Aqtóbede segizinshi synyp oqýshysy ózinen bir-eki jas úlken oqýshylardyń qolynan qaza tapqan, dep habarlaıdy "Adyrna" tilshisi KTK telearnasyna siltep.
Balanyń býyndastarynyń qolynan qaza tapqanyn kýágerler de, saraptama da rastap otyr. Qazir kúdikke ilingen balalar qamaýda.
11 sáýir kúni qaıtys bolǵan balanyń ólimine qatysty qylmystyq is úsh bap boıynsha qozǵalǵan. Tek Beksultandy uryp óltirgen joǵary synyp oqýshylary ǵana emes, bilim oshaǵynyń ókilderi de jaýapqa tartylatyn bolady.
Al perzentinen aıyrylǵan ata-ana jaýyzdyqqa barǵan jasóspirimderdi de, alǵashynda qylmysty barynsha jasyrǵan bilim oshaǵynyń basshylaryn da qatań jazalaýdy suraıdy.
"Biraq myna balalar jazasyn alsa eken. Jalǵyz balalar emes, osy jerdegi tómengilerden bastap, joǵarǵysyna deıin jazalansa eken. Nege bunyń ústinen is qozǵamaıdy? Nege qaralmaıdy? Nege tártip joq? Tártip joq jerde bilim bola ma?” – deıdi marqum Beksultannyń anasy Zoıa Bazarbaeva.
Qaıtys bolǵan Beksultan Ábýbákir erkin kúresten sport sheberi bolǵan. Ol egizimen birge sport mektebinde segizinshi synypta oqyǵan. Al otbasyna qaıǵyly oqıǵanyń qalaı bolǵanyn Beksultannyń syńary baıandaǵan.
"Urǵan. Bir-bir judyryqpen urǵan, tósinen. Shapalaqtaǵan. Meniń balam Beksultan shette turǵan. Esiktiń qasynda turǵanda shapalaqpen betinen urǵan kezde, shapalaqtan eńkeımeı me, sol kezde Mırlan degen bala, onynshy synyptaǵy bala tizesimen ne qylǵan. Tize tıgennen keıin, bala bylaı, esikke qaraı qulaǵany dálizdegi beınekameraǵa túsip qalǵan”, – deıdi Beksultannyń ákesi Qaırat Qalnazarova.
Mekteptegi álimjettikti basqa oqýshylar da jarysa aıtqan kórinedi. Belgili bolǵandaı joǵary synyp oqýshylary kúndelikti dóner alý úshin aqsha surap, jataqhanadaǵy bólmelerdi de judyryqtatyp jınatyp júrgen.
Al álimjettik týraly jaq ashpaǵan bilim oshaǵynyń dırektory ol kezde "tóbeles bolǵanyn bilmedim" dep otyr.
"Baqylaýsyz degende, túngi kezekshiliktegi tárbıeshi sol qabatta bolǵan. Biraq sol balalar sol bólmege kirip ketkenin kórmeı qalǵan. Muǵalimderge tergeý endi júrip jatyr. Tárbıeshileri, jattyqtyrýshylary, orynbasary”, – deıdi Eset batyr atyndaǵy olımpıada rezerviniń oblystyq mamandandyrylǵan mektep-ınternatynyń dırektory Qaırat Ájbaǵambetov.
