
ايداۋىل. (ايەلدى توقتاتىپ) تيىسپەڭىز؟! سونشا سابالاپ سىزگە نە كورىندى؟! جۇرەتىن بولسا، ءسىزدىڭ توقپاعىڭىزسىز دا جۇرەتىن ەدى عوي. كۇتە تۇرىڭىز دەدىم عوي؟!
ايەل. مەن كۇتكەنمەن، ەگەر، انا سۋماقاي مەنى كەلمەدى دەپ، ارتىن ءبىر سيپاپ كەتىپ قالسا قايتەمىن؟!
ەركەك. تۋھ، كىمدى دە بولسا سۇلايتتىڭىز...
ايەل. ءبارى مىنا سەندەردىڭ كەسىرلەرىڭنەن!
ەركەك. كەشىرىڭىز، مەن سىزگە نە ىستەدىم؟!
ايەل. ءسىزدىڭ دە اليمەت تولەمەگەنىڭىز ءۇشىن سوتقا كەلە جاتقانىڭىزدى ءبىلىپ تۇرمىن.
ەركەك. ماسساعان؟! ءسىز نە، ساۋەگەيسىز بە؟!
ايەل. اليمەنتتەن قاشىپ جۇرگەن «قاشاق اكە» ەكەنىڭىزدى ءبىلۋ ءۇشىن ساۋەگەي بولۋدىڭ قاجەتى شامالى. ۇياتسىزدار؟! بالا تۋعىزعاندى بىلەسىڭدەر، باعۋعا كەلگەندە ات-توندارىڭدى الا قاشاسىڭدار. سەندەي اكەلەردى ءبىر ارالعا جيناپ، بەنزين قۇيىپ، كۇلى قالماستاي ورتەپ جىبەرسە عوي شىركىن؟!
حاتشى. فۋ؟! سونشالىق وشىگىپ؟!. ءسىز ءوزى تىم قاتىگەز ەكەنسىز؟! ادامعا سونشالىق وشىگۋگە بولا ما ەكەن؟!
ايەل. ءۇش بىردەي بالامەن كوشەدە قالساڭ، «جۇمساق» بولعانىڭدى كورەر ەدىم.
ايداۋىل. كەشىرىڭىز...تار ءليفتى مىنەزدەرىڭىزبەن تارىلتپاي، ءسال سابىرمەن ۇندەمەي تۇرا تۇرىڭىزدارشى؟!
ءجايسىز ۇنسىزدىك ورنايدى. ايداۋىل ءليفتىڭ تەتىكتەرىن تۇرتكىلەپ اۋرە. قىز، كوزدەرىن تارس جۇمىپ ساناماققا كىرىسەدى.
قىز. ءبىر، ەكى، ءۇشى، ءتورت، بەس، التى...
ايەل. قاراداي ساناماق ويناپ، ساعان نە كورىندى؟!
قىز. وي...كەشىرىڭىز...بالا كۇنگى ادەتىم...
ايەل. و، قۇداي...ادامنىڭ جانى ءبىر تارىنىڭ قاۋىزىندا تۇرسا، «بالالىق شاقپەن» وينايدى عوي؟!.
ەركەك. قاراداي جان-جاعىڭىزعا اشۋىڭىزدى شاشىپ تۇراتىن ادەتىڭىز جامان ەكەن؟!
ايەل. نەمەنە، مىنا تار ليفتتە مەنى تاربيەلەيىن دەپ پا ەدىڭ؟!
قىز. كەشىرىڭىزدەر؟!. مەن ءجاي...بالا كۇنىمنەن قاتتى قورىقسام...نە، قاتتى قينالعاندا كوزىمدى جۇمىپ، 100-گە دەيىن سانايتىن ادەتىم بار ەدى...قورقىنىشىڭ جوعالىپ، ۇرەيىڭ باسىلادى...كەشىرىڭىزدەر...
حاتشى. وقاسى جوق. بەكەرگە ايتىسقاننان – ساناماق ويناعان دۇرىس. قارسى بولماساڭىز، قوسىلا ساناۋىما بولادى. ءبىر، ەكى...
ايداۋىل. توقتاي تۇرىڭىزدار...شىنىمەن جاقسى بولسا، مەن دە ساناماققا قوسىلايىن. قانە، كەتتىك!..
قىز، حاتشى، ايداۋىل ساناماققا كىرىسەدى. ەركەك ءسال كىدىرىستەن سوڭ، قوسىلا سانايدى. تورتەۋى بىرتە-بىرتە كۇلە باستايدى. ايداۋىل، كوڭىلدەنگەنى سونشا، ءتۇرلى كۇلكىلى قاراكەتتەر جاساي باستايدى. وعان حاتشى مەن قىز قوسىلادى. تورتەۋى ءليفتىڭ تاۋقىمەتىن ۇمىتقانداي.
ايەل. و، قۇداي...ويلاماعان جەردەن جىندىحاناعا تاپ بولامىن دەپ ءۇش ۇيىقتاسام تۇسىمە كىرمەپتى؟!
ايداۋىل. حا-حا-حا؟! بۇدان بىلاي تاعى ءبىر كەپتەلىسكە ءتۇسىپ قالسام، ساناماق وينايتىن بولدىم.
حاتشى. قۇداي ساقتاسىن؟! «تۇسپەيىن!» دەپ تىلەسەڭشى؟!
قىز. (ايداۋىلعا) كەشىرىڭىز...جوبامدا وسىندا قىزمەتتەسىز عوي دەيمىن؟
ايداۋىل. ءيا...ايداۋىلمىن.
ايەل. ايداۋىل بولساڭ، مىنا ءليفتىڭدى تەزدەتىپ جۇرگىزدىر.
قىز. ايتايىن دەگەنىم، بويىڭىز ۇزىن ەكەن...مۇمكىن قولىڭىزدى بيىككە كوتەرسەڭىز تەلەفون ىستەپ كەتەر...مىنا تەلەفوندى جوعارى قاراي كوتەرەسىز بە؟!
ايداۋىل. ءجارايدى...اكەلىڭىز. (تەلەفوننان بايلانىس كورىندەيدى) فۋ...ءبارى-ءبىر كورىنبەيدى...جوبامدا، تولقىن قابىلدامايتىن تۇيىق قاپتالدا تۇرىپ قالدىق بىلەم...توقتاي تۇرىڭىز...بار!..جوق...وي، بار؟!
ايەل. «بار»-ىڭىز نە، «جوق»-ىڭىز نە؟! قايسى ءوزى؟! ەسى دۇرىس ادامنىڭ ءسوزىن ايتسڭىزشى؟!
ايداۋىل. (كۇلىمسىرەپ) انا...تۇپكىر جاعىنداعى بۇرىشتىڭ ەڭ بيىك جەرىنەن ۇستايتىن ءتارىزدى...
قولىنداعى تەلەفونمەن بايلانىس بەلگى بەرگەن تۇسقا جانتالاسا ۇمتىلا بەرگەندە قىزدى قاعىپ كەتەدى. اڭداۋسىز تۇرعان قىز ەركەكتى، ەركەك – ايەلگە قاقتىعىسىپ، ايەل قۇلاپ تۇسەدى. ايەلدىڭ اياعىنا شالىنىسقان ايداۋىل سۇرىنگەندە ەركەككە ۇرىنىپ، ەركەك – ايەلدىڭ ۇستىنە قۇلايدى.
ايەل. ا-ااا؟! (ەركەكتى سابالاپ) تۇر...ۇستىمنەن تۇر دەيمىن ساعان وڭباعان؟!
ەركەك. دوعارىڭىز؟!. ادەيى جاتىر دەيسىز بە؟!
حاتشى. (ەركەكتى، سوڭىنان ايەلدى تۇرعىزادى) ۇرىسپاڭىزدارشى؟!
ايداۋىل. (قىزدى تۇرعىزىپ) كەششىرىڭىز...تەپە-تەڭدىكتى ۇستاي الماي قالعانىم...ءبىر جەرىڭىز اۋىرىپ قالعان جوق پا؟
قىز. وقاسى جوق...ەشتەڭە ەتپەيدى. وي، كەشىرىڭىزدەر...
ەركەك. وقاسى جوق...
قىز. سىزدەرگە جايسىزدىك تۋعىزدىم عوي دەيمىن...كەشىرىڭىزدەر...بايلانىستى ىزدەيمىن دەپ...ءھىممم. كەشىرىڭىزدەر، دەنەمدى يگەرە الماي قالعانىم...
ايەل. دەنەمدى يگەرە الماي قالدىم؟! ايتقان ءسوزىنىڭ ءتۇرىن؟! سەن سياقتى «دەنەسىن يگەرە المايتىنداردىڭ» كەسىرىنەن مىنا...تار جەردە «تاماشا» بوپ تۇرعانىمدى بىلەسىڭ بە؟!
قىز. قىزىق ەكەن...مەنىڭ قانداي قاتىسىم بار؟! مەن دە ءسىز سەكىلدى تار قاپاستا تۇرمىن عوي؟!
ايەل. تۇرسىڭ، ارينە...ەگەردە مىنا سەندەيلەر بولماعاندا، التىن باسىم قور بولىپ، «اليمەنت سۇراپ» سوتقا كەلمەس ەدىم.
قىز. كەشىرىڭىز... تۇسىنسەم بۇيىرماسىن...مەنى بىرەۋمەن شاتاستىرىپ تۇرسىز عوي دەيمىن... مەن ءسىزدى تانىمايمىن...بۇرىن-سوڭدى كەزدەستىرگەن ادامىم ەمەسسىز...ونىڭ ۇستىنە، ءسىزدىڭ الا الماي جۇرگەن اليمەنتىڭىزگە مەنىڭ قانداي قاتىسىم بار؟!
ايەل. سەن سياقتى شوپجەلكە ارامىزعا كيلىكپەگەندە، شاڭىراعىم شايقالىپ، بالا-شاعام اليمەنتكە تەلمىرمەس ەدى!..وي، سۇمدىق-اي، وسى كۇنگى قىزدارعا تاڭ قالامىن؟! باقۋات بولسا ءبىر ءجايلى، «ە، اقشاسىنا قىزىققان عوي» دەيتىن...قالتاسىندا كوك تيىنى جوق ەركەكتى ۇيىنە كىرگىزىپ الاتىنداردان قالدىق قوي بالەگە؟!
قىز. قالتاسىندا كوك تيىنى جوق ەركەكتەن قۇتىلعانىڭىزعا قۋانبايسىز با؟!
ايەل. نە؟! كىرگىزىپ العانىڭا ءماز بولىپ تۇرمىسىڭ؟!
ايداۋىل. كەشىرىڭىز، ءسىزدىڭ شاڭىراعىڭىزعا بۇل كىسىنىڭ نە قاتىسى بار؟! ايتساڭىز – ادامىنا ايتپايسىز با؟!
ايەل. بۇل دا قاراپ جۇرمەگەن بولار. ەرتەلى-كەش ءبىر ەستيتىن ءسوزى بولعان سوڭ، ەستي بەرسىن.
حاتشى. جالپى ءسىز، ءجونسىز كيلىككەندى، ورىنسىز تيىسكەندى قويمايتىن ادام ەكەنسىز. ءليفتتىڭ توقتاپ قالعانىنا بىزدەر كىنالى ەمەسپىز عوي؟! ءسىزدىڭ مىنا سوزدەرىڭىز ءۇشىن سوتقا تارتۋعا بولاتىنىن بىلەسىز بە؟! ورىنسىز ۇرىنباي، جونىڭىزبەن تۇرۋىڭىزدى وتىنەمىن.
ايەل. ھا؟!
ەركەك. بايقاۋىمشا، ءسىزدىڭ دياگنوزىڭىز بەلگىلى بولدى.
ايەل. ا؟!نەمەنە، دارىگەر ما ەدىڭىز؟! ءيا...ول قانداي دياگنوز؟!
ەركەك. ءوز باقىتسىزدىعى ءۇشىن – وزگەدەن ءوش الۋ...
