قازاقستاندا جىل سايىن 700 ادام ماس جۇرگىزۋشىنىڭ كەسىرىنەن قازا تابادى نەمەسە جاپا شەگەدى، دەپ حابارلايدى “ادىرنا” ۇلتتىق پورتالى قر ىشكى ىستەر ۆيتسە-ءمينيسترى يگور لەپەحانىڭ مالىمدەمەسىنە سىلتەپ.
«جىل سايىن ەل جولدارىندا ماس جۇرگىزۋشىلەردىڭ كەسىرىنەن 500-گە جۋىق جول-كولىك وقيعاسى ورىن الادى، سونىڭ سالدارىنان 100-گە جۋىق ادام قازا تاۋىپ، 600-دەي ادام ءتۇرلى دارەجەدەگى جاراقات الادى»، - دەدى لەپەحا سارسەنبى كۇنى پارلامەنتتىڭ تومەنگى پالاتاسىنىڭ وتىرىسىندا. اتالمىش مالىمدەمە «جول قوزعالىسى تۋرالى» زاڭعا ەنگىزىلگەن وزگەرىستەر مەن تولىقتىرۋلاردى تالقىلاۋ بارىسىندا ايتىلدى.
ونىڭ ايتۋىنشا، 2018-2023 جىلدار ارالىعىندا كولىكتى ماس كۇيىندە باسقارۋدىڭ 148 مىڭ فاكتىسى انىقتالعان. ونىڭ ىشىندە 2023 جىلى – 22 مىڭ جاعداي تىركەلگەن.
«مەنىڭ ويىمشا، بۇعان شارا قولدانۋ قاجەت جانە شەشىلۋى كەرەك. ونى قايتا قاراۋدىڭ قاجەتى جوق. وعان ءۇش نەگىزدەمە بار: بىرىنشىدەن، ەگەر ادام ىشپەيتىن بولسا، وندا وعان قانداي جازا تاعايىندالاتىنى قىزىق ەمەس، ەكىنشىدەن، ءبىز كۋالىگىنەن ايىرىلعان جۇرگىزۋشىلەر تۋرالى ءجيى ايتامىز، بىراق بماس جۇرگىزۋشىلەردىڭ كىناسىنەن قازا تاپقانداردىڭ وتباسىلارى جايلى ويلامايمىز دا. ۇشىنشىدەن، كىمنىڭ جۇرگىزۋشى كۋالىگىنەن ايىرىلىعانىنا شاعىمدانىپ قايتا جۇگىنەتىنىن جانە قانشا ادام جۇگىنەتىنىن ءبىز بىلەمىز. قازىر ءارتۇرلى كۇردەلى تەحنولوگيالار بار، بىراق ءىس جۇزىندە مۇنداي ادامدار ونشا كوپ ەمەس»، - دەپ قوستى ءىىم باسشىسىنىڭ ورىنباسارى.
كەيبىر ەلدەردە مۇنداي ادامداردان كولىكتى تاركىلەۋ جاعدايلارى بار ەكەنى اتاپ وتىلەدى. ازىرگە قازاقستاندا مۇنداي شارالار قولداۋ تاپپاي وتىر، بىراق بار شارالاردى جۇمسارتۋ دا ورىنسىز، سەبەبى ماس جۇرگىزۋشىلەردىڭ كەسىرىنەن بولاتىن جول-كولىك وقيعالارى ازايماي وتىر.
«2023 جىلى تىركەلگەنى 22 مىڭ، ال جالپى بولىپ جاتقان جايتتار سانى ودان دا كوپ. بۇگىندە كولىكتەردى توقتاتۋ ەرەجەلەرى قاتاڭ تۇردە رەتتەلگەن، جۇرگىزۋشى جول ەرەجەسىن بۇزباسا، ءبىز ونى توقتاتپايمىز. كوپتەگەن ەلدەردەگىدەي ماقساتتى رەيدتەر جۇرگىزەتىن بولساق، بۇل سان ەكى ەسە كوپ بولار ەدى»، - دەدى لەپەحا.
