شىمكەنت قالاسىنىڭ مامانداندىرىلعان اۋدانارالىق سوتىندا 21 جاستاعى نۇراي سەرىكبايدى ءولتىرۋ ءىسى بويىنشا سوت وتىرىسى جالعاستى، دەپ حابارلايدى "ادىرنا" ۇلتتىق پورتالى.
سوت بارىسىندا جابىرلەنۋشى تاراپ سوتتالۋشىدان ماتەريالدىق جانە مورالدىق شىعىندى ءوندىرۋ تۋرالى ازاماتتىق تالاپ قويدى.
جابىرلەنۋشى تاراپتىڭ ادۆوكاتى ايانحان وماروۆتىڭ ايتۋىنشا، نۇراي سەرىكبايدىڭ وتباسى جەرلەۋ راسىمىنە، اس بەرۋگە، ەسكەرتكىش ورناتۋعا، كولىك، زاڭگەرلىك قىزمەتتەرگە جانە تەرگەۋ مەن سوت پروتسەسىنە قاتىسۋعا بايلانىستى 14 739 065 تەڭگە كولەمىندە ماتەريالدىق شىعىنعا ۇشىراعان. سونىمەن قاتار وتباسى سوتتالۋشىدان 10 ميلليارد تەڭگە كولەمىندە مورالدىق وتەماقى ءوندىرۋدى سۇرادى. ادۆوكاتتىڭ ايتۋىنشا، ەشقانداي قارجى اتا-اناسى مەن باۋىرلارىنىڭ قايعىسىن جەڭىلدەتە المايدى.
سونداي-اق ول سوت تالاپتى قاناعاتتاندىرعان جاعدايدا مورالدىق وتەماقى رەتىندە وندىرىلەتىن قاراجاتتىڭ تولىقتاي قايىرىمدىلىققا باعىتتالاتىنىن حابارلادى. سۋديا تالاپ ارىز جاريالانعاننان كەيىن سوتتالۋشىدان قويىلعان تالاپتاردى مويىندايتىنىن سۇرادى. سوتتالۋشى تالاپتاردى مويىندامايتىنىن ايتتى.