ايەل. سولاي دە؟! ءوزىڭ مىنا جەردە «اسا باقىتتىلىعىڭنان» تۇرسىڭ با؟!
ەركەك. جوق...بىراق، ول ءۇشىن ەشكىمنەن ءوش العىم كەلمەيدى.
ايەل. ال، مەنىڭ ءوش العىم كەلەدى...مىنا سەندەيلەردەن...ءۇش بىردەي بالاسىن تاستاپ، بەتى جىلتىراعان كولدەنەڭدەردىڭ قوينىنا كىرىپ العانداردان ءوشىمدى العىم كەلەدى.
حاتشى. ايقايلاماڭىزشى؟! سوتقا كەلەتىندەردىڭ كوبى، وزگەدەن ءوش الۋعا كەلەدى. نيۋتوننىڭ جاڭا زاڭىن ويلاپ تاپتىم دەپ تۇرسىز با؟! تانىس ءجايت...سوندىقتان، جاڭالىق اشتىم دەپ ويلاماي، سابىرمەن ءليفتىڭ ءجۇرۋىن كۇتىڭىز.
ايەل. ونسىز دا جۇقارعان جۇيكەمدى ء(ليفتى تەۋىپ قالىپ) مىنا تار قاپاس تۇنشىقتىرىپ تۇرسا قايتەمىن؟! (ەڭىرەپ جىبەرەدى) وڭباعان...ول وڭباعان تاعى قاشىپ كەتەتىن بولدى...
حاتشى. ءسىز، تىم اسا كۇيىنبەڭىزشى...جاڭا كىرە بەرىستە شاقىرتۋ قاعازىڭىز بويىنشا تولقۇجاتىڭىزدى تىركەتكەن جوقسى با؟
ايەل. ءيا؟
حاتشى. ەندەشە، بەيمارال تۇرا بەرىڭىز. ءسىز كەشىككەن جاعدايدا، سوتتىڭ حاتشىسى تومەندەگى كۇزەت بولىمىمەن حابارلاسادى. كەلگەنىڭىزدى، ىشكە كىرگەنىڭىزدى بىلسە، مىندەتتى تۇردە كۇتەدى. قورىقپاڭىز.
ايەل. ۋھ؟! ونىسى دۇرىس ەكەن.
ەركەك. جانىمىز وزىمىزگە قالدى عوي دەيمىن، جوباسى...
ايەل. ال ءسىز، شاقپاي تۇرىڭىز.
ۇنسىزدىك. ۇنسىزدىكتەن ەلەكتر توگى ءجۇرىپ جاتقانداي قىسىمنىڭ ارتا تۇسكەنىن تۇرعانداردىڭ جۇزىنەن كورىنەدى.
قىز. (حاتشىعا) «وزگەدەن ءوش الۋعا كەلەدى» دەدىڭىز بە؟.. سىزشە ول دۇرىس ەمەس پە؟!
حاتشى. ول ەندى...اركىمگە – ارقالاي عوي. كوبىنە جاپا شەگەتىندەر باسىم سوتتالادى. كەيدە تىپتەن، جازىقسىز جالامەن سوتتالاتىندار قانشاما؟!
ايەل. «جازىقسىز» دەيدى عوي...مەنىڭ قاشاق كۇيەۋىم سياقتىلاردىڭ جازاسىن كىم بەرەدى، ا؟! باۋىر ەتى بالاسىنا اليمەنت تولەۋدەن قاشقان اكەلەرگە اليمەنت ءوندىرۋ از...ءومىر بويى موينىنا دوربا ارقالاپ وتەتىندەي، شەتىنەن سوتتاۋ كەرەك.
ايداۋىل. تۋھ، مىنا كىسىنى-اي؟! ايداۋىل بوپ ىستەيتىن بولعاندىقتان، كەيدە اجىراسۋعا ايەلدەردىڭ ءوزى ارىز تۇسىرەتىنىن كەزدەستىرەمىن. ەركەكتى كىنالاۋ دۇرىس ەمەس.
ايەل. دۇرىس ەمەس؟! «قارعا – قارعانىڭ كوزىن شۇقىمايدى..» دە؟!
قىز. ەگەر...ايەل مەن ەركەك بىردەي كىنالى بولسا شە؟! قايسىسىن سوتتاۋ كەرەك؟!
ايەل. نەمەنە؟! ايەل بالا تۋادى...ەركەك تاستاپ كەتەدى...ايەل بەيشارانى نە ءۇشىن قوساقتاپ سوتتاۋى كەرەك ەكەن؟!
قىز. تەكسىزدەر سانىن كوبەيتكەندەرى ءۇشىن...
ايەل. نەمەنە؟! نە دەدىڭ؟!
قىز. تەكسىزدەر سانىن كوبەيتكەندەرى ءۇشىن دەيمىن! قۇلاعىڭىز دۇرىس ەستىمەيدى ما؟!
ايەل. قۇلاعىم ادەمى ەستيدى. سەنىڭ ءسوزىڭ ەستۋگە تاتىيتىنداي بولماعان سوڭ سۇراپ تۇرمىن؟!
قىز. (حاتشىعا) بايقاۋىمشا، ءسىز دە وسىندا قىزمەتتەسىز عوي دەيمىن؟
حاتشى. ءيا...سوت حاتشىسىمىن.
قىز. ەندەشە، سوتقا اكەلە جاتقان ارىزىمدى سىزگە وتكىزەمىن عوي، ءا؟!
حاتشى. ءيا...
قىز. (سومكەسىنەن العان قاعازىن ۇسىنىپ) ءماڭىز...مىناۋ سىزگە.
حاتشى. كەشىرىڭىز...الدىمەن مىنا قاپاستان قۇتىلىپ الايىقشى، سوسىن تاپسىرا جاتارسىز.
قىز. (تەلەفونىنىڭ كامەراسىن وزىنە بۇرىپ، جىلدام سويلەي باستايدى) قۇرمەتتى ادامدار! الدارىڭىزدا تۇرعان سوت حاتشىسى، ارىزبەن كەلگەن مەنى قابىلداماي، ازاماتتىق قۇقىما قول سالىپ وتىر...
حاتشى (تەلەفوندى جۇلىپ الىپ) ءجارايدى...اكەلىڭىزشى...(قىز ۇسىنعان قاعازدى الىپ، تەز كوز جۇگىرتە بەرە باقىرايعان كوزدەرمەن قىزعا قاراپ) مىناۋ نە شاتپاق؟!
قىز. ارىز...
حاتشى. ارىز ەكەنىن كورىپ وتىرمىن...كىمنىڭ ۇستىنەن جازىپ وتىرسىز؟!
قىز. جازۋلى تۇر عوي...ساۋاتىڭىز بار، انىقتاپ وقىساڭىزشى؟!
حاتشى. ساۋاتتى بولماسام سوت سالاسىندا ىستەمەس ەدىم. مىناۋىڭىزدى قالاي تۇسىندىك؟! (ايداۋىلعا بەرىپ) بالكىم، سەن تۇسىنەرسىڭ...مىنانى وقىشى.
ايداۋىل. (داۋىستاپ وقي باستايدى) «مەنىڭ سوتقا ارىز بەرۋ سەبەبىم – ءوز بالالارىن جەتىمحاناعا وتكىزگەن كۇللى ايەلدەر مەن ەركەكتەردى سوتقا تارتۋدى، جازالاۋدى تالاپ ەتەمىن»؟..
حاتشى. نە ءتۇسىندىڭ؟! (ايداۋىل باسىن شايقايدى) سەن دە مە؟..مەن دە؟..(ەركەك پەن ايەلگە بۇرىلىپ) سىزدەر شە؟!(ەكەۋى ءۇنسىز قالعان) دەمەك، سىزدەرگە دە تۇسىنىكسىز... (قىزعا بۇرىلىپ) بالكىم، ءوزىڭىز جوندەپ تۇسىندىرەرسىز؟ ادەتتە ارىزدى ناقتىلى ادامعا بايلانىستى جازادى، مىنا جەردە...
قىز. تۇسىنبەيتىن نەسى بار؟ ءسىز، مەملەكەتىمىزدە قانشا جەتىمحانالار بار ەكەنىن بىلەسىز بە؟
حاتشى. قانشا دەيمىسىز؟..بىلمەيدى ەكەنمىن.
قىز. ءبىز ماقتانىپ جۇرگەن مەملەكەت، الەم بويىنشا ادام باسىنا شاققاندا، جەتىمحانالار سانى جاعىنان ءتورتىنشى ورىندا.
ايەل. نە دەيدى؟!
قىز. جەتىمدەر سانىن كوبەيتىپ، ءتۇبى قايدان شىققانىن بىلمەيتىن «تەكسىزدەر ارمياسىن» ۇلعايتىپ جاتقاندار كىمدەر؟! ا؟! سىزدەردەن سۇراپ تۇرمىن، «تەكسىزدەر ارمياسىن» ۇلعايتىپ جاتقاندار كىمدەر؟!
ايداۋىل. ءسىز قىزىق سۇراق قويادى ەكەنسىز؟ ءبىز، ايگىلى تەلەشوۋعا...سۇراققا جاۋاپ بەرۋگە كەلگەن جوقپىز عوي؟!
قىز. سىزدەرگە ءجاي عانا «شوۋ...» ال، انا «تەكسىزدەر ارمياسىنا» شە؟! جاستىققا باسى تيىسىمەن «شىركىن، ەرتەڭ مامام مەن پاپام ىزدەپ كەلسە عوي؟!» دەگەن ارمانمەن، كوز جاسىنا بۋلىعىپ ۇيىقتايتىن جەتىمەكتەر ءۇشىن دە «شوۋ» دەيسىزدەر مە؟!
ايداۋىل. كەشىرىڭىز...مەن سونشالىق ويلاماعان ەدىم...
قىز. وقاسى جوق. سول سەبەپتى، ءوز بالالارىن جەتىمحاناعا وتكىزگەن كۇللى ايەلدەر مەن ەركەكتەردى سوتقا تارتۋدى، جازالاۋدى تالاپ ەتەمىن!..
حاتشى. ءيا؟!.
قىز. نە «ءيا»؟..
حاتشى. تۇسىنبەدىم...سوندا، ناقتىلى كىمدى سوتقا شاقىرۋىم كەرەك؟!
قىز. سىزگە نە بولعان؟! «ءوز بالالارىن جەتىمحاناعا وتكىزگەن كۇللى ايەلدەر مەن ەركەكتەردى» دەپ باقىرايتا جازۋلى تۇر عوي؟!
حاتشى. ءسىز مەنى كەشىرىڭىز...سوتتان جازالاۋدى تالاپ ەتۋ ءۇشىن، الدىمەن كىمنەن، نە ءۇشىن ەكەنىن ناقتىلى كورسەتۋىڭىز كەرەك. «كۇللى» دەگەن اتى-ءجونى مە؟! (قىز باسىن شايقايدى) تەگى مە؟! (قىز تاعى باسىن شايقايدى) ەندى نە سوندا؟!
قىز. قولىڭىزدا جازىلعان ارىز بويىنشا سوت وتكىزۋىڭىز كەرەك.
حاتشى. كەشىرىڭىز...جوبامدا ءسىز كىرەتىن ەسىكتەن جاڭىلعان سەكىلدىسىز. مىنا كەلىپ تۇرعان جەرىڭىزدى...ءھىممم. مىنا ليفت – سوت عيماراتىنىڭ ءليفتى... دەمەك، بۇل مەكەمەنى - «سوت» دەيدى...دەمەك، ناقتىلى فاكت بويىنشا، ناقتىلى جەكە تۇلعالاردان نە بولماسا زاڭدى قىزمەت ورىندارىنان ناقتىلى ارزى بويىنشا جازالاۋدى نە جازالاماۋدى جۇزەگە اسىراتىن جەر. ءتۇسىندىڭىز بە؟! مىناداي تالاپ-ارىزبەن ءسىز، سوتقا ەمەس – پسيحياترعا بارۋىڭىز كەرەك. (ايداۋىلعا قاراپ، يىعىن قيقاڭ ەتكىزەدى) تۇسىنسەم بۇيىرماسىن؟!
