قازاقستان ترانساۋعان تەمىرجول قۇرىلىسىنا قاتىسۋعا دايىن. بۇل تۋرالى ۆيتسە-پرەمەر مينيستر سەرىك جۇمانعارين باستاعان دەلەگاتسيانىڭ اۋعانستانعا ساپارى كەزىندە بەلگىلى بولدى، دەپ حابارلايدى «ادىرنا» ءتىلشىسى ۇكىمەتتىڭ ءباسپاسوز قىزمەتىنە سىلتەمە جاساپ.
ەكى ەل پرەمەر-مينيسترلەرىنىڭ ورىنباسارلارى 24 ساۋىردە وتكەن كەزدەسۋىندە تاراپتار ورتالىق جانە وڭتۇستىك ازيانى ينتەگراتسيالاۋ جوبالارىنداعى ىنتىماقتاستىقتى دامىتۋعا ءوزارا مۇددەلىلىك تانىتتى.
اتاپ ايتقاندا، قازاقستاندىق تاراپتىڭ ترانساۋعاندىق ءدالىزدى دامىتۋ جوبالارىن: تەرمەز – مازاري-شاريف – كابۋل – پەشاۆار جانە گەرات – كانداگار – سپين-بۋلداك تەمىر جولدارىن سالۋ جونىندەگى جوبالاردى ىسكە اسىرۋعا قاتىسۋعا دايىندىعى بەلگىلەندى.
جوبا ورتالىق جانە وڭتۇستىك ازيا ەلدەرى اراسىندا جۇكتەردى جەتكىزۋ ۋاقىتىن 10 ەسەگە قىسقارتۋعا، سونداي-اق جۇكتەردى تاسىمالداۋ قۇنىن تومەندەتۋگە مۇمكىندىك بەرەدى. قازاقستان تەمىر جولدىڭ جوعارعى قۇرىلىسىنا ارنالعان ماتەريالداردى، ءوز ءوندىرىسىنىڭ شپالدارى مەن بەكىتكىشتەرىن جەتكىزۋ ارقىلى ترانساۋعان ماگيسترالىنىڭ قۇرىلىسىنا قاتىسۋعا دايىن.
سوڭعى ءۇش جىلدا قازاقستاننان اۋعانستانعا ەكسپورتتىق تاسىمالداۋ كولەمى تۇراقتى تۇردە ءوسىپ كەلەدى: 2023 جىلى تەمىر جول ارقىلى تاسىمالداۋ كولەمى 2,7 ملن توننانى قۇرادى، ونىڭ 1,5 ملن تونناسى – ۇن جانە استىق. بۇل 2021 جىلعى دەڭگەيمەن سالىستىرعاندا 14%-عا كوپ. الداعى جىلدارعا ارنالعان بولجام – ەكسپورتتىڭ 40%-عا ۇلعايۋى. بۇل رەتتە 2030 جىلعا قاراي تاسىمالداردىڭ 3 ەسە ءوسۋى كۇتىلۋدە.
