الماتى قالاسىنداعى شەتەلدىك برەندتەردىڭ بۋتيكتەرى بار «Esentai mall» ءىرى ساۋدا ورتالىعىن رەسەيلىك ينۆەستورلار ساتىپ الۋعا نيەتتى. ورتالىققا ماسكەۋدەگى «گۋم» يەسى قىزىعۋشىلىق تانىتقان، دەپ حابارلايدى “ادىرنا” ۇلتتىق پورتالى Ulysmedia.kz سايتىنا سىلتەپ.
Esentai Mall ساۋدا، ويىن-ساۋىق ورتالىعى الماتىنىڭ داۋلەتتىلەر تۇراتىن اۋدانىندا ورنالاسقان. وندا بۋتيىكتى جالداۋ الاڭى ءبىر شارشى مەتر ءۇشىن 49 مىڭ تەڭگەنى قۇرايدى. ورتالىقتا Chopard, Brunello Cucinelli, Dior, Fendi, Loro Piana, Louis Vuitton جانە تاعى باسقا الەمدىك برەندتەر شوعىرلانعان.
Esentai Mall يەسى «سي پي ريتەيل الماتى». كومپانيانىڭ قۇرىلتايشىسى كاسىپكەر قايرات بورانباەۆ، سونداي-اق "ەسەنتاي ينۆەستمەنتس" جشس. ال سوڭعى اتالعان كومپانياعا Forbes رەيتينگىنىڭ وكىلى سەرجان جۇماشەۆ، سونداي-اق گۋرسەل ومەن مەن مەحمەت ەركەك يەلىك ەتەدى.
ۇلىسمەديا دەرەككوزدەرى مۇددەلى تاراپتاردىڭ اراسىندا ماسكەۋدىڭ "گۋم" يەسى بارىن اتاپ وتەدى. ماسكەۋدىڭ قىزىل الاڭىنداعى ساۋدا ورتالىعى Bosco di Ciliegi مەنشىگىندە. بۇل كومپانيانىڭ قوجاسى رەسەيلىك كاسىپكەر ميحايل كۋسنيروۆيچ. ەكى جىل بۇرىن ول يتاليا ازاماتتىعىن العان، شۆەيتساريا رەزيدەنتى مارتەبەسى دە بار. ونىڭ سانكتسيا تىزىمىندە بار-جوعى جونىندە اقپارات جوق.
ساۋدا كەلىسىمى جونىندە ازىرگە رەسمي اقپارات جوق.
