ءبىرىنشى پرەزيدەنت نازارباەۆتىڭ قورى رەسمي مالىمدەمە جاسادى، دەپ حابارلايدى “ادىرنا” ءتىلشىسى.
تۇڭعىش پرەزيدەنت قورى قازاقستاندا سۋ تاسقىنى كەزىندە كەي باق-تىڭ “نۇرسۇلتان نازارباەۆ قورى «بيلىكتىڭ بەدەلىن تۇسىرۋگە جانە قوعامدىق-ساياسي جاعدايدى تۇراقسىزداندىرۋعا باعىتتالعان اقپاراتتىق ناۋقان» جۇرگىزىپ وتىر” دەگەن اقپاراتقا قاتىستى مالىمدەمە جاسادى. رەسمي سايتتا:
“جاسىرىن دەرەككوز جاريالاعان اقپاراتتى جەكە تۇلعالار دا ايتىپ، نەگىزسىز ايىپ تاقتى
نۇرسۇلتان نازارباەۆ قورى بۇل جاريالانىم مەن مالىمدەمەنىڭ ەشقانداي وبەكتيۆتى ءارى ناقتى نەگىزى جوق دەپ مالىمدەمە جاساۋ قاجەت دەپ سانايدى. قور قوعامعا شىنايى جانە سەنىمدى اقپارات بەرۋدىڭ ماڭىزدىلىعىن اتاپ كورسەتەدى.
نۇرسۇلتان نازارباەۆ قورىنىڭ قىزمەتىندە ساياسي دا، اقپاراتتىق-مانيپۋلياتسيالىق تا سيپات جوق. قوردىڭ جۇمىسى تەك الەۋمەتتىك جوبالار مەن ازاماتتىق باستامالاردى دامىتۋعا، ەل جاستاردى قولداۋعا، قايىرىمدىلىق كومەك كورسەتۋگە باعىتتالعان”، - دەپ جازىلعان.
بۇعان قوسا، قوردىڭ سايتىندا نۇرسۇلتان نازارباەۆ مەملەكەت باسشىسى قاسىم-جومارت توقاەۆتى جانە ونىڭ ساياسي باعىتىن ءاردايىم قولداپ، ارمەن قاراي قولدايتىنىن جەتكىزدى.
“بۇل كۇندەرى ەل تۇرعىندارى سياقتى تۇڭعىش پرەزيدەنت تە سۋ تاسقىنىنان زارداپ شەككەن جاندارعا الاڭداپ وتىر. ءبىز مەملەكەت باسشىسى مەن ۇكىمەتتىڭ ەل وڭىرلەرىندە بۇرىن-سوڭدى بولماعان سۋ تاسقىنىنىڭ سالدارىن جويۋ جونىندەگى شاراسىن تولىعىمەن قولدايمىز.
نۇرسۇلتان نازارباەۆ قورى زارداپ شەككەن ءوڭىر تۇرعىندارىن قولداۋ ءۇشىن العاشقىلاردىڭ ءبىرى بولىپ اقشا اۋدارىپ، قارجىلاي كومەك كورسەتتى”، - دەپ جازىلعان سايتتىڭ العاشقى بەتىندە.
قور وكىلى الكەي مارعۇلانۇلى Facebook جەلىسىندەگى پاراقشاسىندا جازبا جاريالادى.
”نۇرسۇلتان نازارباەۆ قورى رامازان ايىنىڭ سوڭعى كۇنى 9-شى ساۋىردە "قازاقستان حالقىنا" قوعامدىق قورىنا ەلدەگى ورىن العان سۋ اپاتىنا كومەك رەتىندە 300 000 000 تەڭگە اۋدارعان ەدى. بىزگە "قازاقستان حالقىنا" قوعامدىق قورى اتالعان قارجىنى سۋ اپاتىنان زارداپ شەككەن ايماقتاردا ءۇي سالۋعا جۇمسالاتىنىن حابارلادى. يگىلىكتى باستامانى قاتتى قولدادىق.
بىراق ءبىز يگى ءىستى حابارلاپ جاتۋدى ءجون كورمەدىك. يگى ءىستى تىنىشتىقتا جاساۋ قاجەتتىلىگى نەگىزگى باسىمدىق بولدى”، - دەپ جازدى تۇڭعىش پرەزيدەنت قورى اتقارۋشى ديرەكتورىنىڭ ورىنباسارى الكەي مارعۇلانۇلى.
ەسكە سالا كەتەيىك، بۇعان دەيىن نازارباەۆتىڭ رەسمي سايتى جۇمىس ىستەمەي تۇرعانىن جازعان بولاتىنبىز.
