رەسەي پرەزيدەنتى ۆلاديمير پۋتين 31 قازاندا پارلامەنتتىڭ تومەنگى پالاتاسى – مەملەكەتتىك دۋماعا ەكس-پرەزيدەنتتىڭ ءومىر بويى سەناتور بولۋىنا رۇقسات بەرەتىن زاڭ جوباسىن ۇسىندى. ازاتتىق راديوسىنىڭ حابارلاۋىنشا، پرەزيدەنتتىڭ مۇنداي ۇسىنىس جاساۋىنا بىرنەشە اي بۇرىن رەفەرەندۋمدا قابىلدانعان كونستيتۋتسيالىق وزگەرىستەر مۇمكىندىك بەرەدى.
زاڭ جوباسىنا سايكەس، وكىلەتى اياقتالعان نەمەسە وتستاۆكاعا كەتكەن رەسەي پرەزيدەنتى ءومىر بويى پارلامەنتتىڭ جوعارعى پالاتاسى – فەدەراتسيا كەڭەسىنىڭ دەپۋتاتى قىزمەتىن اتقارا الادى. بۇل ءۇشىن ول فەدەراتسيا كەڭەسىنە ءتيىستى قۇجاتتارىن تىركەي وتىرىپ، ءوتىنىش بەرۋى كەرەك. ەكس-پرەزيدەنت وكىلەتى اياقتالعان سوڭ ءۇش اي مەرزىم ىشىندە وسىنداي ءوتىنىشتى ءبىر مارتە بەرە الادى.
بۇعان قوسا، زاڭ جوباسىندا پرەزيدەنتكە "عۇمىر بويىنا" سەناتورلار تاعايىنداۋ قۇزىرەتى بەرىلگەن. پرەزيدەنت ەڭ كوپ دەگەندە جەتى ادامدى "عۇمىرلىق" سەناتور ەتىپ تاعايىنداي الادى. بۇل زاڭ قابىلدانسا، پۋتين جالپى 30 ادامدى فەدەراتسيا كەڭەسىنە ءوز اتىنان جىبەرۋگە قۇقىلى، بىراق ولاردىڭ باسىم بولىگى 6 جىل مەرزىمگە تاعايىندالادى.
"سەناتورلاردى تاعايىنداۋ – پرەزيدەنتتىڭ مىندەتى ەمەس، قۇقىعى، پرەزيدەنت مۇنى ءوز قالاۋى بويىنشا كەز كەلگەن ۋاقىتتا جۇزەگە اسىرا الادى" دەدى مەملەكەتتىك دۋمانىڭ مەملەكەتتىك قۇرىلىس جانە زاڭناما كوميتەتىنىڭ توراعاسى پاۆەل كراشەنيننيكوۆ.
زاڭ جوباسىنا سايكەس، پرەزيدەنت بەلگىلى ءبىر تالاپتارعا ساي كەلەتىن ادامداردى ء"ومىر بويىنا" پرەزيدەنت ەتىپ تاعايىنداي الادى.
ول ءۇشىن ۇمىتكەر 30 جاسقا تولعان، رەسەي اۋماعىندا تۇراقتى تۇراتىن جانە باقا ەشبىر ەلدىڭ ازاماتتىعىن نە ول ەل اۋماعىندا تۇرۋعا رۇقسات بەرەتىن ىقتيارحاتىن الماعان، "كىرشىكسىز ابىروي-بەدەلى بار" ادام بولۋى كەرەك.
كونستيتۋتسيا تالاپتارىنا سايكەس، "مەملەكەتتىك جانە قوعامدىق ىستەردە ەلگە ەرەن قىزمەت ەتكەن ازاماتتار" ء"ومىر بويىنا" سەناتور بولىپ تاعايىندالا الادى.
بيىلعى 25 مامىر – 1 ماۋسىم ارالىعىندا رەسەيدە پرەزيدەنت ۆلاديمير ءپۋتيننىڭ ۇسىنىسىمەن كونستيتۋتسياعا وزگەرىس ەنگىزۋ بويىنشا رەفەرەندۋم وتكەن. رەفەرەندۋمدا ەلدىڭ نەگىزگى زاڭىنا 22 وزگەرىس ۇسىنىلعان. وزگەرىستەر پرەزيدەنتتىڭ ۇكىمەتكە جانە سوتتارعا ىقپالىن كۇشەيتەدى ءارى 20 جىلعا جۋىق بيلىكتە وتىرعان ءپۋتيننىڭ وسىعان دەيىنگى پرەزيدەنتتىك مەرزىمدەرىن "نولدەن باستايدى".
رەسمي قورىتىندى بويىنشا، كونستيتۋتسياعا ۇسىنىلعان وزگەرىستەردى داۋىس بەرۋگە قاتىسقانداردىڭ شامامەن 78 پايىزى قولداعان.
حالىقارالىق قوعامداستىق بۇل وزگەرىستەردى دە، رەفەرەندۋمنىڭ ۇيىمداستىرىلۋىن دا سىنعا العان.
"ادىرنا" ۇلتتىق پورتالى
