اقتوبە وبلىسىنىڭ العا اۋداندىق سوتىندا Instagram الەۋمەتتىك جەلىسى ارقىلى جالعان اقپارات تاراتىپ، ازاماتتىڭ ار-نامىسى مەن قادىر-قاسيەتىنە نۇقسان كەلتىرگەن ەر ادامعا قاتىستى اكىمشىلىك ءىس قارالدى، دەپ حابارلايدى "ادىرنا" ۇلتتىق پورتالى.
اۋداندىق سوت تاراتقان ماتەريالدارعا سايكەس، قۇقىقبۇزۋشى ءوزىنىڭ Instagram پاراقشاسىندا جابىرلەنۋشى تۋرالى شىندىققا سايكەس كەلمەيتىن مالىمەتتەر جاريالاعان. ناتيجەسىندە بۇل اقپارات ازاماتتىڭ ار-نامىسىنا، قادىر-قاسيەتىنە جانە ىسكەرلىك بەدەلىنە زيان كەلتىرگەنى انىقتالعان. سوت وتىرىسى بارىسىندا ەر ادام ءوز كىناسىن تولىق مويىنداعان. سونىمەن قاتار ءىس بويىنشا جاۋاپكەرشىلىكتى اۋىرلاتاتىن ءمان-جايلار انىقتالماعان.
وسىعان بايلانىستى سوت ونى اكىمشىلىك قۇقىقبۇزۋشىلىق تۋرالى كودەكستىڭ 73-3-بابىنىڭ 2-بولىگى («جالا جابۋ») بويىنشا كىنالى دەپ تانىپ، 544 950 تەڭگە كولەمىندە اكىمشىلىك ايىپپۇل سالدى.
سوت شەشىمى زاڭدى كۇشىنە ەندى.