قىز. تۇسىنبەسەڭىز – تۇسىندىرەيىن. مەن قىسقاشا...ءبىر اۋىز سوزبەن جەتكىزۋگە تىرىسايىن. مەن، جاۋاپكەرشىلىكتەن، قيىندىقتان قاشىپ، ءوز نارەستەلەرىن جەتىمحاناعا تاپسىرعان كۇللى ەركەكتەر مەن ايەلدەردىڭ سوتتالۋىن تالاپ ەتەمىن!
حاتشى. الدىمەن دۇرىس اتاۋى جەتىمحانا ەمەس – بالالار ءۇيى.
قىز. ول – قوعام ءۇشىن سولاي، ال، مىنا بىزدەر...تىرىدەي جات قابىرعادا تاربيلەنگەندەر ءۇشىن – جەتىمحانا!..
حاتشى. ءا؟..دەمەك، ءسىز، بالالار ۇيىندە تاربيەلەنگەن بولدىڭىز عوي؟!
قىز. ءيا!..
حاتشى. تۇسىنىكتى...
قىز. تۇسىنىكتى بولسا، ارىزىم بويىنشا تاستاندىلار لەگىن كوبەيتكەندەردىڭ بارشاسىن سوتقا شاقىرتىڭىز.
حاتشى. ول مۇمكىن ەمەس.
قىز. نەگە؟!
حاتشى. بىرىنشىدەن – ولاردىڭ بۇگىندە باسقا وتباسىلارى بار، ەكىنشىدەن – تاپسىرعان ادامنىڭ اتى-ءجونى قۇپيا ساقتالادى، ۇشىنشىدەن -...
قىز. ءسىز، سول قۇپيانى اشۋ ءۇشىن سوتقا شاقىرتىڭىز!..قولىڭىزداعى بيلىكپەن كۇللى قۇپيالاردى تالقانداڭىز!..جازىقسىز نارەستەنىڭ تاعدىرىنا بالتا شاپقانى ءۇشىن، ءوز باسىن كۇيتتەپ جۇرگەن «كوكەكتەردى» مىنا بىزدەردىڭ الدىمىزدا جاۋاپقا تارتىڭىز!
حاتشى. بىرىنشىدەن – مەن، نەبارى سوتتىڭ حاتشىسىمىن. ەكىنشىدەن – باققىسى كەلمەگەن بالالارىن ءوز قولىمەن ەرىكتى تۇردە تاپسىرىپ كەتكەن اتا-انالاردى سوتتاۋعا زاڭ جوق، ۇشنشىدەن -...
قىز. ءسىزدىڭ سوتىڭىز «ءبىرىنشى مەن ەكىنشى»- دەن تۇرادى ما؟! سوندا مىنا بىزدەر، نەشىنشى ورىندامىز؟! جالتارماڭىز...جاۋاپ بەرمەيىنشە مىنا جەردەن ەشقايدا كەتپەيسىز!
ايەل. ەي، قاي جەردە تۇرعانىڭدى ۇمىتىپ قالدىڭ عوي دەيمىن؟! تاپقان ءسوزىن؟! توقتاپ تۇرعان ليفتەن قايدا بارادى دەيسىڭ؟!
ايداۋىل. ال، ايتپەسە؟! ءبىر اي بويى سوتقا ادام تاسىپ ءجۇرىپ، مىناداي سپەكتاكلدى ءالى كورمەپپىن؟! «قۋىرداقتىڭ كوكەسى...» بولدى-اۋ،ءا؟!
حاتشى. ءسىز ماعان رەنجىمەڭىز...ءار نارسەنىڭ ءتارتىبى...زاڭدى ورىندالۋ جولى بار. ءسىزدىڭ ارىزىڭىز بويىنشا كىمدى سوتتاۋى كەرەك؟!
قىز. ونىڭ جولىن سىزدەر تابىڭىزىدار!..سىزدەردىڭ شەشىمدەرىڭىزدى پرەزيدەنتتەن باستاپ – قايىرشىعا دەيىن مويىنداعاندا، مەنىڭ ارىزىمدى نەگە ورىندامايسىزدار؟! قالايشا تۇسىنبەيسىزدەر...مەن...مەن، كۇيەۋگە تيۋگە قورقامىن...
ايداۋىل. نە؟!.
ايەل. مىناۋ نە دەدى؟!
ەركەك. ا؟..
قىز. كۇيەۋگە تيۋگە قورقامىن دەيمىن!..
ايداۋىل. بەسىكتەن بەلىڭىز شىقپاعان جاس قىز ەمەسسىز...ءتۇرىڭىز كەمى 22-23-تەمىن دەپ تۇر. كۇيەۋ ءسىزدى جەپ قويمايدى. نەسىنە قورقاسىز؟!
قىز. جايشىلىقتا سولاي كورىنەر بولار. بىراق مەن، كۇيەۋگە شىعۋدىڭ وزىنەن ەمەس – كۇيەۋىم كىم بولادى دەگەن ويلان قورقامىن؟!
حاتشى. (ايداۋىلعا)سىز بىردەڭە ءتۇسىندىڭىز بە؟(ايداۋىل يىعىن قيقاڭداتادى) سىزدەر شە؟! (ەركەك پەن ايەلدىڭ كوزدەرى باقىرايعان كۇيى ءۇنسىز قالعان) تۇسىنىكتى...(قىزعا) كوردىڭىز بە، جالعىز مەن ەمەس – مىنا كىسىلەر دە تۇككە تۇسىنبەپتى. مەن...
قىز. نەسىنە تاڭىرقايسىز؟!
حاتشى. بىرنەشە جىلدىق سوت قاعازدارىن جۇرگىزگەن تاجىربيەم بولعاندىقتان ايتسام; بىرىنشىدەن – «كۇيەۋگە تيۋگە قورقاتىنى» ءۇشىن قاراستىرىلعان زاڭ جوق، ەكىنشىدەن - سىزدەي سۇلۋ قىزدى الۋعا دايىن جىگىتتەر ءورىپ جۇرگەندە... «تيۋگە قورقامىڭىزدى» قالاي تۇسىندىك؟!
قىز. ءيا...جىگىتتەر ءورىپ ءجۇر...بىراق، ول جىگىتتەردى مەن قابىلداي المايمىن.
ايەل. ال، ايتپەسە؟! جوق ەمەس «بار» ەكەن...باردى قابىلداماساڭ، وعان كىم كىنالى؟! جالپى، سەنىڭ كۇيەۋگە تيگەن-تيمەگەنىڭ كىمگە مىندەت؟!
قىز. (ەڭىرەپ جىبەرەدى) سەبەبى سول!..
حاتشى. (توسىن جايتقا ساسقالاقتاپ) جىلاماڭىزشى...قۇداي ءۇشىن جىلاماي، ادام عۇساپ ءتۇسىندىرىڭىزشى؟! ءجارايدى...ال، تىڭدايىن...نە سەبەپتى جىگىتتەردى قابىلداي المايسىز؟!
قىز. ەگەر ول...ەگەر ول...
حاتشى. ءيا، ەگەر ول؟..
قىز. ەگەر ول...(جىلاپ جىبەرەدى) ەگەر ول...
ايەل. تۋھ، ادامنىڭ ءىشىن كەپتىرمەي، الدىمەن ايتىپ بارىپ جىلاساڭشى؟!
قىز. ول جىگىت...ول جىگىت مەنىڭ تۋعان مەنىڭ اعام...باۋىرىم بوپ شىقسا شە؟!
حاتشى. نە؟!
قىز. مەنى سۇيگەن...مەن ءسۇيىپ قالعان جىگىت...مەنىڭ بەلگىسىز اكە-شەشەمنەن تۋىلعان باۋىرىم بوپ شىقسا شە؟! نە؟! ولاي بولۋى مۇمكىن ەمەس دەپ ويلايسىز با؟!
ايەل. قۇمىرسقاداي قىبىرلاعان ادامداردىڭ اراسىنان نەگە تاپ ساعان «اعاڭ» كەزدەسۋى كەرەك؟! ادام دا ويلامايتىندى ويلايدى ەكەن-اۋ؟!
قىز. سەنبەي تۇرسىز با؟! مەنەن ەكى جاس ۇلكەن قۇربىم، بىلتىر كۇيەۋگە شىقتى...
حاتشى. قۇتتى بولسىن...
قىز. قايداعى قۇتتىلىق؟! سۇراستىرا كەلە كۇيەۋىنىڭ كىم بوپ شىققانىن بىلەسىز بە؟! ءوزىن تاستاپ كەتكەن اكەسىنىڭ زاڭدى نەكەدەن تۋىلعان ۇلى بوپ شىقتى؟!!
ايداۋىل. نە...نە دەدىڭىز؟!.
قىز. سۇيگەن جارىنىڭ تۋعان قارىنداسى...قانداسى ەكەنىن بىلگەن جىگىت – اسىلىپ ءولدى!..
ايداۋىل. ا؟!. سۇمدىق-اي...ماسقارا؟!.
قىز. ماسقارانىڭ كوكەسى سول...شىندىقتىڭ بەتى اشىلعاننان سورلاعان قۇربىم، توعىزىنشى قاباتتان سەكىرىپ ولگىسى كەلگەندە ءتىرى قالىپ، جۇلىنى زاقىمدالىپ...ومىرلىك توسەكتە بايلانىپ جاتىر. ال...بۇل سۇمدىققا كىم جاۋاپتى؟! ەكى بىردەي ءورىم جاستاردىڭ قاسىرەتىنە كىم كىنالى؟!
ايەل السىرەپ، قابىرعاعا سۇيەنگەن بويى تىزەرلەپ وتىرا كەتەدى.
حاتشى. تۇسىنەمىن...
قىز. تۇسىنەمىن؟! تۇسىنبەيسىز!..ءسىز تۇككە دە تۇسىنبەيسىز؟! تۇسىنسەڭىز، جانىما تيەردەي سۇراقتار قويماس ەدىڭىز. حالىقارالىق جارىستاردا جۇلدەلى ورىن يەلەنىپ جۇرگەن بالەرينا – توسەكتە ءجىپسىز بايلانىپ جاتىر...ايتىڭىزدارشى، ۇرشىقتاي ۇيىرىلەتىن بيشي قۇربىمنىڭ ولە-ولگەنشە توسەككە بايلانعان تراگەدياسىنا كىم سەبەپكەر؟!
حاتشى. ءيا...ايانىشتى وقيعا ەكەن...
قىز. ايانىشتى؟! سىزدەر ءۇشىن ءجاي عانا «ايانىشتى وقيعا...». مىنا بىزدەر...جاتىردان جىلاپ شىققان تەكسىز تاستاندىلار ءۇشىن شە؟! بىلەسىز بە، بىزگە قاراعاندا سول قۇربىم «اكە-شەشەمدى تاپسام» دەپ ەرەكشە ارماندايتىن. تاپتى...قانداي جولمەن تاپتى دەسەڭىزشى؟! و، قۇداي؟!. ءسىز سوتسىز عوي، ايتىڭىزشى...جازىقسىز نارەسەتەلەردىڭ كۇيرەگەن تاعدىرىنا كىم جاۋاپتى، ا؟! قۇربىم مەن كۇيەۋىنىڭ نە جازىعى بار؟! مىنە، سول سەبەپتى سىزگە كەلىپ تۇرمىن.
ايداۋىل. ەستىمەگەن – ەلدە كوپ...سۇمدىق-اي؟!
حاتشى. ايتسە دە... ميلليونعا – ءبىر كەزدەسەتىن جايتقا بولا، كۇيەۋگە تيۋدەن باس تارتۋعا بولا ما ەكەن؟!
