اقمولا وبلىسىندا سۋ باسقان اۋىلدار جارىق پەن سۋسىز قالدى، دەپ حابارلايدى "ادىرنا" ءتىلشىسى قازتاگ-قا سىلتەپ.
ۇشقاراسۋ اۋىلىنىڭ تۇرعىندارى ەكى اپتاعا جۋىق ۋاقىت بويى جارىق پەن سۋسىز وتىرعانىن ايتتى.
«اقمولا وبلىسى، جارقايىڭ اۋدانى، ۇشقاراسۋ اۋىلى. ءبىز قازىردىڭ وزىندە كومەك سۇراپ جاتىرمىز. 13-ءشى كۇن جارىقسىز، سۋسىز، زەينەتاقىسىز وتىرامىز. بىزگە ەشكىم ەشتەڭە جىبەرمەيدى، ءتىپتى ءبىزدى ەشكىم ەستىمەيدى!» – دەدى اۋىل تۇرعىندارى بەينەۇندەۋىندە.
تۇرعىندار قازىردىڭ وزىندە ازىق-تۇلىك تاۋسىلعانىن ايتادى.
جەرگىلىكتى اتقارۋشى ورگاندار ۇشقاراسۋ تۇرعىندارى ءبىرىنشى كەزەكتەگى قاجەتتى زاتتارمەن جانە ونىمدەرمەن قامتاماسىز ەتىلگەن دەپ سەندىرەدى.
«ەسىل وزەنى سۋ دەڭگەيىنىڭ كۇرت كوتەرىلۋىنە بايلانىستى، سونداي-اق ەرىگەن سۋدىڭ اسەرىنەن مۇزدار ەلەكتر تىرەكتەرىن ۇشىرىپ اكەتتى، سوندىقتان 3 ساۋىردەن بەرى ەلەكتر قۋاتى جوق. ەلدى مەكەننىڭ گەوگرافيالىق ورنالاسۋىنا بايلانىستى بارلىق كىرەبەرىستەردى سۋ باسىپ، تەحنيكا مەن كولىكتەردىڭ وتۋىنە كەدەرگى كەلتىۋدە»، - دەيدى شەنەۋنىكتەر.
سول سەبەپتى ەنەرگەتيكتەر تىرەكتەرگە جوندەۋ جۇمىستارىن جۇرگىزە المايدى، دەگەنمەن شەنەۋنىكتەر اۋىلعا اپاراتىن جول اشىلىپ، ايماقتارداعى سۋ دەڭگەيى تومەندەي سالىسىمەن بريگادالار ەلەكتر قۋاتىن قالپىنا كەلتىرۋگە كىرىسەتىنىن ايتادى.
