Qýandyq Bıshimbaevqa qatysty qylmystyq is boıynsha ashyq sot otyrysy jalǵasýda. Búgingi sot otyrysynda burynǵy Ulttyq ekonomıka mınıstriniń anasy alǵash ret sóz sóıledi, dep habarlaıdy "Adyrna" tilshisi QazAqparatqa siltep.
Bıshimbaev azamattyq nekedegi jubaıy Saltanat Núkenovany asa qatygezdikpen óltirdi dep aıyptalǵan. Búgingi tústen keıingi sot otyrysyna jábirlenýshi Aıtbek Amangeldi jáne onyń ókilderiniń biri qatysqan joq. Sebebi jábirlenýshi tarap marqumnyń ata-anasy ózin jaısyz sezingenin aıtqan. Artynsha olarǵa jedel járdem shaqyrylǵan.
Degenmen sýdıa sot zalynan ruqsatsyz shyǵýǵa bolmaıtynyn aıtty.
«Ol kez kelgen ýaqytta kirip-shyǵa almaıdy. Ol úshin sottan ruqsat suraý kerek. Tártip bárine ortaq, úziliske deıin kútsin», - dedi sýdıa Aıjan Qulbaeva.
Sot barysynda Q.Bıshimbaevty qorǵaýshy tarap sotta máskeýlik mamandardyń qorytyndysymen tanystyrdy. Qorǵaýshy Nazken Qusaıynova reseılik mamandardyń qorytyndysyn oqı otyryp, Núkenovanyń ólimine qatysty derektermen bólisti. Ol marqumnyń basynan qannyń ketýi, ólimnen 3-4 apta buryn paıda bolǵan gematoma bolýy múmkin dep málimdeıdi.
Sondaı-aq, sot otyrysynda Qýandyq Bıshimbaevtyń anasy Almıra Nurlybekova alǵash ret sóz sóıledi.
«Árıne, men zańger emespin, biraq máskeýlik mamandardyń qorytyndysyn qabyldamasańyz, ulymnyń ózin qorǵaý jolynda dálelder keltirýde konstıtýııalyq quqyǵyn shekteý dep sanaımyn. Buny ana retinde shyn júrekten aıtyp otyrmyn», - dedi kúdiktiniń anasy sýdıaǵa qaraı otyryp.
Aıta keteıik, sot otyrysy erteń jalǵaspaq.