قىز. كەلەسى ميلليونعا تاپ بولسام شە؟! نە، ولاي بولۋى مۇمكىن ەمەس دەپ ويلايسىز با؟! انا قۇربىم دا سولاي... «وزىمە جانۇيا تابامىن» دەپ ويلاعان. مىنا سىزدەر، «جانۇيا» ءسوزىنىڭ قادىرىن... ءبىر ۇيادا باس قوسىپ وتىرىپ ءشاي ىشكەننەن ارتىق باقىت جوق ەكەنىن ۇعىنامىسىزدار؟!
ەركەك. قىزىم، سابىر ساقتاشى...ءسوزىڭنىڭ ءبارى ورىندى. تاعدىردىڭ تالقىسىنا تۇسكەندى كىم قالايدى دەيسىڭ. قاتەلىكتەر باسپالداعى ءبارىمىزدى ساراپقا سالادى. قاي جەرىنەن سۇرىنەتىنىڭدى قايدان بىلەرسىڭ؟
قىز. مەن عاشىقپىن...كەزدەسىپ جۇرگەن جىگىتىمدى ولەردەي سۇيەمىن. ونسىز ماعان تىرشىلىكتىڭ ءمانى جوق سەكىلدى... ءبىر اي بۇرىن ول ماعان ۇيلەنۋگە ۇسىنىس جاسادى...مەن...قۋانۋدىڭ ورنىنا قورقىپ كەتتىم...تۇسىنەسىز بە، ۇرەيلەندىم... «اعام بوپ شىقسا قايتەمىن؟!» دەگەن ۇرەيدەن ءتۇنى بويى كوز ىلمەي شىعامىن. شىنىمەن سولاي بوپ شىقسا شە؟! ولاي ەمەستىگىنە اناۋ، مەنى تاستاندىعا اينالدىرعان ەكەۋدەن باسقا كىمنىڭ كەپىلى بار؟! ايتىڭىزدارشى، قۇدايشىلىقتارىڭىزدى ايتىڭىزدارشى... سوندا مەن... ءومىر بويى قورقۋمەن...ۇرەيمەن ءومىرىمدى وكسىتىپ وتكىزۋىم كەرەك پە؟! ءبىزدىڭ كوزجاسىمىزدىڭ وتەۋىن كىم تولەيدى؟! سوندىقتان، انا جاۋىزداردى...ويناپ ءجۇرىپ وت باسىپ، «ناتيجەگە» اينالعان بەيكۇنا بىزدەردى «تەكسىز تاستاندىلارعا»، «تەكسىز توبىرعا» اينالدىرعان ايەلدەر مەن ەركەكتەردى سوتقا تارتىڭىز!..
ايەل ەسىنەن تانىپ، قۇلاپ تۇسەدى.
ەركەك. (ايەلدى سۇيەمەلدەپ) سىزگە...سىزگە نە بولدى؟!
تۇرعاندار نە ىستەرگە امال تاپپاي ءابىرجىپ قالادى.
حاتشى. سومكەلەرىڭىزگە سالىپ العان سۋلارىڭىز جوق پا ەدى؟!
قىز. ءجول-جونەكەي سۋ ىشەتىن ادەتىم جوق ەدى...
ايداۋىل. ەندى قايتتىك؟!
قىز، سومكەسىنەن جەلپىگىشىا الىپ، ايەلدىڭ بەتىن جەلپي باستايدى.ىكوزىن اشىپ، ەسىن جينايدى.
ەركەك. ۋھ...قۇدايعا شۇكىر؟! ۇرىسساڭىز – ۇرىسا بەرىڭىز، تەك، وتىنەم، تالا كورمەڭىزشى؟! ادامنىڭ زارەسىن الىپ؟..
ايەلدى جابىلا سۇيەپ، ورنىنا تۇرعىزادى.
ايەل. كەشىرىڭىزدەر...
ەركەك. وقاسى جوق...
ايداۋىل. مەن وسى گولليۆۋدتىڭ كينوسىنا كىرىپ كەتكەن جوقپىن با؟!
حاتشى. سەن دە ءبىر قايداعى گولليۆۋدتى ايتىپ...ء(ليفتىڭ تەتىگىنىڭ تۇبىنەن ايقايلاپ) ەي، باقانداي ءبىر ساعاتتان بەرى ءليفتتى ىزدەمەي نەعىپ وتىرسىڭدار؟» مىنا قاپاستان شىعاراسىڭدار ما، جوق پا؟! (قابىرعاسىن سابالاپ) ەي، تەزدەتىپ ءبىزدى شىعارىڭدار! ەي، ءليفتتى قوسىڭدار دەيمىن؟!
ەركەك. جوبامدا ءبىزدى شىنىمەن ۇمىتقان ءتارىزدى...
ايداۋىل. قاپ؟!. بۇگىن ەرتەرەك جۇمىستان شىعىپ، كەزدەسۋگە بارامىن دەپ جوسپارلاپ قويىپ ەدىم...
حاتشى. (قىزدى جۇباتقىسى كەلگەندەي) ءسىز مەنى كەشىرىڭىز...ويلاماعان جەردەن... ءيا...تاعدىرلارىڭىز ايانىشتى...
قىز. ال، ءسىز اياماڭىز!..شارانادان شىعا قاتىگەزدىكپەن سۇيەگى بەكىگەن بىزدەر «اياۋ» دەگەن ەكىجۇزدىلىكتى قابىلداي المايمىز. اكە-شەشەسىنىڭ باۋىرىندا وسكەندەردەن ءبىزدىڭ ەرەكشە ايىرماشىلىعىمىز – كولگىرسۋدى كوزسىز كورىپ، ءۇنسىز سەزىپ قويامىز. سوندىقتان، ايتار سوزىڭىزگە بىردەن كىرىسۋىڭىزگە بولادى. (تەسىلىپ قاراعان حاتشىعا) ادەمىلىگىمە قىزىعىپ تۇرسىز با؟! نەسىنە قىسىلدىڭىز؟! تۇسىمنان وتكەن ەركەك كىندىكتىڭ مويىنى ۇزىلەردەي بۇرىلاتىنىن بىلمەيدى عوي دەيمىسىز؟! الىگى «ەركەك پەن ايەلدىڭ» ماعان سىيلاعان جالعىز سىيى وسى – سۇلۋ عىپ تۋعىزعاندارىندا عانا...قۇبىجىق بولماعانىما شۇكىر...
حاتشى. قۇبىجىقتىق تەك سىرت بەينەگە بايلانىستى ما ەكەن؟..
قىز. «سىرتى سۇلۋ بولا تۇرا – جان-دۇنيەسى قۇبىجىقتار بار» دەگىڭىز كەلىپ تۇر ما؟!
حاتشى. ونى قايدان ءبىلىپ قويدىڭىز؟!
قىز. جاڭا عانا «كولگىرسۋدى كوزسىز كورىپ، ءۇنسىز سەزىپ قويامىز» دەگەن جوقپىن با؟! باسقا-باسقا، كىتاپ وقۋ...ساباققا دايىندالۋ جاعى جەتىمحانادا جولعا قويىلعان. سىزدەردىڭ وتباسىلى بالالارىڭىزدان ارتىق بىلمەسەك، كەم بىلمەيمىز. سونىمەن، الىگىلەردى سوتتايسىز با، جوق پا؟!
حاتشى. «سوتتاعان دەگەن وسى ەكەن» دەپ، بەت جوق كوز جوق، كىمدى سوتتاۋىم كەرەك؟!
قىز. نەگە بەت جوق، كوز جوق؟! مەنى تاستاپ كەتكەندەر شە؟!
حاتشى. جاقسى... (قىزعا) بىزگە كەلمەس بۇرىن بالالار ءۇيىنىڭ باسشىلارىنان «مەنى تاپسىرعان ادامنىڭ اتى-ءجونى كىم» دەپ سۇرادىڭىز با؟!
قىز. سۇراۋعا ميىم جەتپەدى دەپ ويلايسىز با؟! سۇرادىم...
حاتشى. ال؟..
قىز. مەنى...ايالداماعا...ايالدامانىڭ ورىندىعىنا تاستاپ كەتىپتى...تىم قۇرىسا تەگىم جازىلعان ءبىر جاپىراق قاعازدى قالدىرۋعا قيماعان...بىلەسىز بە، مەن تەكسىزبىن؟!. كۇلكىلى... سوناۋ كونە عاسىردا سالىنعان عيماراتتاردىڭ جوباسىن سىزۋشىلاردىڭ اتى-ءجونى جازىلىپ قويىلعان ال، مىنا بىزدەردىڭ، ءتىرى جانداردىڭ ناقتىلى تەگىمىز جوق. اينالاڭىزعا قاراڭىزشى...مەن سياقتى «تەكسىزدەر» ءورىپ ءجۇر...اكەمىزدىڭ كىم ەكەنى...انامىزدىڭ كىم ەكەنى بەلگىسىز، كوشەدە قاڭعىپ جۇرگەن بۇرالقى يتتەر سەكىلدى كىل «تەكسىزدەرمىز»!..
حاتشى. تىم قاتتى ايتتىڭىز...
قىز. ءسىز قالاي ويلايسىز، مەن ءۇشىن مىنا ومىردە «جۇمساق» نارسە بولدى ما؟!
حاتشى. ەندى...
قىز. ارينە، ايتا المايسىز...مەنىڭ جالعىز عانا ارمانىم بار...مەنى دۇنيەگە اكەلگەن «ەكەۋدى» سوتتاۋ!..قاراڭعى قاپاسقا تاستاپ، جارىق دۇنيەنى كورۋگە زار ەتكىزۋ!..
ايداۋىل. ءسىز...تىم قاتال ەكەنسىز؟!
قىز. مەنى...شارانادان ەندى شىققان مىنا مەنى كىم ايادى، ا؟! كىشكەنتاي بالانىڭ ەسىندە ەشتەڭە قالمايدى دەپ جاتادى. وتىرىك!..ءۇش جاسار كەزىمدەگى وقيعا جادىمنان كەتپەيدى...ۇستىمە شەشەك شىعىپ اۋىرىپ قالدىم. كىشكەنتاي ءتانىم كورگەن ازابىم ەسىمە تۇسسە، ءالى كۇنگە ساي-سۇيەگىم سىرقىرايدى. مەنەن دە باسقا جەتىمەكتەر تولىپ جاتقان جەتىمحانادا تاربيەشىلەر جەتىسپەيتىنى بەسەنەدەن بەلگىلى جايت. ساۋساقپەن سانارلىق تاربيەشىلەردىڭ ۇلارداي شۋلاعان تاستاندىرادىڭ قايسىبىرىنە قولدارى جەتە بەرەدى دەيسىز؟!. ءوز اتا-انامىزدان قاتىگەزدىكتى كوزىمىز اشىلماي جاتىپ كورگەن بىزدەرگە، ولاردىڭ دا ەمەشەلەرى ەزىلمەيتىنى جاسىرىن ەمەس. مەنىڭ ءار جاراما كىم ءدارى جاعىپ وتىرسىن...ۋاقتىلى ءدارى جاعىلماعاننان شەشەگىم اسقىنىپ كەتىپ، تۇلا بويىم جاراعا سىرەسىپ قالدى. ءار-بىردەن قىشىپ، سۇيەكتەرىمدى قاقساتقاندا...(ەڭىرەيدى) ىستىعىم كوتەرىلىپ، دەنەمنىڭ وت بولىپ جانعانى ەسىمدە. ارى قاراي...جوبامدا ساندىراقتاسام كەرەك...العاش رەت «ماما» دەگەن بەينەنى كوردىم. قالىڭ وتتىڭ ورتاسىنان الىپ شىعۋىن... تىم قۇرىعاندا ۇستىمە سۋ سەبۋىن ءوتىنىپ جالبارىنامىن. ول...بۇرىلمادى... ءتۇيۋلى قاباقتارىمەن، سۋىق كوزدەرى وڭمەنىمنەن وتەردەي تەسىلە قاراپ، بۇرىلىپ كەتىپ بارا جاتتى... العاش رەت ەشقاشان ايتپاعان ءسوزدىڭ اۋزىما قايدان تۇسكەنى قايدام... «ماما...ماماتاي» دەپ جىلاپ ويانعانىم ەسىمدە...كوزىمدى اشقان كەزدە كورگەنىم – تاربيەشى اپاي ءدارىنى جاراما باتىرىپ-باتىرىپ جاعىپ جاتىر ەكەن. ءار باتىرعانىنان شىبىن جانىمنىڭ كوزىمە كورىنەتىنىمەن جۇمىسى قايدان بولسىن؟! تىستەندىم... جىلاماۋعا... ءۇنسىز كونۋگە تىرىستىم. كىپ-كىشكەنتاي بولسام دا، تاپ سول كەزدە «قاسىمدا ماماتايىم بولعاندا تەز جازىلىپ كەتەر ەدىم» دەپ ارماندادىم. جاڭا، مەنىڭ ساناماعىما كۇلدىڭىزدەر...مەنىڭ ساناماقپەن ۇرەيدى قۋالايتىنىمدى، ساناماقپەن ارپالىسىپ جاتىپ ۇيقىعا كەتەتىنىمدى قايدان تۇسىنەرسىزدەر؟! ءسىز بولساڭىز «تىم قاتالسىڭ» دەپ ايىپتايسىز. قاسقىر ەكەش قاسقىر دا بولتىرىگىن ارقاسىنا ارقالاپ ءجۇرىپ اۋىزداندىرادى ەكەن. سوندا مەنى جاراتقان «ەكەۋ» - قاسقىردان وتكەن جىرتقىشتار بولعانى عوي؟! مىنە، سىزگە سوتتاۋعا دەگەن دالەل!..سەبەبىن جەتكىلىكتى كەلتىردىم عوي دەيمىن، ەندى قارسى بولماسسىز؟!
