Birinshi prezıdent Nazarbaevtyń qory resmı málimdeme jasady, dep habarlaıdy “Adyrna” tilshisi.
Tuńǵysh prezıdent qory Qazaqstanda sý tasqyny kezinde keı BAQ-tyń “Nursultan Nazarbaev Qory «bıliktiń bedelin túsirýge jáne qoǵamdyq-saıası jaǵdaıdy turaqsyzdandyrýǵa baǵyttalǵan aqparattyq naýqan» júrgizip otyr” degen aqparatqa qatysty málimdeme jasady. Resmı saıtta:
“Jasyryn derekkóz jarııalaǵan aqparatty jeke tulǵalar da aıtyp, negizsiz aıyp taqty
Nursultan Nazarbaev Qory bul jarııalanym men málimdemeniń eshqandaı obektıvti ári naqty negizi joq dep málimdeme jasaý qajet dep sanaıdy. Qor qoǵamǵa shynaıy jáne senimdi aqparat berýdiń mańyzdylyǵyn atap kórsetedi.
Nursultan Nazarbaev Qorynyń qyzmetinde saıası da, aqparattyq-manıpýlıaııalyq ta sıpat joq. Qordyń jumysy tek áleýmettik jobalar men azamattyq bastamalardy damytýǵa, el jastardy qoldaýǵa, qaıyrymdylyq kómek kórsetýge baǵyttalǵan”, - dep jazylǵan.
Buǵan qosa, qordyń saıtynda Nursultan Nazarbaev Memleket basshysy Qasym-Jomart Toqaevty jáne onyń saıası baǵytyn árdaıym qoldap, ármen qaraı qoldaıtynyn jetkizdi.
“Bul kúnderi el turǵyndary sııaqty Tuńǵysh Prezıdent te sý tasqynynan zardap shekken jandarǵa alańdap otyr. Biz Memleket basshysy men Úkimettiń el óńirlerinde buryn-sońdy bolmaǵan sý tasqynynyń saldaryn joıý jónindegi sharasyn tolyǵymen qoldaımyz.
Nursultan Nazarbaev Qory zardap shekken óńir turǵyndaryn qoldaý úshin alǵashqylardyń biri bolyp aqsha aýdaryp, qarjylaı kómek kórsetti”, - dep jazylǵan saıttyń alǵashqy betinde.
Qor ókili Álkeı Marǵulanuly Facebook jelisindegi paraqshasynda jazba jarııalady.
”Nursultan Nazarbaev Qory Ramazan aıynyń sońǵy kúni 9-shy sáýirde "Qazaqstan halqyna" qoǵamdyq qoryna eldegi oryn alǵan sý apatyna kómek retinde 300 000 000 teńge aýdarǵan edi. Bizge "Qazaqstan halqyna" qoǵamdyq qory atalǵan qarjyny sý apatynan zardap shekken aımaqtarda úı salýǵa jumsalatynyn habarlady. Igilikti bastamany qatty qoldadyq.
Biraq biz ıgi isti habarlap jatýdy jón kórmedik. Igi isti tynyshtyqta jasaý qajettiligi negizgi basymdyq boldy”, - dep jazdy Tuńǵysh prezıdent qory atqarýshy dırektorynyń orynbasary Álkeı Marǵulanuly.
Eske sala keteıik, buǵan deıin Nazarbaevtyń resmı saıty jumys istemeı turǵanyn jazǵan bolatynbyz.
