Qazaqstanda jyl saıyn 700 adam mas júrgizýshiniń kesirinen qaza tabady nemese japa shegedi, dep habarlaıdy “Adyrna” ulttyq portaly QR Ishki ister vıe-mınıstri Igor Lepehanyń málimdemesine siltep.
«Jyl saıyn el joldarynda mas júrgizýshilerdiń kesirinen 500-ge jýyq jol-kólik oqıǵasy oryn alady, sonyń saldarynan 100-ge jýyq adam qaza taýyp, 600-deı adam túrli dárejedegi jaraqat alady», - dedi Lepeha sársenbi kúni parlamenttiń tómengi palatasynyń otyrysynda. Atalmysh málimdeme «Jol qozǵalysy týraly» zańǵa engizilgen ózgerister men tolyqtyrýlardy talqylaý barysynda aıtyldy.
Onyń aıtýynsha, 2018-2023 jyldar aralyǵynda kólikti mas kúıinde basqarýdyń 148 myń faktisi anyqtalǵan. Onyń ishinde 2023 jyly – 22 myń jaǵdaı tirkelgen.
«Meniń oıymsha, buǵan shara qoldaný qajet jáne sheshilýi kerek. Ony qaıta qaraýdyń qajeti joq. Oǵan úsh negizdeme bar: birinshiden, eger adam ishpeıtin bolsa, onda oǵan qandaı jaza taǵaıyndalatyny qyzyq emes, ekinshiden, biz kýáliginen aıyrylǵan júrgizýshiler týraly jıi aıtamyz, biraq bmas júrgizýshilerdiń kinásinen qaza tapqandardyń otbasylary jaıly oılamaımyz da. Úshinshiden, kimniń júrgizýshi kýáliginen aıyrylyǵanyna shaǵymdanyp qaıta júginetinin jáne qansha adam júginetinin biz bilemiz. Qazir ártúrli kúrdeli tehnologııalar bar, biraq is júzinde mundaı adamdar onsha kóp emes», - dep qosty IIM basshysynyń orynbasary.
Keıbir elderde mundaı adamdardan kólikti tárkileý jaǵdaılary bar ekeni atap ótiledi. Ázirge Qazaqstanda mundaı sharalar qoldaý tappaı otyr, biraq bar sharalardy jumsartý da orynsyz, sebebi mas júrgizýshilerdiń kesirinen bolatyn jol-kólik oqıǵalary azaımaı otyr.
«2023 jyly tirkelgeni 22 myń, al jalpy bolyp jatqan jaıttar sany odan da kóp. Búginde kólikterdi toqtatý erejeleri qatań túrde rettelgen, júrgizýshi jol erejesin buzbasa, biz ony toqtatpaımyz. Kóptegen elderdegideı maqsatty reıdter júrgizetin bolsaq, bul san eki ese kóp bolar edi», - dedi Lepeha.