ايداۋىل. (جىلايدى) سۇمدىق...سۇمدى-اي؟!
حاتشى. جىلايتىنداي ساعان نە كورىندى؟!
ايداۋىل. كەۋدەسىندە جانى بار ادام، مىنانداي زارعا قالاي شىدايدى؟!
ەركەك. ۋھ؟!. ءسىز...بالكىم ەسەبىن تاۋىپ، مىنا كىسىنىڭ ءوتىنىشىن ورىنداتارسىز.
حاتشى. ءبارىن...ءبارىن ءتۇسىنىپ تۇرمىن. ايتسە دە، زاڭ اياسىنان اسىپ، «كۇللىنى» قالاي سوتتايمىن؟! تىم قۇرىسا تەگى بەلگىلى بولعاندا، ءسوز باسقا بولار ەدى؟!. ا...قىزدى جۇباتقانداي) تۋعان كۇنىڭىز بەن جىلىڭىزعا سايكەس سول كۇنى پەرزەنتحانالاردا تۋىلعانداردى زەرتتەپ كورەيىن...
قىز. ول جولىن دا زەرتتەپ قويعانمىن...مەن اۋرۋحانادا ەمەس، ۇيدە...بايىرعى جولمەن، جاسىرىن تۋىلىپپىن...ايەلدەر بوساناتىن ۇيدە مەنىڭ جىلىمدا، ايىمدا تۋىلعان سابيلەردىڭ كارتوتەكاسىن كوتەرگەنمىن... ءبارى اتا-انالارىمەن بىرگە كەتكەن. قالدىرىلعان ەشكىم جوق. ءبىر ايدىڭ كولەمىندە تۋىلعانداردى تۇگىن قالدىرماي ءسۇزىپ شىقتىم...ۇرەيلەنۋىمنىڭ سەبەبىن ەندى تۇسىنگەن بولارسىز.
ايەل. (قىزدىڭ الدىنا قارسى تۇرىپ) مەن دايىنمىن...
حاتشى. قايدا؟!
ايەل. سوتقا...
حاتشى. قايداعى سوتقا؟!
ايەل. مىنا كىسى سىزدەن سوتتى تالاپ ەتىپ تۇر عوي؟..
حاتشى. تۇرسا قايتەدى ەكەن؟! سىزگە ونىڭ نە قاتىسى بار؟!
ايەل. مىنا كىسى ناقتىلى جاۋاپ بەرمەيىنشە ءبارى-ءبىر توقتامايتىنى كورىپ تۇر. سوندىقتان، ارىزدانۋشىنىڭ تالابىن قاناعاتتاندىرۋ ءۇشىن، مەنى سوتقا تارتىڭىز. (قىزعا) ەگەر، كوز الدىڭىزدا سوت جۇرسە، ءوزىڭىزدىڭ تالابىڭىزدى «قاناعاتتاندىرىلدى» دەپ قابىلدايسىز عوي، ءا؟!
قىز. ءيا...
ايەل. بولماعان جاعدايدا شە؟!
قىز. بولعانعا دەيىن وسى جەردەن تىرپ ەتپەي كۇتەمىن...كۇتۋگە جىل قاجەت بولسا – جىل بويى كۇتەمىن.
ايەل. انە...ەستىدىڭىز بە؟! جىل بويى كۇتەتىن ۋاقىتىڭىز بار ما؟..ارينە، جوق. سوندىقتان، ءسىزدىڭ قىزمەتىڭىزدى قۇتقارۋ بارىسىندا مەنى سوتقا تارتۋىڭىزدى وتىنەمىن. نەعۇرلىم تەز باستاساڭىز – سوعۇرلىم تەز اياقتايسىز. سوتتى باستاڭىز...
ەركەك. مەن وسى جىندىحاناعا كىرىپ كەتكەن جوقپىن با؟!
قىز. بولمايدى...
ايەل. ا؟! نەگە بولمايدى؟!
قىز. كىنالى ەكەۋ بولعاندىقتان، بىرەۋىنە عانا سوت جۇرگىزۋگە بولمايدى. ەركەكتى دە سوتقا تارتۋ كەرەك.
حاتشى. ال، ايتپەسە؟! بىرەۋى ازداي، ەكىنشىسىن تالاپ ەتەدى ءوزى؟! پسيحولوگتا بولماعانىڭىزعا ءبىراز بولىپ پا ەدى؟!
قىز. ەگەر، ەسى اۋعان دەيتىن بولساڭىز، ابىرجىماڭىز...ەسىم ورنىندا. ەكى جاقتى بەتتەستىرمەي، بىرجاقتاما ۇكىمدى قالاي شىعارماقسىز؟!
حاتشى. ءسىز ءوزى...مەنەن اسىپ سوت بوپ تۇرسىز عوي؟!
قىز. قولىڭىزداعى ارىزدا «ايەلدەر مەن ەركەكتەر» دەلىنگەن...
حاتشى. حوش دەلىك؟..
قىز. ايەل تابىلدى دەلىك...ەركەك قايدا؟! ايەل بالانى كۇلگە اۋناپ تاپپاعان شىعار؟! «بالا جاساۋ پروتسەسسىنە اتسالىسقان» اكە قايدا؟! ەركەكتى تاپپايىنشا، سوتتىڭ باستالۋىنا قارسىمىن!
حاتشى. تاپتىم!.. ءبىز بۇگىن، سۇيىكتىم ەكەۋمىز تەاترعا بارامىز دەپ كەلىسكەن ەدىك. مەن ءسىزدى تەاترعا ەرتىپ اپارايىنشى؟!
قىز. تەاترعا؟! تەاتردا نە ىستەيمىن؟!
حاتشى. اكتريسالىققا ۇسىنامىن. ءسىز بار عوي، جوق نارسەنى قاتىرىپ وينايدى ەكەنسىز. مىنا تۇرىسىمىز «كوڭىلدى كومەديا» بوپ شىعا كەلەدى...
قىز. ءسىز ...ءسىز مەنى مازاقتاپ تۇرسىز با؟! مەن ءسىزدى...مەن ءسىزدى؟!.
حاتشى. نە، سوتقا بەرەمىن دەمەكپىسىز؟! سوت سىزگە ويىنشىق پا؟! ءاي جوق، ءشاي جوق، كىم كورىنگەن ارىز جازدى ەكەن دەپ، بەتالدى سوت بولا بەرەدى دەپ كىم ايتتى سىزگە؟!
ايداۋىل. ايقايلاماڭىز؟!
حاتشى. نە؟!
ايداۋىل. ايقايلاماي سويلەڭىز دەيمىن؟! مىنا جەردەگىلەردىڭ جۇيكەسى قىلدان جۇقارىپ تۇرعانىن كورمەيمىسىز؟! ايقايدىڭ ورنىنا مىنا كىسىنىڭ تالابىنا جاۋاپ بەرىڭىز. قاجەت بولسا – كۇللى الەمنىڭ ايەلدەرى مەن ەركەكتەرىن شاقىرتىڭىز! ءوز ۇرپاعىنا جاساعان قياناتىنا جاۋاپ بەرەتىندەي جازا بەرەتىندەي جولىن قاراستىرىڭىز!
حاتشى. ايقايلاماڭىز؟! اياۋ سەزىمى تەك سىزدە عانا بار دەپ كىم ايتتى؟! ماعان سالسا، تاپ قازىر قاتىگەزدەردىڭ تۇگىن قالدىرماي شاقىرتار ەدىم، بىراق، ناقتىلى زاڭ جوق قوي؟! ء(جايسىز ۇنسىزدىك ورنايدى) وتىنەمىن...سابىر ساقتاڭىزدار. (قىزعا) بايقاۋىمشا، تالابىڭىزدان قايتپايتىن سياقتىسىز. سەنسەڭىز، سىزگە كومەكتەسكىم كەلىپ تۇر. بىراق، جولىن كورمەي تۇرمىن. مەن سوت ەمەس – ءجاي عانا سوتتىڭ حاتشىسىمىن.
ايەل. ءبىز ءسىزدى «سوت» دەپ قابىلدايمىز. جاڭا عانا ۇزاق جىلدان بەرى سوت جۇيەسىندە جۇمىس ىستەيتىندىگىڭىزدى ايتتىڭىز. دەمەك، ءسىز ءۇشىن سوت پروتسەسسىن جۇرگىزۋ تاڭسىق ەمەس. مىنا ءليفتتىڭ جۇرەتىن ءتۇرى كورىنبەيدى. بەكەرگە تۇرماي، قۇرىعاندا بىرەۋدىڭ تالابىن ورىندايىق. باستاڭىز... نەسىنە تاڭىرقاندىڭىز، سوتتى باستاڭىز دەدىم عوي؟!
قىز. قارسىمىن...ەركەكسىز سوت جۇرمەۋ كەرەك.
ايەل. ا؟!
ەركەك. (قىزعا كۇيىنىپ) مىنا كىسى رولىنە ادەمىلەپ كىرىپ بارادى عوي، ءوزى؟!
ايەل. (ەركەكتىڭ قارسى الدىنا تۇرىپ) مىنە!..ەركەك دايىن!
ەركەك. كەشىرىڭىز...مەن ءسىزدى تانىيمىن با؟!
ايەل. تانىسقاننىڭ كوكەسى الدا...مىناۋ – سەنىڭ قىزىڭ!..
ەركەك. ا؟! نە دەدىڭىز؟! قايداعى قىز؟!.مەن مۇندا باسقا جاعدايمەن... (حاتشىعا جالبارىنا) كەشىرىڭىز...مەن اليمەنتتى دەر كەزىندە تولەي الماعاندىعىمنان سوتقا شاقىرىلعان ەدىم. شىنتۋايتىنا كەلگەندە، اليمەنت تولەۋدەن قاشقانىم جوق...تەك، بىلتىردان بەرى جۇمىستىڭ رەتى كەلمەي...
ايەل. نە سەبەپتى قىزىمىزدى جەتىمحاناعا وتكىزگەنىمىز ءۇشىن مەنىمەن بىرگە جاۋاپ بەر.
ەركەك. سىزگە نە كورىنگەن؟! قايداعى قىز؟! قايداعى وتكىزۋ! بىلگىڭىز كەلسە، مەنىڭ بالام نەبارى ءتورت جاستا. ايەلىم – مەكتەپتە مۇعالىم. ءسىزدى...كەرەك دەسەڭىز، مەن ءسىزدى تانىمايمىن.
