قوعام بەلسەندىسى، اۋليەاتا ءوڭىرىنىڭ تۋماسى جاسۇلان ابدىحالىق قوردايداعى كەلەڭسىزدىكتەردى جاريالاپ، شەكاراداعى شيەلەنىسكەن ماسەلەنى العا تارتتى، دەپ حابارلايدى "ادىرنا" ۇلتتىق پورتالى. ونىڭ ايتۋىنشا، شىنتاسوۆ ەسىمدى كاسىپكەر شەكارا تۇبىندە ءوز كاسىبىن دوڭگەلەتىپ، زاڭدى بەلشەسىنەن باسقان. داۋلەتى اسقان ازاماتتىڭ شەكارا تۇسىندە سالعان عيماراتى ەل ارالىق قاتىناستا ىڭعايسىزدىق تۋدىرىپ وتىر.
"مىنا تومەندەگى ۆيدەوداعى عيمارات كەشە مەن جازعان شىنتاسوۆ دەگەن داۋدىكى. الگى، حالىقتىڭ جەرىن تارتىپ الىپ پايىن بەرمەي زاڭ ەڭىرەتىپ جۇرگەن قاراباي! ەشكىمنەن رۇقسات الماستان ءدال كەدەن بەكەتى ورنالاسقان شەكارانىڭ تۇبىنە قوناق ءۇي، كافەسىمەن سالىپ تاستاعان. سالىنعان عيماراتتىڭ سىرتىن اينالا قورشاپ تاستاعان. ونسىز دا ات اينالىپ جۇرە المايتىن جەردە ۇزىن-سونار كەزەك! كەپتەلىپ قالعان كولىكتەر! ال، شىنتاسوۆقا ءبارىبىر. پروكۋرورىڭا دا، سوتىڭا دا پىسقىرىپ قاراماعان. ال ەندى بۇل جەر سوتتىڭ شەشىمىمەن بۇزىلعالى جاتىر. كىناسىن مويىنداپ، الىستاۋ جەردەن عيمارات سوعايىن دەگەن كاسىپكەر جوق!" - دەپ جازدى تۋعان ءوڭىرىنىڭ جاناشىرى.
اۆتور كەيىننەن شەكارا تۇبىندە بولىپ جاتقان شيەلەنىستى سۋرەتتەپ، شيرىققان شىنتاسوۆتىڭ ارەكەتىن سىنعا الدى.
- شىنتاسوۆ قايتا كۇشەنىپ، بيلىككە ۋلتيماتۋم قويىپ وتىر. ەگەر دە دەيدى، عيماراتىمدى سنوسقا جىبەرسەڭدەر، حالىقتى جيىپ ميتينگىگە شىعامىن، توقاەۆقا قارسىلىعىمدى بىلدىرەمىن، بۋنت كوتەرەمىن. بۇعان كىم ىلەسەدى، زاڭسىز سوعىلعان عيماراتتى قيراتتى دەپ كىم كوشەگە شىعادى دەسەڭدەر، قاتتى قاتەلەسەمىز. بۇكىل قوردايدىڭ بيزنەس نىساندارى شىنتاسوۆتاردىڭ قولىندا. تومەندەگى سۋرەتتەگى بازار، دۇكەندەر، ءدارىحانالار، بۋتيكتەر، كافەلەر، زاپراۆكالار! بۇلاردىڭ بارلىعىندا ارەندا تولەپ ادامدار ناپاقاسىن تاۋىپ، كۇنىن كورىپ وتىر. كوشەگە شىقساڭدار ارەندانىڭ باعاسىن تۇسىرەمىن، شىقپاساڭدار كوتەرەمىن دەسە جەتىپ جاتىر. كرەديتتە وتىرعان بايقۇس ساۋداگەرلەر ىلاجسىز كوشەگە شىعادى، - دەپ جازدى ول.
جاسۇلان ابدىحالىقتىڭ كوزقاراسىندا قورداي ايماعى شىرپى تيسە، شىرت جاناتىن اۋدان. شىنتاسوۆ ءىسى شىدەرلەنبەسە، سوڭى ۇلتارازدىق قاقتىعىستارعا ۇلاسۋى بەك مۇمكىن. جازبا اۆتورى ءوز ويىن كەلەسىدەي جالعادى:
"سوندىقتان شىنتاسوۆتاردان قورقۋ كەرەك! مۇنداي بايلار مەملەكەتكە وتە قاۋىپتى! ۇلتتىق قاۋىپسىزدىك قىزمەتى قازىردەن الدىن-الماسا، شەكارانىڭ تۇبىنەن مۇنداي بۋنت شىقسا، ارعى جاعى ۇلتارازدىق داۋعا ۇلاسىپ شيەلەنىسىپ كەتەدى. قورداي دەگەن شىرپى تيسە شىرت ەتكەلى تۇرعان شەكاراداعى قيىن ايماق. سوندىقتان ۇيسىمباەۆ سياقتى يدەولوگسىماقتار كولەڭكەلى كابينەتتە وتىرا بەرمەي بارىڭدار، سويلەسىڭدەر، رەتتەڭدەر! انشەيىندە فب-دا جازعاندى سوتقا سۇيرەپ جۇرسىڭدەر. ال ميتينگ جاسايمىن دەپ ىرىتكى سالىپ وتىرعان شىنتاسوۆقا شامالارىڭ جەتەر مە ەكەن كورەيىن. ەرتەڭ كەش بولادى!" - دەدى ج. ابدىحالىق.
داۋلەتى تاسقان ازامات شىنتاسوۆتىڭ بۇل ارەكەتىن جەلىدە جاقسىعا بالاپ جاتقاندار جوق. جەلى قولدانۋشىلارى بۇل حاقىندا:
"ستراتەگيالىق ماڭىزى بار وبەكتىنى بازار قىپ جىبەرگەن كوك قاعازدىڭ كۇشى عوي", "وسىندايلارعا ريزامىن، قالاي كوزدەرى باقىرايىپ، ەلدى ابىگەرگە سالىپ قويىپ، وزدەرىنىڭ تىرشىلىگىن جاساي بەرەدى ەكەن. نە دەگەن قۇدىرەت؟", "پاح شىركىن، نە دەگەن بايلىق، نە دەگەن تويىمسىزدىق", "جالپى حالىقتىڭ كوكەيىنە قونبايتىن ماسەلەلەر قوردالاندى. بۇگىنگى تاڭدا سولاردىڭ ءبىرى جەر ماسەلەسى. ال جەر جەر داۋىنا كەلگەندە حالىقتىڭ توزىمدىلىگىن سىناۋعا بولمايدى. حالىقتىڭ جۇيكەسىن توزدىرماۋ كەرەك. حالىق ءدال جەر سەكىلدى قوزعالمايدى، قوزعالسا قاتتى قوزعالادى. سوندىقتان شىنتاسوۆ مىرزاعا ايتارىم "داراق ءبىر جەردە تۇرىپ كوگەرەدى". ەل اراسىنا ىرىتكى سالماي، مامىلەگە كەلگەنى ءجون", "حالىقتىڭ جەرى ءوز مەنشىگىنە قايتارىلۋ كەرەك، اكىمنىڭ ادىلەت جولىنداعى كۇرەسىندە قولداۋ كورەستەمىز! ادىلدىك ورناسىن!", "مۇنداي جاعداي بارلىق جەردە بار. اكىمدىك ەمەس، ءار ءوڭىردىڭ باي-باعلاندارى بيلەپ توستەپ وتىر" دەپ جازدى ازاماتتار.
"ادىرنا" ۇلتتىق پورتالى
