1997 جىلى 10 جەلتوقساندا قازاقستان استاناسى اقمولا قالاسىنا كوشىرىلدى، دەپ حابارلايدى "ادىرنا" ءتىلشىسى.
1997 جىلى 10 جەلتوقساننان باستاپ اقمولا قازاقستاننىڭ استاناسى بولىپ رەسمي تۇردە جاريالاندى.
جاڭا استانانى سالۋ يدەياسى ەكس-پرەزيدەنت نۇرسۇلتان نازارباەۆقا تيەسىلى بولعان.
الماتىنىڭ استانا دارەجەسىن اقمولاعا بەرۋ تۋرالى شەشىم 1994 جىلى 6 شىلدەدە ەلباسىنىڭ ۇسىنىسىمەن قازاقستاننىڭ جوعارعى كەڭەستە قابىلدانعان.
1997 جىلى 20 قازاندا نازارباەۆ ەلوردانى اۋىستىرۋ تۋرالى جارلىققا قول قويعان.
ەلوردانى اۋىستىرۋ تۋرالى شەشىم قابىلدانعان كەزدە، اقمولا قالاسىندا 290 مىڭداي عانا حالىق تۇرعان. تۇڭعىش پرەزيدەنت بۇل شەشىمىن «ەۋرازيا جۇرەگىندە» اتتى كىتابىندا تۇسىندىرگەن:
«اقمولا قازاقستاننىڭ گەوگرافيالىق ورتالىعى دەۋگە بولاتىن، قازاقستان ەكونوميكاسىنىڭ ورلەۋىندە جەتەكشى دە وسكەلەڭ نۇكتەلەرى بولىپ وتىرعان ماڭىزدى شارۋاشىلىق وڭىرلەرگە جاقىن ورنالاسقان. قالا ءىرى كولىكتىك ارنالاردىڭ قيىلىسىندا، توعىز جولدىڭ تورابىندا تۇر. بۇدان باسقا، قالا قازاقستان ءۇشىن كوپتەگەن شەت ەلگە شىعۋدىڭ مەيلىنشە توتە جولى – ترانسەۋروازيا ارنالارىنا تاياۋ قونىستانعان»، – دەپ جازعان نۇرسۇلتان ءابىشۇلى.
1997 جىلدارى ستانانىڭ ىرگەتاسىن قالاعانداردىڭ ءبىرى، قر ەڭبەك سىڭىرگەن ساۋلەتشىسى سەرىك رۋستامبەكوۆتىڭ ەستەلىگىندە:
"10 جەلتوقسان - مەن ءۇشىن، ەل ءۇشىن ۇمىتىلماس كۇن. 1991 جىلى 10 جەلتوقساندا قازاقستان رەسپۋبليكاسىنىڭ تۇڭعىش پرەزيدەنتى انت قابىلدادى. مەن ول كەزدە قازاق كسر جوعارعى كەڭەسىنىڭ دەپۋتاتى بولدىم. سودان كەيىن قازكسر-ءدى قازاقستان رەسپۋبليكاسى دەپ وزگەرتۋ تۋرالى زاڭ قابىلداندى. 1993 جىلى 10 جەلتوقساندا قازاقستان رەسپۋبليكاسى جوعارعى كەڭەسىنىڭ تاراۋى ءوتتى، ول جەردە مەن دەپۋتات، قۇرىلىس جانە ساۋلەت كوميتەتى توراعاسىنىڭ ورىنباسارى بولدىم. 1997 جىلى اقمولا قالاسى رەسمي تۇردە استانا بولىپ جاريالاندى. جينالىس وتكىزىلدى، قالانىڭ كىلتى اكەلىندى. سالتاناتتى ءراسىم اكىمدىكتىڭ الدىنداعى الاڭدا ءوتتى. كورەرمەندەر الدىندا مىنبەردە قازاقستان رەسپۋبليكاسىنىڭ تۇڭعىش پرەزيدەنتى ءسوز سويلەدى، مەن سول توپتىڭ ىشىندە تۇردىم. كۇن اياز بولدى. تاڭقالارلىقتاي جاڭا قالا قۇرىلدى. استانامىز تەك اكىمشىلىك ەمەس، ىسكەرلىك، مادەني جانە سپورت ورتالىعىنا اينالدى. بۇل مەنىڭ جۇمىسىمنىڭ بولىگى", - دەدى ساۋلەتشى.