ايەل. ارينە...سەبەبى، سەن مەنى مىنا قىز بويىما بىتكەنىن بىلگەن كەزدە، تاستاپ كەتكەنسىڭ.
ەركەك. نە دەيدى؟! ءسىز...ءسىز نە دەپ تۇرسىز؟! (كەتكىسى كەلىپ ۇمتىلادى. ليفتكە سوعىلادى. جاندالباسامەن ءليفتى توقپاقتاي باستايدى) ەي، ەي، تومەندەگىلەر؟! قىرىلىپ قالعانبىسىڭدار؟! جۇرگىزىڭدەر؟! ەي، ءليفتتى جۇرگىزىڭدەر؟! نە پالە كورىنگەن... شەتىڭنەن ۇيىقتاپ قالعان با؟! مىنا شايتان العىر ءليفتى جۇرگىزسەڭدەرشى، ەي؟!
حاتشى. بەكەرگە اۋرە بولماڭىز. جوباسى، تومەندەگىلەر تۇسكى ۇزىلىسكە شىعىپ كەتكەنگە ۇقسايدى.
ەركەك. (ەكى قولىن كوتەرىپ) قۇداي ءۇشىن، ادام عۇساپ تۇسىندىرىڭىزدەرشى...مىنا جەردە نە بوپ جاتىر ءوزى؟! توسىننان تەاترعا كىرىپ كەتكەن جوقپىن با؟!
حاتشى. (اششى مىسقىلمەن) سوت زالىنا...جاۋاپ بەرۋگە كىرىپ كەتتىڭىز.
ەركەك. دۇرىس قوي...اليمەنت تولەمەگەنىم...جاۋاپ بەرۋگە كەلگەنىم راس... بىراق، مىنا كىسىنى ءبىرىنشى رەت كورىپ تۇرعاندىقتان، تانىمايمىن عوي؟! (حاتشىعا ۇمتىلىپ) كەشىرىڭىز... مىنا كىسىدەي قىزىم ومىرىمدە بولعان ەمەس. ءوزىڭىز قاراساڭىزشى...قايداعى قىزىم؟! جاس ارامىز اناۋ ايتتى الشاق تا ەمەس... قالايشا «مەنىڭ قىزىم» بولماق؟!
قىز. مەن ءسىز سياقتى «قاشاق اكەنى» سوتتاۋىن تالاپ ەتىپ كەلگەنمىن. سوندىقتان، جاۋاپ بەرۋگە ءماجبۇرسىز.
ەركەك. (كۇلىپ) ءا؟!. ەندى ءتۇسىندىم...جوبامدا جارىسقا كورىنىس دايىنداپ جاتقان بولدىڭىزدار عوي دەيمىن؟! كەشىرىڭىزدەر، مەن ارتيستىك قابىلەتتەن جۇردايمىن. الدا-جالدا بيلەۋ قاجەت بولسا، بىردەمە عىپ يلالاۋىما بولادى...مەن...مەن سالدەن كەيىن كەلەيىنشى... (كەتپەك بولادى)
حاتشى. ءسىز سوت جۇيەسىنىڭ زاڭدى قىزمەتكەرىنە ءتىل تيگىزگەنىڭىز ءۇشىن باسىڭىزبەن جاۋاپ بەرەتىنىڭىزدى بىلەسىز بە؟!
ەركەك. (ساسقالاقتاپ) ويباي-اۋ، مىنا جەردە نە بوپ جاتقانىن دۇرىستاپ تۇسىندىرەتىن جان بار ما ءوزى؟! قايدان...قايدا عانا تاپ بولدىم ءوزى؟! ءبىر جىل تولەمەگەن اليمەنتتى ەكى ەسە عىپ قايتارامىن...ماعان تيىسپەڭىزدەرشى؟!
ايەل. رۇقساتتى انا قىزىڭنان سۇرا.
ەركەك. (قىزعا جالبارىنا) وتىنەمىن...ماعان تيسپەسىنشى، ا؟
قىز. الدىمەن مەنىڭ سۇراقتارىما جاۋاپ بەرىڭىز.
ەركەك. تفۋ؟! (حاتشىعا جەتىپ بارىپ) مىنالاردىڭ ەسى اۋىسسا دا ءسىزدىڭ ەسىڭىز ورنىندا شىعار...مىنا جەردە نە بوپ كەتتى ءوزى، مەنىڭ كەتۋىم كەرەك.
حاشى. قىزىق ەكەنسىز، سوت باستالماي جاتىپ كەتەمىڭىز نە؟! سىرتىڭىزدان كولەمدى جىل كەسىپ جىبەرسەم قايتپەكسىز؟!
ەركەك. ا؟! نە دەيدى تاعى؟! و، قۇداي، قايدا كەلدىم؟!
حاتشى. جاۋاپ بەرۋشىلەر تۇگەلدەندى...سوت پروتسەسسىن باستايمىز.
ەركەك. ا...توقتاڭىز...توقتاي تۇرىڭىز؟!
حاتشى. نە ايتپاقسىز؟!
ەركەك. ازاماتتىق قۇقىعىمدى اياققا تاپتاپ، ورىنسىز جەردەن ويىنشىققا اينالدىرعاندارىڭىز ءۇشىن، مىنا تۇرعان سىزدەردى سوتقا مەن بەرەمىن!
ايەل. اي، قورقاق بەيشارا-اي...سول قورقاقتىعىڭ ءالى قالماپتى-اۋ؟!
ەركەك. ءسىز...ءسىز؟!.ءسىز نە دەپ تۇرسىز؟! ءسىزدىڭ ەسىڭىز اۋعانمەن – مەنىڭ ەسىم ورنىندا! مەن ءسىزدى ەشقاشان كورگەن ەمەسپىن...سىزدەي ايەلىم دە سۇيىكتىم دە بولعان ەمەس. بالەڭىزدى جاپپاڭىز! جولاماڭىز ماعان؟! مەن ءسىزدى تانىمايمىن دەدىم عوي، تانىمايمىن !..
حاتشى. ول جاعى تۇسىنىكتى جايت...سوندىقتان، الدىڭىزدا تۇرعان كىسىنى ەسىڭىزگە ءتۇسىرىپ، جاقسىلاپ تانىستىرامىز. ايىپتالۋشى...سىزگە قانداي ايىپ تاعىلىپ جاتقانىمەن تانىستىرايىن... (قىزدىڭ ارىزىن وقىپ) «مەنىڭ سوتقا ارىز بەرۋ سەبەبىم – ءوز بالالارىن جەتىمحاناعا وتكىزگەن كۇللى ايەلدەر مەن ەركەكتەردى سوتقا تارتۋدى، جازالاۋدى تالاپ ەتەمىن» دەلىنگەن.
ەركەك. نە دەيدى؟! ھا؟! حا-حا-حا؟! ايتتىم عوي سىزگە...مىنالار ەسىنەن اۋعان دەپ؟! حا-حا-حا؟! مەن، ەشقاشان، ەشكىمدى جەتىمحاناعا وتكىزگەن ەمەسپىن...ەشقانداي قىز، مەنەن جۇكتى بولعان ەمەس. مەنىڭ زاڭدى نەكەدەن تۋىلعان ۇلىم بار ەكەنى... قازىرگى ۋاقىتتا ايەلىم ەكەۋمىزدىڭ اجىراسقانىمىز راس. بالامنىڭ جاسى نەبارى 4 جاستا. (قىز نۇساپ) مىنا كىسىنى جانە...(ايەلگە مىسقىلمەن قاراپ) مىنا كىسىنى ومىرىمدە ءبىرىنشى رەت كورىپ تۇرمىن. ايتپاقشى...مىنا قاعازعا مەنى «كەلدى» دەپ قول قويىپ بەرىڭىزشى. ەرتەڭ «كەلمەدىڭ» دەپ تاعى پالە سالىپ جۇرسە...
حاتشى. كەشىرىڭىز...مەن ءسىزدى ەشقايدا جىبەرە المايمىن.
ەركەك. نە؟! نە دەدىڭىز؟!
حاتشى. ۇستىڭىزدەن تالاپ-ارىز ءتۇسىپ وتىرعاندىقتان، انىق-قانىعىن اجىراتپايىنشا، ەشقايدا جىبەرە المايمىن.
ەركەك. مەن سىزگە مىنا كىسىلەردى تانىمايمىن دەدىم عوي، تانىمايمىن؟! سەنەسىز بە، ومىرىمدە كورگەن جاندارىم ەمەس؟! ايتپاقشى، ءسىز – سوت ەمەس، قاراپايىش حاتشى ەكەنىڭىزدى ۇمىتىپ كەتتىڭىز عوي دەيمىن؟! حاتشىلىق جونىڭىزبەن تۇرۋىڭىزدى وتىنەمىن!
حاتشى. كەشىرىڭىز...ويلاماعان جەردەن قاجەتتىلىك تۋىنداپ كەتكەندىكتەن، سوت بولۋىما تۋرا كەلەدى. ءسوزىڭىزدىڭ قانشالىق شىندىق ەكەنىن قازىر...جاۋاپ ۇستىندە انىقتايمىز. ەگەر، ەش كىناڭىز جوق بولسا، جولىڭىزدان قالدىرمايمىز. نەسىنە سارى ۋايىمعا سالىنىپ تۇرسىز؟!
ەركەك. و، قۇداي؟!
حاتشى. ماعان كەلىپ تۇسكەن تالاپ-ارىز بويىنشا سوت وتىرىسى اشىق دەپ جاريالايمىن. تالاپ-ارىزبەن تولىعىمەن تانىسقاندىقتان، جاۋاپتى باستايمىز. الدىمەن ايەل جاۋاپقا شاقىرىلادى. (ايەل العا شىعادى)
حاتشى. ارىز بەرۋشىنىڭ تالابىنا ساي، ءسىز، تاعىلعان ايىپپەن كەلىسەسىز عوي؟!
ايەل. ءيا...كەلىسەمىن...
حاتشى. (ەركەككە) ءسىز، ارىز بەرۋشىنىڭ تالابىمەن تانىستىڭىز عوي؟!
ەركەك. تانىستىم. بىراق، مەن قارسىمىن!.. مەنىڭ ەشقانداي تاستاندى قىزىم جوق، جانە بولعان دا ەمەس. سوندىقتان، مەنىڭ قارسى ەكەنىمدى جازىپ قويىڭىز.
حاتشى. قاتىسىڭىزدىڭ قانشالىق بار-جوعىن تەكسەرۋ كەزىندە انىقتايمىز دەدىم عوي سىزگە؟! سونىمەن، وسى تۇرعان ەكەۋىڭىزگە بىردەي «ءوز ءسابيىن جەتىمحاناعا تاستاپ كەتتى» دەگەن ايىپ تاعىلىپ وتىر. وسى ايىپ بويىنشا جاۋاپ بەرەسىزدەر.بەرىلگەن جاعدايدىڭ سىن كوتەرمەيتىن جەردە وتكىزۋگە ءماجبۇر بولۋىمىزعا بايلانىستى، سۇراق-جاۋاپ الماسۋ قىسقا، ءارى نۇسقا بولماق. (ايەلگە)ايتسە دە، العاشقى سۇراقتى سىزدەن باستالىق... «انا» ءسوزى وسى تۇرعان بارشامىزعا ەڭ ىستىق، ەڭ قۇرمەتتى ءسوز ەكەنى بەلگىلى. دەسە دە، ءوز نارەستەڭىزدى وزەككە تەۋىپ، بالالار ۇيىنە تاپسىرۋىڭىزعا نە سەبەپ بولدى؟
قىز. ءسىز سۇراقتى دۇرىس قويمادىڭىز.
حاتشى. جاعالاسپاۋىڭىزدى وتىنەمىن. سۇراق-جاۋاپ وتكىزۋگە مەن عانا قۇقىلىمىن.
قىز. قارسىلىعىم جوق، تەك... «بالالار ۇيىنە تاپسىرۋعا» دەگەن سوزىڭىزگە قارسىمىن.
حاتشى. تۇىنبەدىم؟..جاڭا عانا «جەتىمحانادا تاربيەلەندىم» دەگەن ءوزىڭىز ەمەس پە؟!
قىز. تاربيەلەنگەنىم راس...تەك، مەنى تاپسىرعان جوق، مەنى ايالداماعا تاستاپ كەتكەن.
حاتشى. اھ، ءيا... ايالداماعا تاستاپ كەتۋىڭىزگە نە سەبەپ بولدى؟!
ايەل. نە سەبەپ بولسىن....قورقىنىشتىڭ كەسىرىنەن.
حاتشى. سوندا ءسىز ءوز باسىڭىز ءۇشىن قورىققاندا، ايالدامادا يەسىز قالىپ، قىزىڭىز اۋىرىپ قالادى دەگەن ويدان قورىقپاعانىڭىز با؟!
ايەل. قىزدى ويلايتىنداي زامان بولدى ما؟..ونىڭ ۇستىنە، تاپ سول ساتتە ءوز باسىڭنان ارتىلارداي زارە جوق...قول سوزارداي جان تاپپاي، قورشاعان ۇرەيدىڭ جەتەگىنە ەرىپ كەتەسىڭ...
حاتشى. (ەركەككە) ايتىڭىزشى...سۇيىكتىڭىزدىڭ جۇكتى بولعانىن بىلىسىمەن، قاشىپ كەتۋىڭىزگە نە سەبەپ بولدى؟!
ەركەك. ارامىزدا ەشقانداي ماحاببات جوق، ءجاي، كوڭىل كوتەرۋدەن پايدا بولعان بالانى قايتپەكپىن؟!
ايەل. وڭباعان؟! «ءولدىم-تالدىم» دەپ، سوڭىمنان سۇمەڭدەپ قالماي قويعانىڭ قايدا؟!
ەركەك. «قىزدى – كىم ايتتىرمايدى، قىمىزدى – كىم ىشپەيدى»؟! (سوتقا) مەنى نە ءۇشىن سوتقا تارتىپ جاتقانىڭىزدى تۇسىنبەيمىن...قىز بالا دەگەن الدىمەن ابىرويىن ويلاۋى ءتيىس قوي؟!
ايەل. دۇرىس ايتاسىڭ، «ابىرويىمدى ويلاۋىم كەرەك ەدى». بىراق، سەندەر... ەركەكتەر، قىزدىڭ دا سەن سياقتى ەت پەن سۇيەكتەن جارالعانىن...«سۇيىكتىسىنە اينالعان» جىگىت ماحاببات سەزىمىنە بولەپ، ايمالاپ-وپكەن ساتتەردە، قىزدىڭ دا ەركىنەن ايرىلاتىنىن نەگە ەسەپكە المايسىڭدار؟! ءبىزدى قارا تاستان جارالعان دەپ كىم ايتتى؟! مىنا مەنىڭ...ومىرىندە العاش رەت ماحاببات سەزىمىن باسىنان كەشكەن، «ادامدار ارامدىق جاسايدى» دەگەن وي، ءۇش ۇيىقتاسا تۇسىنە كىرمەگەن جاس قىزدىڭ ەركىنەن ايرىلۋىنا كىم سەبەپكەر؟!
ەركەك. «تانا كوزىن سۇزبەسە – بۇقا ءجىبىن ۇزبەيدى»!.. ەمەۋرىن بىلدىرگەندەرگە وزدەرىڭ ءبىر يىقتارىڭدى بەرىپ تۇرعاندا، جىگىتتىڭ نەسى كەتەدى دەيسىڭ؟!
قىز. «نەسى كەتەدىڭىز» قالاي؟! ناتيجەسىندە مەن سورلاپ قالدىم ەمەس پە؟!
ەركەك. «سەنى ايالداماعا تاستاپ كەتسىن» دەگەندى شەشەڭە مەن ايتقان جوقپىن.
ايەل. ايتقان جوقسىڭ، ارينە...بىراق، سول ايلاردا...بويىما بىتكەن بالانى قايتەرىمدى بىلمەي زار يلەگەن كەزدەرىمدە قايدا بولدىڭ؟! تىم قۇرىسا ەن تاعىپ، بالاڭدى يەلەنگەن سوڭ تاستاپ كەتسەڭ دە اياعىڭا جارماسپاس ەدىم. «مەنى ىزدەمەسىن. باسقا قىزعا ۇيلەنەيىن دەپ جاتىرمىن» دەگەندى جولداسىنان سالەمدەمەگە ايتتىرعان سەن بە، مەن بە؟!
حاتشى. نەگە ۇندەمەيسىز؟!
ەركەك. مەن...
حاتشى. ءيا، ءسىز نە ايتپاقسىز؟
ەركەك. مەن دە اداممىن عوي...قورقىپ كەتتىم. ۇيلەنۋ ويىڭا كىرىپ-شىقپاعان كەزدە، ءجاي، كوڭىل اۋلاپ جۇرگەن قىزىڭ «اياعىم اۋىر» دەگەندە، ەسىم شىعىپ قورقىپ كەتتىم.
ايەل. «ءجاي، كوڭىل اۋلاپ؟!.»
حاتشى. سابىر...جاۋابىن كۇتىڭىز. (ەركەككە) ەڭ وڭاي جول – قاشتىم دەڭىز؟
ەركەك. ؟..
حاتشى. ەكەۋلەرىڭىز دە ءوز باستارىڭىزدى كۇيتتەپ كەتتىڭىزدەر. الدارىڭىزدا – تاستاندى قىزدارىڭىز تۇر. قىزدارىڭىزعا ايتار جاۋاپتارىڭىز بار ما؟!
ەركەك. ايتقاندا...ءبىز ەركەكپىز عوي...و باستان جاۋاپكەرشىلىك ايەلدەن تالاپ ەتىلەتىنىن بىلە تۇرا، مىنانىڭ جەڭىلتەك جولعا باراتىنىن ويلاماپپىن.
ايەل. وكىنىشتەن ورتەنگەن سورلى باسىم، وقۋدان شىعىپ قالامىن با دەگەن ۇرەيدەن، ءىشىمدى بىلدىرمەس ءۇشىن تاس قىپ بايلاپ تاستايتىنمىن. قۇدايدىڭ ماعان ءبىر قاراسقان جەرى، ءىشىم ۇلكەيگەن كەز – قىس مەزگىلىنە تاپ بولدى. سىرت كيىمنەن اناۋ ايتتى بىلىنبەيتىن. جاتاقحانادا بىرگە تۇراتىن قىزدار ءبىلىپ قالماسىن دەگەن ۇرەيمەن، اقىسى قىمبات بولسا دا جەكە پاتەر جالداپ تۇردىم. باي كەمپىر جەكە تۇرادى ەكەن. كۇتىمىن جاساپ، ءۇي قىزمەتشىسى بولۋعا كەلىسىپ، تار بولمەدەن ءبىر بۇرىش بەردى. سوعان دا باقىتتى ەدىم. كەمپىرگە بار جايتتى ايتتىم. ەگەر مەن، نارەستەنى اۋرۋحانادا بوسانىپ، تاستاپ كەتسەم، وقۋ ورنىما حابار بەرىپ، وقۋىمنان شىعىپ قالاتىنىمدى ايتتى. ويلانا كەلە، كەمپىردىڭ زەينەتكەر ءبىر تانىسى بالا بوساندىراتىن دارىگەر بولعان ەكەن. اي-كۇنىم جەتىپ بوسانار ساتتە ۇيگە الدىرتتىق. ءيا...مەن سەنى ۇيدە بوساندىم. بىراق....
قىز. نە، بىراق؟!
ايەل. ۇزاق ۋاقىت بويعى كۇيزەلىس ءوز دەگەنىس ىستەپ، سەنى بوسانعان سوڭ، قانىم توقتاماي، ەسىمنەن تانىپ ۇزاق جاتتىم. سەنى، الىگى دارىگەر كەمپىر جورگەككە وراپ، الىپ كەتكەن بولاتىن.
حاتشى. قايدا اپارعانىن سۇرادىڭىز با؟!
ايەل. (باسىن شايقاپ) سۇراۋعا قورىقتىم!..(ەڭىرەپ جىبەرەدى) كۇندەردىڭ-كۇنىندە شىداي الماي ىزدەپ بارامىن دەپ قورىقتىم. اراعا جىل سالىپ وقتالعان كەزىمدە، دارىگەر كەمپىردىڭ قايتىس بولعانىن ەستىدىم. سەنىڭ قايدا تاپسىرىلعانىڭ ول كۇيى قۇپيا بولىپ قالا بەردى.
حاتشى. بۇل كىسىنىڭ ايتۋىنشا «ايالدامادان تابىلعان». الىگى دارىگەر قايدا اپارعانىن تىم قۇرىسا ەمەۋرىنمەن بىلدىرگەن جوق پا ەدى؟! بالكىم، پاتەر جالداۋشى كەمپىرگە ايتقان بولار؟!
ايەل. سۇرادىم...
قىز. ءيا...قايدا تاپسىرىپتى؟
ايەل. بالالار ءۇيىنىڭ قاسىنداعى ايالداماعا تاستاپ كەتىپتى...
ەركەك. تىم قۇرىسا، بالالار ۇيىنە تاپسىرىپ كەتسە قايتەدى؟!
قىز. ءسىز...ءسىز شە؟! سول كەزدە قاسىمدا ءسىز نەگە بولمادىڭىز؟! باۋرىڭىزعا نەگە باسپادىڭىز؟! (ەركەكتى جىندانا سابالاپ)مەن، نەبارى جازىقسىز شارانا ەدىم عوي؟! مەنىڭ جاۋرايتىنىمدى...قارنى اشىپ جىلايتىنىمدى...اكە-شەشەمدى كۇتىپ زارىعاتىنىمدى نەگە ويلامادىڭدار، نەگە؟!
حاتشى قىزدى ارەڭ بوساتىپ الادى.
حاتشى. توقتا...دوعارىڭىز دەيمىن؟!
قىز. (ىشقىنا بۇلقىنىپ) مەنىڭ پاپام مەن مامامەن بىرگە سەيىل قۇرعىم كەلەتىنىن، ادەمى كويلەك كيگىم كەلەتىنىن نەگە ويلامادىڭ، ا؟! موينىڭا اسىلىپ ەركەلەگىم كەلەتىنىن، كەۋدەڭە باسىمدى قويىپ جىلاعىم كەلەتىنىن نەگە ويلامادىڭ؟! ايدالاداعى بىرەۋدى كىنالايدى عوي؟! ءوز كۇناڭ شە؟!
ايەل. (قىزدىڭ الدىندا تىزەرلەپ) كەشىر مەنى؟..
قىز. (ەڭىرەپ) كەشىر؟! بار بولعانى «كەشىر» مە؟! مەن ءسىزدى، مىنا كىسىمەن بىرگە سوتقا بەرەمىن!
ەركەك. سەن ەندى...ءوزىڭ سول كەزدەگى مەنىڭ جاسىمداسىڭ...جاستىق شاقتا الدا نە كۇتىپ تۇرعانىن ويلاپ، باس قاتىراتىن كىم بار دەيسىڭ؟! سول كەزدە ەڭ وڭاي جولدى تاڭداعانىمدى مويىندايمىن. بۇلاي بولارىن بىلگەندە...
قىز. مەنەن قۇتىلدىم دەپ ويلاعان ەكەنسىڭ عوي؟! وكىنىشكە وراي، مەن – ءتىرىمىن!..شالاجانسار جانىمدى سۇيرەتكىدەي سۇيرەلەپ جۇرگەنىمە 23 جىل بولدى!.. جىگىتىمنىڭ كوزىنەن جەتىمەككە قاراعانداي اياۋشىلىق ۇشقىنىن كورگەندە، مىنا ومىردەن باز كەشىپ كەتكىم كەلەتىنىن تۇسىنەسىڭدەر مە؟! مەنىڭ كىم ەكەنىمدى بىلگىلەرىڭ كەلە مە؟! مەن... ەكەۋىڭنىڭ...ءناپسىسىن تىيا الماعان ەكەۋىڭنىڭ كۇنالارىڭمىن!
ايەل. (جانۇشىرا) ولاي دەمەشى، جالىنامىن؟!
قىز. سولاي؟!. كۇناھارلاردىڭ جەر بەتىنە تاستاپ كەتكەن كۇناسىمىن!..مىنە، مەن كىممىن!..
ەركەك. كەشىر...كەشىر مەنى...
ايەل. (جاسىنا تۇنشىعا جانتالاسىپ) كەشىر...كەشىر مەن؟! سەنىڭ وتەۋىڭدى وتەگىم كەلىپ ءبىرىنشى ءسوز سالعان ەركەككە كۇيەۋگە ءتيدىم. ءۇش بىردەي بالام بار. بوسانار كەزدەگى قينالعان ساتتەرىمدە ىلعي سەنى ويلايتىنمىن. سەنەن كەشىرىم سۇرايتىنمىن. مەن، ءبارى-ءبىر باقىتسىزبىن!.. مەنىڭ باقىتىم سەنىمەن بىرگە كەتىپتى. كەش ءتۇسىندىم...جيىرما ءۇش جىلدان بەرى جانىمدى ەگەگەن وسى سۇراقتان جۇيكەم جۇقارىپ، اقىرى كۇيەۋىمنىڭ قاشىپ كەتۋىنە ءوزىم سەبەپكەر بولدىم. بويىمداعى باقىتسىزدىقتى سەزەتىن كۇيەۋىم، تۇنىمەن ۋھىلەپ شىعاتىن ادەتىمنەن شارشاسا كەرەك، شىداي الماي كەتىپ تىندى. ءۇش بالاما جانىم اشىيدى...ساعان بەرە الماعان جىلۋلىعىمدى سولارعا بەرگىم كەلىپ تالپىنامىن...ءبارى-ءبىر، ولاردىڭ ورتاسىنان سەنى ىزدەيمىن. جاستىق السىزدىگىم، قورقاقتىعىم...سۇيگەنىمنىڭ وپاسىزدىعىنان تۇلا بويى تۇڭعىشىمدى تاستاپ كەتكەن وپاسىزدىعىما وكىنىشتەن ءىشىم ۋداي اشىيدى!.. بىلەمىن...ماعان كەشىرىم جوق. مۇمكىن بولسا، كەشىرمە. ەشقاشان مىنا ەكەۋمىزدى كەشىرمە!.. مەنىڭ قۇداي الدىنداعى وتەۋىم سول بولسىن.
قىز سولىعىن باسا الماي ەڭىرەپ تۇر.
قىز. قىز بەن جىگىت، ءناپسى جولىن تاڭداعان كەزدە، مىنا بىزدەردىڭ ءومىر بويى جىلاپ وتەتىنىمىزدى نەگە ويلامايسىزدار، ا؟! اينالامدا بولىپ جاتقان وزگەرىستەردەن جۇرەگىم اينىيدى...جاھانداۋ – ادامزات ءۇشىن قاتەرلى جۇتقا اينالدى!..انا...سوعىسىپ اۋرە بولىپ جاتقاندارعا كۇلكىم كەلەدى. وركەنيەتتى ەلدەردە ەش سوعىسسىز-اق، ادامدارى قۇردىمعا كەتىپ جاتقانى ويلارىنا كىرىپ-شىقپايدى. كەيدە مەن، كۇللى الەمدى سوتقا تارتقىم كەلەدى. تويىنعان... داراقى...جەكسۇرىن قوعامدا ءومىر سۇرۋگە ءماجبۇرمىن. جاپ-جاس بولىپ، نە باسىنا كۇن تۋدى دەرسىزدەر... مەنىڭ قاي جەردە جۇمىس ىستەيتىنىمدى بىلەسىزدەر مە؟! كلونداستىرۋ لابوراتورياسىندا!..بۇگىندە، زاماناۋي جەتىلگەن قىزدار مەن جىگىتتەر ۇيلەنىپ، وتباسىن قۇرۋعا باسىن قاتىرعىلارى كەلمەيدى. قىزدار، ءبىزدىڭ لابوراتوريادان ەركەكتەردىڭ قۋاتتى ۇرىعىن قىمبات اقشاعا ساتىپ الىپ، بويىنا ەكتىرەدى. وتباسىلى ومىرگە جانىن قيناماستان، بالا تۋىپ السا بولدى. ول بالا كىمنىڭ ۇرىعى، ول جاعى تولعاندىرمايدى. جىگىتتەر بولسا، ۇرىقتارىن اقشاعا ساتقاندارىنا ءماز...سوڭعى كەزدەرى جاتجۇرتتىقتار ۇرىعىن كوپتەپ وتكىزەتىن بولدى. ۇرىعىن وتكىزىپ بولىپ زىميان جىمىسقىلىقپەن جىميادى. بەينە ءبىر «مەن سەنىڭ ۇرپاعىڭدى لاستاۋشىمىن!..» دەپ تۇرعانداي مىسقىلدى كورگەندە، جانىمدى قويارعا جەر تابا المايمىن. تاپسىرىلعان ۇرىق كودتالىپ، قۇپياسى ساقتالىنادى. سوندا... ايتىڭىزدارشى، الىگى قىزداردىڭ جاتىرىندا ءوز باۋىرىنىڭ ۇرىعى جاتپاسىنا كىم كەپىل، ا؟! تىپتەن، ءوز اكەسىنىڭ ۇرىعى بولۋى ابدەن مۇمكىن عوي؟! سوندا...ادامداردىڭ حايۋانداردان ايىرماشىلىعى قالدى ما؟! ءناسىلى، ءدىنى، دىلىنە قاراپ جاتقان ەشكىم جوق. قۋاتتى ۇرىق بولسا بولدى...قانىن ساقتاعىسى كەلگەن ۇلت، ەڭ الدىمەن قىزدارىنىڭ جاتىرىن ساقتاۋ كەرەك قوي؟! قازىرگى قىزداردىڭ جاتىرىندا كىمنىڭ ۇرىعى ءوسىپ جاتىر، جارىق دۇنيەگە كىمدەردى اكەلمەكشى، سونى ويلاعان جان بار ما؟! قىزدىڭ جاتىرىندا بالكىم، جاتجۇرتتىقتىڭ ۇرىعىنان ەكتىرىلىپ، اناسىنىڭ حالقىنا قارسى شابار ايداھارلار ءونىپ جاتقان بولار؟! ۇلتتىڭ اسىلىن ساقتاۋشى انالارىڭنىڭ جاتىرىن ءىبىلىس جايلاپ جاتقاندا كىمگە ماقتانباقسىڭ؟! بولاشاققا نە بەتىڭدى ايتپاقسىڭ؟! جاھاندانۋمەن تايتالاسىپ، العا وزعاننان تابارىڭ وسى ما؟! قۇدايىم-اۋ، جاتىرى جىنمەن ۇرىقتانعان قىزدان قانداي ۇرپاق ءونىپ شىقپاق؟! مىنە...مىنە سىزدەرگە بومبا!.. بىزگە اتوم بومباسىن تاستاپ اۋرەگە ءتۇسۋدىڭ قاجەتى جوق. ءبىز وزىمىزگە-ءوزىمىز ۇزاق مەزگىلدىك، ءتۇپ-تامىردى جوياتىن بومبا تاستاپ جاتىرمىز! «ماڭگىرتتەنۋ بومباسى»؟!! ايتىڭىزدارشى، ماڭگۇرتتەنگەن قوعامدا كىمدى سوتتاۋىم كەرەك؟! (ەڭىرەپ جىلاپ وتىر)
ايداۋىل جىگىت توسىننان باسىن ۇستاي الىپ، ايقايلايدى. تۇرعاندار ءۇرپيىسىپ قالعان. جىندانعان ايداۋىل، ايقايلاعان بويى ءليفتتى ۇرعىلاپ، تەپكىلەي باستايدى.
ايداۋىل. ا-ااا؟! سۇمدىق...؟! مەن...مەن ەندى نە ىستەۋىم كەرەك؟!
حاتشى. سىزگە نە بولدى؟!
ايداۋىل. مەن ەندى قالاي ۇيلەنەمىن؟! جو-جوق، ۇيلەنگەننەن بۇرىن، جەردىڭ بەتىن قالاي باسىپ جۇرەمىن؟!
حاتشى. (ايداۋىلدى قاپسىرا قۇشاقتاپ) تىنىشتال؟! توقتا...توقتا دەيمىن؟!
ايداۋىل. (قىزعا جەتىپ كەلىپ) مەنى...مەنى دە سوتقا بەر!
حاتشى. سىزگە نە كورىندى؟! سابىر ساقتاساڭىزشى؟!
ايداۋىل. سەبەبى، مەن دە قىلمىسكەرمىن؟! (جىندانا كۇلىپ) بالكىم مەن، مىنالاردان وتكەن قىلمىسكەر بولارمىن؟!
قىز. ءسىز دە؟!
ايداۋىل. ءيا...مەن دە!..ءۇش اي بولدى...سۇيىكتى قىزىممەن بىرگە تۇرىپ جاتقانىما. قىزىم بالالار ۇيىندە تاربيەلەنگەن...جەتىمدىگىنەن قينالىپ تۇرعانىم جوق. ماعان كۇللى الەم تەرىس قاراسا دا، سۇيگەنىمە وكىنبەن. اكەم «وزىممەن دەڭگەيلەس باي جەردىڭ قىزىن الاسىڭ» دەپ كونبەي ءجۇر. مەن ءيۋريستپىن. مىنا جەردە ۋاقىتشا تاجىربيە جيناقتاۋعا كەلگەنمىن. اكەم، بەلگىلى الپاۋىت. كوزىنە تۇسكەن قىزدى قيىپ تۇسەتىن دون جۋاندىعىمەن الەمگە ايگىلى...بالكىم؟..اااا؟!(قايتادان جىندانىپ، ءليفتتى تەپكىلەي باستايدى) اااا؟! جارىق دۇنيەنى كورگىم كەلمەيدى!..مەنىڭ سۇيىكتىم دە اكەمنىڭ تاستاندى قىزى بوپ شىقسا شە؟! اياعى اۋىرلاپ قالعان تالاي قىزداردى اكەمنىڭ ويلانباستان تاستاپ كەتكەنىن انامنان ەستىگەنمىن. اااا؟! دەمەك، جەتىمحاناداعى تەكسىزدەر توبىرىندا مەنىڭ دە باۋىرلارىم ءجۇر ەكەن عوي؟! (ەسى شىعا ەلىرىپ) توقتاي تۇر...توقتا؟...بالكىم.... سۇيىكتىمنىڭ...بىرگە ءومىر سۇرە باستاعان ماحابباتىمنىڭ، اكەمنىڭ قىزى بوپ شىقپاسىنا كىم كەپىل؟! ەگەر، سولاي بوپ شىقسا...مەنەن وتكەن جيىركەنىشتى...جەر بەتىندە مەنەن وتكەن حايۋان جوق بولىپ شىقپاي ما؟! اااا؟! ولگىم كەلەدى؟! وكىنىشپەن ءومىرىمدى باستاعانشا، جەر بەتىنەن جوق بولعىم كەلەدى؟! ااااا؟!.
وزەگى ورتەنىپ، كۇڭىرەنە جەر توقپاقتاعانايداۋىلعا ايتارعا ءسوز، جۇباتارعا ءتىل جەتپەگەن حاتشى، قىز، ايەل، ەركەك، سىلەيگەن بويلارى، كۇيزەلە قاراپ تۇر...

 

16.02.2016

سايا قاسىمبەك

"ادىرنا" ۇلتتىق پورتالى

پىكىرلەر